ରାୟଗଡ଼ା,୩।୨(ଆଶିଷ ରଞ୍ଜନ ପଣ୍ଡା)- ରାୟଗଡ଼ା ଜିଲାରେ ଆମ୍ବ ବିକ୍ରୟ ସମସ୍ୟାକୁ କେନ୍ଦ୍ର ସରକାର ସ୍ବୀକାର କରିଥିଲେ ମଧ୍ୟ ଦାୟିତ୍ୱ ଗ୍ରହଣରୁ ଏଡାଇ ଯାଇଛନ୍ତି ବୋଲି ଅଭିଯୋଗ କରିଛନ୍ତି କୋରାପୁଟ ଏମପି ସପ୍ତଗିରି ଉଲାକା । ଏହାର ପରିଣାମ ସ୍ବରୂପ ଆଦିବାସୀ ଆମ୍ବ ଚାଷୀମାନେ ଅନିଶ୍ଚିତତା ମଧ୍ୟରେ ଅଛନ୍ତି। ରାୟଗଡ଼ା ଜିଲାର କାଶୀପୁର ବ୍ଲକର ଆମ୍ବ ଚାଷ କରୁଥିବା ଆଦିବାସୀ ଚାଷୀମାନେ ବିକ୍ରୟ ପାଇଁ ଗୁରୁତର ସମସ୍ୟାର ସମ୍ମୁଖୀନ ହେଉଥିବା ସମ୍ପର୍କିତ ପ୍ରସଙ୍ଗ ଲୋକସଭାରେ ପ୍ରଶ୍ନ ମାଧ୍ୟମରେ ଉଠାଇଥିଲେ ଏମ୍ପି ସପ୍ତଗିରି ଉଲାକା। ଶୀତଳ ଭଣ୍ଡାର ଅଭାବ, ସରକାରୀ କ୍ରୟ ବ୍ୟବସ୍ଥା ନଥିବା, ସୁଲଭ କୃଷି ସାମଗ୍ରୀ ଏବଂ ପ୍ରକ୍ରିୟାକରଣ ସୁବିଧାର ସମ୍ପୂର୍ଣ୍ଣ ଅଭାବକୁ ଉଲେଖ କରିଥିଲେ ନିଜ ପ୍ରଶ୍ନରେ । ପ୍ରତିବର୍ଷ ଆମ୍ବ ଋତୁରେ ଏହି ସମସ୍ତ ଅଭାବ ହଜାର ହଜାର ଆଦିବାସୀ ଚାଷୀଙ୍କୁ ଅସୁବିଧାରେ ପକାଇ ଅଳ୍ପ ଦରରେ ଆମ୍ବ ବିକ୍ରି କରିବାକୁ ବାଧ୍ୟ କରୁଛି ବୋଲି ଏମ୍ପି ଅଭିଯୋଗ କରିଛନ୍ତି।
ଏହାର ଉତ୍ତରରେ କେନ୍ଦ୍ର କୃଷି ମନ୍ତ୍ରଣାଳୟ ଜଣାଇଛି ଯେ, ଓ ସରକାରଙ୍କ ପକ୍ଷରୁ ଆମ୍ବ ବିକ୍ରୟ ଅସୁବିଧା ସମ୍ପର୍କରେ କୌଣସି ଆନୁଷ୍ଠାନିକ ରିପୋର୍ଟ ମିଳିନାହିଁ। ତଥାପି ରାଜ୍ୟ ସରକାର କାଶୀପୁର ବ୍ଲକରେ ଆମ୍ବ ଚାଷୀମାନେ ସମ୍ମୁଖୀନ ହେଉଥିବା ଗୁରୁତର ଲଜିଷ୍ଟିକ ଓ ଋତୁକାଳୀନ ସମସ୍ୟା ସମ୍ପର୍କରେ କେନ୍ଦ୍ରକୁ ଅବଗତ କରାଇଥିବା ଉଲେଖ କରିଛି କେନ୍ଦ୍ର କୃଷି ବିଭାଗ । ତେବେ କୃଷି ବିଭାଗର ଏହି ଉତର ଏକ ସ୍ଥାୟୀ ଶାସନଗତ ବ୍ୟବଧାନକୁ ପ୍ରକାଶ କରେ ବୋଲି ସାଂସଦ କହିଛନ୍ତି। ଯେଉଁଠାରେ ଚାଷୀମାନଙ୍କ ଯନ୍ତ୍ରଣା ନୀତିଗତ ଭାବରେ ସ୍ବୀକୃତିପ୍ରାପ୍ତ କିନ୍ତୁ ପ୍ରକ୍ରିୟାଗତ ଅବହେଳା ଯୋଗୁଁ ବାସ୍ତବ କାର୍ଯ୍ୟାନୁଷ୍ଠାନ ଗ୍ରହଣ ହୋଇପାରୁନି ବୋଲି କହିଛନ୍ତି ଏମପି ଉଲାକା । ତେଣୁ ବିକେନ୍ଦ୍ରୀକୃତ ଆମ୍ବ ପ୍ରକ୍ରିୟାକରଣ ୟୁନିଟ ଏବଂ ନିଶ୍ଚିତ ମୂଲ୍ୟ-ସମର୍ଥନ ବ୍ୟବସ୍ଥାକୁ ତୁରନ୍ତ କାର୍ଯ୍ୟକାରୀ କରିବା ଆବଶ୍ୟକ ବୋଲି ଏମ୍ପି ସପ୍ତଗିରି ଦାବି କରିଛନ୍ତି।
