ଭୁବନେଶ୍ୱର,୨୪।୭(ବ୍ୟୁରୋ): ରାଜ୍ୟ ସରକାରଙ୍କ ସ୍କୁଲ ଓ ଗଣଶିକ୍ଷା ବିଭାଗ ବର୍ତ୍ତମାନ ଦଶମ ଏବଂ ଦ୍ୱାଦଶ ଶ୍ରେଣୀର ଖାତା ମୂଲ୍ୟାୟନ ବ୍ୟବସ୍ଥାକୁ ନେଇ ଚିନ୍ତାରେ ପଡିଯାଇଛି। ସିବିଏସ୍ଇ ପକ୍ଷରୁ ଦଶମ ଏବଂ ଦ୍ୱାଦଶ ଶ୍ରେଣୀ ପିଲାଙ୍କ ଫଳ ପ୍ରକାଶ ପାଇସାରିଛି। ବର୍ତ୍ତମାନ ଗଣଶିକ୍ଷା ବିଭାଗ ଏନେଇ ଚିନ୍ତା କରୁଛି। ତଥାପି ଅଗଷ୍ଟ ୧୫ ସୁଦ୍ଧା ଯୁକ୍ତ୨ ବାଣିଜ୍ୟ ଓ ବିଜ୍ଞାନ ପରୀକ୍ଷା ଫଳ ପ୍ରକାଶ କରାଯିବ ବୋଲି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜାନ ଦାଶ ସୂଚନା ଦେଇଛନ୍ତି।
କରୋନା ଯୋଗୁ ଛାତ୍ରୀଛାତ୍ରଙ୍କ ଖାତା ମୂଲ୍ୟାୟନରେ ବାଧା ସୃଷ୍ଟି ହୋଇଛି। ତଥାପି ମଝିରେ ଖାତା ଦେବା ନେଇ ଆବଶ୍ୟକ ଥିବା ଅନୁମତି ଗୁରୁବାର ମିଳିଯାଇଛି। ଏଥର ଖାତା ଦେଖା କାର୍ଯ୍ୟକ୍ରମ ସ୍ବଭାବିକ ହେବ। ନିକଟରେ ରାଜ୍ୟ ସରକାର କରୋନା ସଂକ୍ରମଣକୁ ଦୃଷ୍ଟିରେ ରଖି ୪ ଜିଲା ଖୋର୍ଦ୍ଧା, କଟକ, ଯାଜପୁର ଏବଂ ଗଞ୍ଜାମ ସହିତ ରାଉରକେଲା ମହାନଗର ନିଗମକୁ ଶଟ୍ଡାଉନ ଘୋଷଣା କରିଥିଲେ। ଫଳରେ ଏହିସବୁ ଅଞ୍ଚଳଗୁଡିକରେ ଖାତା ଦେଖା ବନ୍ଦ ରହିଥିଲା। ଉକ୍ତ ଜିଲାଗୁଡିକରେ ଖାତା ଦେଖା ନେଇ ଅନୁମତି ଲୋଡାଯାଇଥିଲା। ଏହି ସମସ୍ତ ଅଞ୍ଚଳରେ ମୋଟ ୩୫ ମୂଲ୍ୟାୟନ କେନ୍ଦ୍ର ରହିଥିବା ବେଳେ ଏସବୁଠାରେ ଖାତା ଦେଖା ଚାଲିବ। ବିଭାଗ ପକ୍ଷରୁ ଉଚ୍ଚଶିକ୍ଷା ମାଧ୍ୟମିକ ପରିଷଦକୁ ଏନେଇ ଅବଗତ କରାଯାଇଥିବା ମନ୍ତ୍ରୀ ଦାଶ କହିଛନ୍ତି। ଫଳରେ ମୂଲ୍ୟାୟନରେ ଯେପରି ବିଳମ୍ବ ନ ହେବ ସେଥିଲାଗି ସରକାର ନିର୍ଦ୍ଦେଶ ଦେଇଛନ୍ତି। କୋଭିଡ ଗାଇଡଲାଇନ ପାଳନ କରି ମୂଲ୍ୟାୟନ ଚାଲିବ। ମନ୍ତ୍ରୀ ଦାଶ ଆହୁରି କହିଛନ୍ତି, ବ୍ରହ୍ମପୁର ଏବଂ ରାଉରକେଲାରେ ଖାତା ଦେଖା ନେଇ ସମସ୍ୟା ରହିଥିଲା। ଯାହା ଏବେ ଆଉ ରହିବ ନାହିଁ। ପ୍ରଥମ ପର୍ଯ୍ୟାୟରେ ବିଜ୍ଞାନ ଏବଂ ବାଣିଜ୍ୟ ବିଭାଗ ପିଲାମାନଙ୍କ ଖାତା ଦେଖା ସରିଯିବ। ଏହାପରେ କଳା ବିଭାଗ ଛାତ୍ରୀଛାତ୍ରଙ୍କ ଫଳ ପ୍ରକାଶ ପାଇବ।
