ରଘୁନାଥପୁର,୧୬।୯(ଡି.ଏନ୍.ଏ.): ରଘୁନାଥପୁର ବ୍ଲକ କେରେକେରାସ୍ଥିତ ବିଭୂତି କ୍ଷେତ୍ର ପ୍ରଭୁ ଗୋରେଖନାଥ ପୀଠକୁ ଶୁକ୍ରବାର ସହକାରୀ ଦେବୋତ୍ତର ଆୟୁକ୍ତ କଟକ, ସଞ୍ଜୟ କୁମାର ଶୁଭବ୍ରତ ଆଚାର୍ଯ୍ୟ ପରିଦର୍ଶନରେ ଆସିଥିଲେ। ଦାୟିତ୍ୱରେ ରହିବା ପରେ ଏହି ପୀଠକୁ ତାଙ୍କ ପ୍ରଥମ ଗସ୍ତ ଥିଲା। ଏହି ଅବସରରେ ସେ ସମସ୍ତ ରେକର୍ଡପତ୍ର ଯାଞ୍ଚ କରିବା ସହ ଲୋକଙ୍କ ଅଭିଯୋଗ ଶୁଣିଥିଲେ। ସେ ପ୍ରଥମେ କ୍ୟାଶ୍ବୁକ୍ ଦେଖିବା ସହ ବିଭିନ୍ନ ବ୍ୟାଙ୍କରେ ପ୍ରଭୁଙ୍କ ନାମରେ ଗଚ୍ଛିତ ଥିବା ଜମା ଅର୍ଥ, ଦାନସୂତ୍ରରେ ଆସିଥିବା ସୁନାରୁପା ଅଳଙ୍କାର, ହିସାବ ରେଜିଷ୍ଟର, ଟେଣ୍ଡର ରେଜିଷ୍ଟର, ମୁଣ୍ଡା ରସିଦ, ଲିପିବଦ୍ଧ ହୋଇ ରହିଥିବା ରେଜିଷ୍ଟର, ଅନ୍ୟାନ୍ୟ ଫାଇଲ ଏବଂ ଭାଉଚର ଆଦି ତନଖିଥିଲେ। ପୀଠରେ ଅସୁରକ୍ଷିତ ଅବସ୍ଥାରେ ଥିବା ରୋଷଘର, ଭୋଗ ଓ ଦୀପ ଦୋକାନ ଗୃହ ଦେଖିବା ସହ ଅନ୍ୟାନ୍ୟ ସମସ୍ୟା ସମ୍ପର୍କରେ ଅବଗତ ହୋଇଥିଲେ। ଗତ ଶ୍ରାବଣରେ ଲଗାଣ ବର୍ଷାରେ ଭଗ୍ନଗୃହରୁ ପାଣି ଗଳି ନିଲାମଧାରୀଙ୍କ ପ୍ରାୟ ଅଢ଼େଇ ଲକ୍ଷ ଟଙ୍କାର ଶୁଖିଲା ଭୋଗ ନଷ୍ଟ ହୋଇଯାଇଥିଲା। ଏ ସମ୍ପର୍କରେ ନିଲାମଧାରୀ ରମେଶ ଚନ୍ଦ୍ର ସାହୁ ସହକାରୀ ଆୟୁକ୍ତ ଆଚାର୍ଯ୍ୟଙ୍କୁ ଜଣାଇଥିଲେ। ସେହିପରି ପୂର୍ବରୁ ପୀଠରେ ପୂଜକଙ୍କ ଦ୍ୱାରା ପ୍ରସ୍ତୁତ ହେଉଥିବା ମାନସିକ ରୋଷେଇ ଓ ଅନ୍ନ ପ୍ରସାଦକୁ ଶ୍ରାବଣରେ ବନ୍ଦ କରିଦିଆଯାଇଥିଲା। ଦୀର୍ଘ ଦୁଇମାସ ଧରି ଏହା ବନ୍ଦ ରହିବା ଫଳରେ ପୀଠକୁ ଭକ୍ତଙ୍କ ଆଗମନ କମିଯାଇଛି। ଏହାଦ୍ୱାରା ପୂଜକ ଓ ସେବାୟତମାନେ ଅନେକମାତ୍ରାରେ ପ୍ରଭାବିତ ହୋଇଥିବା ପୂଜକ ଦିଲୀପ କୁମାର ପଣ୍ଡା କହିଥିଲେ। ଏହା ବିଚାରକୁ ନେଇ ପୀଠରେ ମାନସିକ ରୋଷେଇ ତଥା ଅନ୍ନ ପ୍ରସାଦ ପ୍ରସ୍ତୁତ ବ୍ୟବସ୍ଥା ଚାଲୁ କରିବା ପାଇଁ ଜ୍ଞାନରଞ୍ଜନ ପଣ୍ଡା ଅନୁରୋଧ କରିଛନ୍ତି। ଆଚାର୍ଯ୍ୟଙ୍କ ଏହି ଗସ୍ତ ସମୟରେ ପୀଠ କାର୍ଯ୍ୟନିିର୍ବାହୀ ଅଧିକାରୀ ଶୌର୍ଯ୍ୟରଞ୍ଜନ ପରିଜା, କିରାଣି ସରୋଜ କୁମାର ସାହାଣୀ, ଉପଦେଷ୍ଟା ସୁଶାନ୍ତ ଦାଶ, ସୁରେନ୍ଦ୍ରନାଥ ସ୍ବାଇଁ ଓ ଏଣ୍ଡାଓମେଣ୍ଟ ଇନ୍ସପେକ୍ଟର ପ୍ରଦୀପ ସାହୁ ପ୍ରମୁଖ ଉପସ୍ଥିତ ଥିଲେ।
