ପାରାଦୀପ,୧୭ା୯(ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପର ପ୍ରସିଦ୍ଧ ବିଶ୍ୱକର୍ମା ପୂଜା ମହୋତ୍ସବ ଚଳିତ ବର୍ଷ ବନ୍ଦ ରହିଲା। ୧୯୬୮ରୁ ପାଳିତ ହୋଇଆସୁଥିବା ଏହି ପୂଜା କନ୍ୟା ସଂକ୍ରାନ୍ତି ଠାରୁ ଆରମ୍ଭ ହୋଇଥାଏ। ଏନେଇ ପାରାଦୀପ ବନ୍ଦର ନଗରୀ ସପ୍ତାହବ୍ୟାପି ଉତ୍ସବ ମୁଖର ହୋଇଉଠେ। ଶନିବାର କନ୍ୟା ସଂକ୍ରାନ୍ତି ପଡୁଥିଲେ ମଧ୍ୟ ପୂଜା ଉତ୍ସବ ପାଳନ ହେଉନାହିଁ। ଏଥିପାଇଁ ସହରରେ ଏବେ ନୀରବତା ଦେଖିବାକୁ ମିଳିଛି। ପୂଜା ଅଞ୍ଚଳ ବ୍ୟାଙ୍କ ଲେନ ଛକରେ ଏବେ ବାହାର ରାଜ୍ୟର ପ୍ଲାଷ୍ଟିକ ଫୁଲ ବେପାରୀ ନିରାଶ ହୋଇଛନ୍ତି। କାରଣ ସେମାନେ ପ୍ରତିବର୍ଷ ବିଶ୍ୱକର୍ମା ପୂଜା ପୂର୍ବରୁ ଫୁଲ ନେଇ ଆସିଥାନ୍ତି। ଏହି ସମୟରେ ସେମାନଙ୍କର ଭଲ ବେପାର ହୋଇଥାଏ। ପାରାଦୀପର ଅଧିକାଂଶ ଗାଡି ମାଲିକ ଓ ଲେଦ ଗୁଡିକ ଏହି କନ୍ୟା ସଂକ୍ରାନ୍ତି ରେ ପୂଜା କରିଥାନ୍ତି। ସେଥିପାଇଁ ଏହି ପ୍ଲାଷ୍ଟିକ ଫୁଲ ଅଧିକ ବିକ୍ରି ହୋଇଥାଏ। ଏସମ୍ପର୍କରେ ପ୍ଲାଷ୍ଟିକ ଫୁଲ ବ୍ୟବସାୟୀ ତପନ କୁମାର କୁହନ୍ତି, ପ୍ଲାଷ୍ଟିକ ଫୁଲ ବ୍ୟବସାୟ ପାଇଁ ଆମେ ଏହି ସମୟରେ ପାରାଦୀପ ଆସୁ। ଏନେଇ ଏଠାକୁ ଆସିଥିଲୁ । ମାତ୍ର ପହଞ୍ଚତ୍ବା ପରେ ପୂଜା ହେଉ ନ ଥିବା ଜଣାପଡ଼ିଛି। ଏହା ଆମକୁ ନିରାଶ କରିଛି।
ସୂଚନାଯୋଗ୍ୟ, କୋଭିଡ କଟକଣା ପାଇଁ ଦୁଇବର୍ଷ ହେବ ପୂଜା ବନ୍ଦ ରହିଥିଲା।ଚଳିତ ବର୍ଷ ଅନେକ ସ୍ଥାନରେ ପୂର୍ବଭଳି ମହୋତ୍ସବ ପାଳନ ହେଲାଣି।କିନ୍ତୁ ପାରାଦୀପର ବିଶ୍ୱକର୍ମା ପୂଜା ବନ୍ଦ ହେବା ଘଟଣାର ଆୟୋଜକ ଓ ପ୍ରଶାସକ ପରସ୍ପରକୁ ଦୋଷାରୋପ କରୁଛନ୍ତି। ଏହି ପୂଜାର ପ୍ରମୁଖ ଆୟୋଜକ ଡମ୍ପର ମାଲିକସଂଘ ସଭାପତି ବିଜୟ କୁମାର ନାୟକ କୁହନ୍ତି, ଆମକୁ ପ୍ରଥମେ ପୋର୍ଟ ଅଥରିଟି ଚିଠି କରି ଡକାଇଥାନ୍ତି। ସେଠାରେ ପୂଜା ପାଇଁ ପ୍ରସ୍ତୁତି ବୈଠକ ହୋଇଥାଏ। ତା’ପରେ ଜାଗା ପାଇଁ ଅର୍ଥ ଜମା କରିବା ପରେ ମଣ୍ଡପ ଚିହ୍ନଟ ହୋଇଥାଏ। ପୂଜାର ସପ୍ତାହ ପୂର୍ବରୁ ଜିଲା ପ୍ରଶାସନ ଆଇନଶୃଙ୍ଖଳା ବୈଠକ କରିଥାନ୍ତି। ଏ ବର୍ଷ ପୋର୍ଟ ଅଥରିଟି ଆମକୁ ଡାକିଲେ ନାହିଁ। ସେଥିପାଇଁ ଆମେ ପୂଜା କରିଲୁ ନାହିଁ। ସମାନ କଥା ପ୍ରାୟ ଆଉ କିଛି ପୂଜାଆୟୋଜକ କମିଟି ପକ୍ଷରୁ କୁହାଯାଇଛି। ଏ ସମ୍ପର୍କରେ ବନ୍ଦର ପ୍ରଶାସନ ପକ୍ଷରୁ କୁହାଯାଇଛି, ଆମକୁ କେହି ପୂଜା କରିବା ପାଇଁ ଆବେଦନ କରିନାହାଁନ୍ତି । ପାରାଦୀପର ପ୍ରମୁଖ ପୂଜା କମିଟି କହିଲେ ୩ ଟ୍ରକ ମାଲିକ ସଂଘ, ୨ ଡମ୍ଫର ମାଲିକସଂଘ, ଓମ୍ଫା, ପାରାଦୀପ ବନ୍ଦର ଜନସ୍ବାସ୍ଥ୍ୟ ବିଭାଗ, ବିଦ୍ୟୁତ ବିଭାଗ, ମେରାଇନ ବିଭାଗ, ୬ଟି ୟୁନିୟନ, ଅଟୋରିକ୍ସା ସଂଘ ଓ ଅନ୍ୟ କିଛି ସଙ୍ଗଠନକୁ ବୁଝାଏ। କରୋନା ମହାମାରୀ ପରେ ଅଧିକାଂଶ ସଙ୍ଗଠନ ଦେବାଳିଆ ପରିସ୍ଥିତିରେ ଗତି କରୁଛନ୍ତି। ପୂଜା ନ ହେବା ମଧ୍ୟ କିଛି କମିଟିକୁ ସୁହାଇଛି ବୋଲି ଜଣେ ଶ୍ରମିକନେତା ବିଭୁତି ମହାରଣା କୁହନ୍ତି। ଏମିତି ଛକାପଞ୍ଝା ମଧ୍ୟରେ ପୂଜା ବନ୍ଦ ହୋଇ ଯାଇଛି।ଆଗାମି ବର୍ଷରେ ପୁଣି ଏହି ପୂଜା ହେବ କି ନାହିଁ ସେନଇ ଏବେଠାରୁ ସଂଶୟ ସୃଷ୍ଟି ହେଲାଣି।
