ଲୋଇସିଂହା,୯।୧୦ (ଡି. ଏନ୍.ଏ): ବଲାଙ୍ଗୀର ଜିଲା ଲୋଇସିଂହା ଫରେଷ୍ଟ ରେଞ୍ଜ ଆଗଲପୁର ବ୍ଲକ ମହାକୁରପାଲି ଗାଁରେ ରବିବାର ବନ ବିଭାଗ ପକ୍ଷରୁ ଚଢ଼ାଉ ହୋଇଛି। ଏକ ୧୨ ଚକିଆ ଟ୍ରକ୍ (ସିଜି ୧୫ଏସି ୧୦୩୧)ରେ ବିପୁଳ ପରିମାଣ ଖଇର କାଠ ଛତିଶଗଡ଼ ବିଳାସପୁର ଅଞ୍ଚଳକୁ ବେଆଇନ ଚାଲାଣ ପାଇଁ ଲୋଡ ହେଉଥିବା ବେଳେ ବନ ବିଭାଗ ଚଢ଼ାଉ କରିଥିଲା। ଘଟଣାସ୍ଥଳରୁ ପ୍ରାୟ ୧୨ ଟନ୍ ଖାଇର ଗଣ୍ଡି ସହ ଟ୍ରକ୍ ଜବତ ହୋଇଛି।
ଏହି ଘଟଣାରେ ଆଗଲପୁର ବ୍ଲକ ରୋତ ପଞ୍ଚାୟତ ନୂଆଁପାଲି ଗାଁର ଜଗଦୀଶ ବାଙ୍କ, ଛତିଶଗଡ଼ ରାଜ୍ୟ ସାରଙ୍ଗଗଡ଼ ଜିଲା ସରସିଆଁ ଗ୍ରାମର ସୂର୍ଯ୍ୟ ପ୍ରକାଶ କେୱାଟଙ୍କୁ ଗିରଫ କରାଯାଇଛି। ସେମାନଙ୍କୁ କୋର୍ଟଚାଲାଣ କରାଯିବ ବୋଲି ରେଞ୍ଜ ଅଫିସର ପାଉଲ ହରପାଲ କହିଛନ୍ତି। ଜବାତ କାଠର ମୂଲ୍ୟ ଲକ୍ଷାଧିକ ଟଙ୍କା ହେବ। ନିକଟସ୍ଥ ଭାଲୁପାଲି ଗାଁର ମୁଖ୍ୟ ଅଭିଯୁକ୍ତ ସମେତ ଶ୍ରମିକମାନେ ଘଟଣାସ୍ଥଳରୁ ଫେରାର ହୋଇଯାଛନ୍ତି ବୋଲି ସଲେଭଟା ଶେକ୍ସନ ଫରେଷ୍ଟର କହିଛନ୍ତି।
