ଭଦ୍ରକ ଅଫିସ, ୫।୫: ଭଦ୍ରକ ଗ୍ରାମାଞ୍ଚଳ ଥାନା ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ୧୬ଟି ଚୋରି ବାଇକ୍ ଜବତ କରିଛି। ଏଥିସହ ଲୁଟେରା ଗ୍ୟାଙ୍ଗର ୫ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ତିହିଡ଼ି ଥାନା ଅଞ୍ଚଳର ଚନ୍ଦନ ବେହେରା, ସାବରଙ୍ଗ ଥାନା ଅଞ୍ଚଳର ନିଲୁ ଓ ଉତ୍ତମ ଜେନା, ବାଲେଶ୍ୱର ଜିଲା ରୂପ୍ସା ଥାନା ଅଞ୍ଚଳର ସୁବ୍ରତ ଗିରି ଓ ବାବୁଲା ରାଉଳ। ଏସ୍ଡିପିଓ ପ୍ରଭାସ ଚନ୍ଦ୍ର ପାଲ ବୁଧବାର ସନ୍ଧ୍ୟାରେ ଏକ ଖବରଦାତା ସମ୍ମିଳନୀରେ ଏ ନେଇ ସୂଚନା ଦେଇଛନ୍ତି।
ପ୍ରକାଶ ଯେ, ଭଦ୍ରାକାଳୀ ପୀଠରୁ ଏକ ବାଇକ୍ ଚୋରି ହୋଇଥିବା ନେଇ ଗ୍ରାମାଞ୍ଚଳ ଥାନାରେ ଏତଲା ଦିଆଯାଇଥିଲା। ପୋଲିସ ତଦନ୍ତ କରି ଚନ୍ଦନଙ୍କ ଘରୁ ଚୋରି ବାଇକ୍ ସହ ଆଉ ଦୁଇଟି ବାଇକ୍ ଜବତ କରିଥିଲା। ପରେ ଚନ୍ଦନଠାରୁ ସୂଚନା ପାଇ ନିଲୁ ଓ ଉତ୍ତମଙ୍କ ଘରେ ଚଢ଼ାଉ କରାଯାଇଥିଲା। ସେହିପରି ରୂପ୍ସା ଥାନା ଅଞ୍ଚଳର ସୁବ୍ରତ ଓ ବାବୁଲାଙ୍କୁ ପଚରାଉଚରା କରିବା ସହ ୧୩ଟି ଚୋରା ବାଇକ୍ ଜବତ କରାଯାଇଥିଲା। ଗିରଫ ୫ ଅଭିଯୁକ୍ତଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି।
