ଭୁବନେଶ୍ୱର, (ବ୍ୟୁରୋ)/କଟକ ଅଫିସ୍/ ନୟାଗଡ଼ ଅଫିସ/ରଣପୁର (ସ୍ବ.ପ୍ର.)/ଚାନ୍ଦବାଲି (ଡି.ଏନ.ଏ.),୨ା୪: ବହୁଚର୍ଚ୍ଚିତ କ୍ୟାମେରାମ୍ୟାନ ମାନସ ସ୍ବାଇଁ ହତ୍ୟା ମାମଲାରେ ଜେଲ ଯାଇ ରିମାଣ୍ଡରେ ଆସିଥିବା ୪ ଅଭିଯୁକ୍ତଙ୍କ ମଧ୍ୟରୁ ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତ ଶୁକ୍ରବାର କ୍ରାଇମ୍ବ୍ରାଞ୍ଚ ଆଗରେ ସତ ଓକାଳିଛନ୍ତି। ମାନସଙ୍କୁ ଅପହରଣ ପରେ ହତ୍ୟା କରିଥିବା ନେଇ ଶର୍ମିଷ୍ଠା ମାନିଥିବାବେଳେ କ୍ରାଇମ୍ବ୍ରାଞ୍ଚ ଏନେଇ ଇଣ୍ଡିଆନ ଏଭିଡେନ୍ସ ଆକ୍ଟର ଦଫା ୨୭ ଅନୁଯାୟୀ ବୟାନ ରେକର୍ଡ କରିଛି। ଏପରି କି ମାନସଙ୍କୁ କିପରି ଅପହରଣ, ହତ୍ୟା କରାଗଲା ଏବଂ ମୃତଦେହ ପୋତାଗଲା ସେନେଇ ଶର୍ମିଷ୍ଠା କାନ୍ଦି କାନ୍ଦି ବଖାଣିଥିବାବେଳେ କ୍ରାଇମ୍ବ୍ରାଞ୍ଚ ପକ୍ଷରୁ ତାହାର ସିନ୍ ରିକ୍ରିଏଟ୍ କରାଯାଇଛି। ଅନ୍ୟପକ୍ଷରେ ରିମାଣ୍ଡରେ ଥିବା ଅନ୍ୟ ୩ ଅଭିଯୁକ୍ତ ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗର ପୂର୍ବତନ ନିର୍ଦ୍ଦେଶକ(ବୈଷୟିକ) ନିରଞ୍ଜନ ସେଠୀ, ଝୁନା ଭୋଇ ଏବଂ ରଞ୍ଜନ ନାୟକ ଓରଫ ରାଜଙ୍କୁ କଟକ କ୍ରାଇମ୍ବ୍ରାଞ୍ଚ ମୁଖ୍ୟାଳୟରେ ଏକାଠି ବସାଇ ୩ଜଣିଆ ଟିମ୍ ପଚରାଉଚରା କରିଥିବା ଜଣାପଡ଼ିଛି। ଶର୍ମିଷ୍ଠା ଅପରାଧର ପେଡ଼ି ଖୋଲି ଦୋଷମାନି ନେଇଥିବା କ୍ରାଇମ୍ବ୍ରାଞ୍ଚ ପକ୍ଷରୁ କୁହାଯାଇଥିବାବେଳେ ହତ୍ୟା ପଛର କାରଣ ଓ ମେମୋରି ଚିପ୍ ବିଷୟରେ ସେ କ’ଣ କହିଲେ ତାହା କ୍ରାଇମ୍ବ୍ରାଞ୍ଚ କହିନାହିଁ।
ଶର୍ମିଷ୍ଠା ଦେଇଥିବା ବୟାନ ଅନୁସାରେ ଅନ୍ୟତମ ଅଭିଯୁକ୍ତ ଝୁନା ଭୋଇ, ଭାଗ୍ୟଧର ନାୟକ, ରାଜ ଓରଫ ରଞ୍ଜନ ନାୟକ, ନିଲୁ ଓରଫ ବିବେକ ଓ ସେ ମିଶି ଗତ ଫେବୃୟାରୀ ୭ ସକାଳେ ଭଦ୍ରକ ଜିଲା ଚାନ୍ଦବାଲି ଥାନାସ୍ଥିତ ପଳାସପୁର ଗ୍ରାମରୁ ମାନସଙ୍କୁ ଅପହରଣ କରିବା ପରେ ତାଙ୍କ କାର୍ରେ ଭୁବନେଶ୍ୱର ଆଣିଥିଲେ। ସେହିଦିନ ମଧ୍ୟାହ୍ନରେ ଭୁବନେଶ୍ୱର ଏୟାରଫିଲ୍ଡ ଥାନାସ୍ଥିତ ଦୟାଲ ଆଶ୍ରମରେ ସେମାନେ ପହଞ୍ଚିଥିଲେ। ସେଠାରେ ମାନସଙ୍କୁ ନିସ୍ତୁକ ମାଡ଼ ମାରି ହତ୍ୟା କରିବା ପରେ ୮ ତାରିଖ ଅପରାହ୍ନରେ ତାଙ୍କ ମୃତଦେହକୁ ପୋତିବା ପାଇଁ ନିଜ କାର୍ରେ ନୟାଗଡ଼ ଜିଲା ରଣପୁର ଅଭିମୁଖେ ବାହାରିଥିଲେ। ଏହି ସମୟରେ ଶର୍ମିଷ୍ଠା ଓ ଝୁନା ଭୋଇ ଭୁବନେଶ୍ୱର ୟୁନିଟ-୧ ମାର୍କେଟରୁ ଝୋଟ ବ୍ୟାଗ୍, ସୁତୁଲି, ଗ୍ଲୋବ୍ସ କିଣିଥିଲେ। ରାସ୍ତାରେ ଯିବାବେଳେ ରାଜସୁନାଖଳାରୁ ଦୁହେଁ ୧୦ କେଜି ଲୁଣ କିଣିଥିଲେ। ସେଠାରେ ଭାଗ୍ୟଧର ଓ ରଞ୍ଜନ କୋଦାଳ ଓ ଗଇଁତି ମଧ୍ୟ କିଣିଥିଲେ। ତେବେ ଅଭିଯୁକ୍ତ ଭାଗ୍ୟଧରଙ୍କ ଘର ନୟାଗଡ଼ ଜିଲା ରଣପୁର ଥାନା ବଧିପାଟଣା ଗ୍ରାମରେ ହୋଇଥିବାରୁ ମାନସଙ୍କ ମୃତଦେହ ପୋତିବାକୁ ସେଠାକାର ଏକ ନିରାପଦ ସ୍ଥାନ ସେ ଦେଖାଇଥିଲେ, ଯାହାକି ବଧିପାଟଣା ଗଁାଠାରୁ ୨ କି.ମି. ଦୂର ଏକ ଜଙ୍ଗଲ ଜମି। ସେଠାରେ ସେମାନେ ୫ ଫୁଟ୍ର ଗାତ ଖୋଳି ମୃତଦେହ ପୋତିବା ପରେ ପ୍ରମାଣ ନଷ୍ଟ ପାଇଁ ମାନସଙ୍କ ଜିନିଷକୁ ନଷ୍ଟ କରିବାକୁ ଯାଜପୁର ଜିଲା ଚଣ୍ଡିଖୋଲ ଯାଇଥିଲେ।
ହତ୍ୟାକାଣ୍ଡ ସ୍ଥଳ ଦେଖାଇ କାନ୍ଦିଲେ ଶର୍ମିଷ୍ଠା
ଦୟାଲ ଆଶ୍ରମ ଉପର ମହଲାର ଏକ ରୁମ୍ରେ ମାନସଙ୍କୁ ରଖାଯାଇଥିଲା। ସେଠାରେ ହିଁ ତାଙ୍କୁ ମାଡ଼ ମାରି ମାରି ହତ୍ୟା କରାଯାଇଥିଲା। ଶର୍ମିଷ୍ଠା ଉକ୍ତ ରୁମ୍ରେ ସେଦିନର ଘଟଣାକୁ କ୍ରାଇମବ୍ରାଞ୍ଚ ଆଗରେ କହିଥିଲେ। ହେଲେ କହିଲା ବେଳେ ଶର୍ମିଷ୍ଠା ଭୋ ଭୋ ହୋଇ କାନ୍ଦି ପକାଇଥିଲେ।
ମେମୋରି ଚିପ୍କୁ ନେଇ ଫିଟୁନି ରହସ୍ୟ
ଅଭିଯୁକ୍ତମାନେ ଦୋଷ ସ୍ବୀକାର କରିଲେଣି। ହେଲେ ଯେଉଁ ମେମୋରି ଚିପ୍ ପାଇଁ ମାନସଙ୍କୁ ହତ୍ୟା କରାଯାଇଥିଲା ବୋଲି ଚର୍ଚ୍ଚା ହେଉଛି ତାହା ଏବେ ରହସ୍ୟ ଘେରରେ। ୪ ଅଭିଯୁକ୍ତଙ୍କ ରିମାଣ୍ଡର ଅବଧି ଆଉ ମାତ୍ର ଗୋଟିଏ ଦିନ ବାକି ଅଛି। କ୍ରାଇମବ୍ରାଞ୍ଚ ପକ୍ଷରୁ ଉକ୍ତ ମେମୋରି ଚିପ୍ ବିଷୟରେ କୌଣସି ସୂଚନା ଦିଆ ନ ଯିବାରୁ ପ୍ରଶ୍ନବାଚୀ ସୃଷ୍ଟି ହୋଇଛି। ମେମୋରି ଚିପ୍ ସୁରକ୍ଷିତ ଅଛି ନାହିଁ, ସେଥିରେ କେଉଁ ପ୍ରଭାବଶାଳୀଙ୍କ ଅପରାଧ ଲୁଚି ରହିଛି ତାହା ଜାଣିବାକୁ ଅନେକେ ଅପେକ୍ଷା କରିଥିବାବେଳେ କ୍ରାଇମ୍ବ୍ରାଞ୍ଚ ଚିପ୍ ବିଷୟରେ କିଛି କହୁନାହିଁ।
