ରାୟଗଡ଼ା,୧୨।୧୦ (ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲାରେ ସ୍କୁଟର ଯୋଜନାରେ ମହିଳା ସ୍ବୟଂ ସହାୟକ ଗୋଷ୍ଠୀକୁ ସ୍କୁଟି ବଣ୍ଟନ କରାଯାଇଛି । ତେବେ ଯୋଜନାରେ ଆରମ୍ଭରୁ ଠକେଇ ହୋଇଥିବା ଦେଖିବାକୁ ମିଳିଛି । ଜିଲା ସଦର ମହକୁମାରେ ବଣ୍ଟନ ହୋଇଥିବା ସ୍କୁଟି ମଧ୍ୟରୁ ୯ଟି ସ୍କୁଟିରେ ନମ୍ବର ପ୍ଲେଟ ଲାଗି ନ ଥିବା ଦେଖିବାକୁ ମିଳିଛି। ପରିବହନ ବିଭାଗ ନିୟମାନୁଯାୟୀ ବିନା ପଞ୍ଜୀକରଣରେ ଗାଡ଼ି ଶୋରୁମ୍ ବାହାରକୁ ବାହାର କରିବା ନିୟମ ନ ଥିବା ବେଳେ ଏହି ୯ଟି ଗାଡ଼ି କିଭଳି ବାହାରିଲା ତାହା ପ୍ରଶ୍ନବାଚୀ ସୃଷ୍ଟି କରିଛି । ଏଭଳିକି ଗାଡ଼ି ସହିତ ପ୍ରଦାନ କରାଯାଉଥିବା ମାଗଣା ହେଲମେଟ ମଧ୍ୟ ହିତାଧିକାରୀଙ୍କୁ ମିଳି ନ ଥିଲା । ତେବେ ବିନା ନମ୍ବର ପ୍ଲେଟରେ ଗାଡ଼ି କିଭଳି ଶୋରୁମ୍ ବାହାରକୁ ଆସିଲା ତାହା ତଦନ୍ତ ସାପେକ୍ଷ । ଏନେଇ ମିଶନ ଶକ୍ତି ଡିପିଏ ନରେଶଙ୍କୁ ପଚାରିବାରୁ ନମ୍ବର ପ୍ଲେଟ ଆବେଦନ ହୋଇଛି । ଏହା ଆସିବାକୁ ଏକ ସପ୍ତାହରୁ ଊର୍ଦ୍ଧ୍ୱ ସମୟ ଲାଗେ ବୋଲି କହିଛନ୍ତି । ଆଜି ଯୋଜନା ଶୁଭାରମ୍ଭ ପାଇଁ ଗାଡ଼ି ଆଣି ପୁଣି ଥରେ ଶୋରୁମକୁ ହସ୍ତାନ୍ତର କରି ଦିଆଯାଇଛି ଏବଂ ନମ୍ବର ପ୍ଲେଟ ଲାଗିବା ପରେ ହିତାଧିକାରୀଙ୍କୁ ପ୍ରଦାନ କରାଯିବ ବୋଲି ଡିପିଏ ନରେଶ ସୂଚନା ଦେଇଛନ୍ତି ।
