ଲିଓନେଲ ସ୍କାଲୋନିଙ୍କ ଆର୍ଜେଣ୍ଟିନା ଏକ ବଡ଼ ବିଜୟ ସହ କାତାର ଫୁଟ୍ବଲ ବିଶ୍ୱକପ୍ କ୍ୱାର୍ଟରଫାଇନାଲରେ ପ୍ରବେଶ କରିଛି। ବର୍ତ୍ତମାନ ସେମାନେ ଲୋଇସ୍ ଭାନ୍ ଗାଲ୍ (ନେଦରଲାଣ୍ଡ୍ସ କୋଚ୍)ଙ୍କ ଦଳ ସହିତ ମୁକାବିଲା କରିବେ। ଏହି ମ୍ୟାଚ ଲୁସେଲ ଷ୍ଟାଡିୟମରେ ଖେଳାଯିବ, ଯେଉଁଠାରେ ଲିଓନେଲ ମେସି ଓ ତାଙ୍କ ଦଳ ପ୍ରଥମ ଦୁଇ ଗ୍ରୁପ୍ ଷ୍ଟେଜ୍ ମ୍ୟାଚ ଖେଳିଥିଲା। ଦଳ ସାଉଦି ଆରବ ବିପକ୍ଷ ମ୍ୟାଚରେ ହାରିଯିବା ପରେ ମେକ୍ସିକୋକୁ ପରାସ୍ତ କରିଥିଲା। ଆର୍ଜେଣ୍ଟିନା ଜାତୀୟ ଦଳ କୋଚ୍ ସ୍କାଲୋନି ଦଳର ପ୍ରଦର୍ଶନରେ ଉନ୍ନତି ଆଣିବା ପରିପ୍ରେକ୍ଷୀରେ ଦଳର ଫରମେଶନରେ ପରିବର୍ତ୍ତନ ଲାଗି କଠୋର ନିଷ୍ପତ୍ତି ନେଇଥିଲେ। ଆରବ ବିପକ୍ଷ ମ୍ୟାଚ ପରେ ସେ ମେକ୍ସିକୋ ବିପକ୍ଷ ମ୍ୟାଚରେ ତାଙ୍କ ଫରମେଶନରେ ୫ ପରିବର୍ତ୍ତନ କରାଇଥିଲେ। ପରେ ପୋଲାଣ୍ଡ ବିପକ୍ଷ ମ୍ୟାଚରେ ୪ ପରିବର୍ତ୍ତନ କରିଥିଲେ। ଅଷ୍ଟ୍ରେଲିଆ ବିପକ୍ଷରେ ମଧ୍ୟ ସେ ଏହି ସମାନ ଫର୍ମେଶନରେ ଖେଳିବା ଲାଗି ସ୍ଥିର କରିଥିଲେ। ମାତ୍ର ଡି’ ମାରିଆଙ୍କ ଇଞ୍ଜୁରି ପରେ ସେ ପପୁ ଗୋମେଜ୍ଙ୍କୁ ଦଳରେ ନେଇଥିଲେ। ପରିସ୍ଥିତିକୁ ଚାହିଁ ଖେଳର ଷ୍ଟାଇଲ ପରିବର୍ତ୍ତନ କରି ମ୍ୟାଚ ଜିତିବା ଆର୍ଜେଣ୍ଟିନାର ମୂଳ ଲକ୍ଷ୍ୟ। ଅନ୍ୟପକ୍ଷରେ କୋଚ୍ ଲୋଇସ୍ ଭାନ୍ ଗାଲ୍ଙ୍କ ଅଧୀନରେ ନେଦରଲାଣ୍ଡ୍ସ ବିଶ୍ୱକପ୍ରେ ଏପର୍ଯ୍ୟନ୍ତ ଅପରାଜିତ ରହିଥିବା ୪ଟି ଦଳ ମଧ୍ୟରେ ଅନ୍ୟତମ। ଅନ୍ୟ ଦଳଗୁଡ଼ିକ ହେଲା ଇଂଲଣ୍ଡ, ମରକ୍କୋ ଓ କ୍ରୋଏସିଆ। ରୁଷିଆ ୨୦୧୮ ସଂସ୍କରଣ ଖେଳିସାରିବା ପରେ ନେଦରଲାଣ୍ଡ୍ସ ଚଳିତ ବିଶ୍ୱକପ୍କୁ ଏକ ନୂଆ ଦଳ ନେଇ କରି ଆସିଛି। ବିଶ୍ୱକପ୍ ଧରି ଦଳ ଫେରିବ ବୋଲି ମନସ୍ଥ କରିଛି। କ୍ୱାର୍ଟରଫାଇନାଲରେ ଲୋକେ ଫ୍ରାନ୍ସ ଓ ଇଂଲଣ୍ଡ ମଧ୍ୟରେ ଏକ ହାଇ ଭୋଲ୍ଟେଜ ମୁକାବିଲା ଦେଖିବାକୁ ପାଇବେ। ବିଶ୍ୱକପ୍ ନକ୍ଆଉଟ ପର୍ଯ୍ୟାୟରେ ଦୁଇ ଦଳ ପ୍ରଥମ ଥର ମୁହଁାମୁହିଁ ହେବାକୁ ଯାଉଛନ୍ତି। ଏହି ଦୁଇଦଳ ଗ୍ରୁପ ପର୍ଯ୍ୟାୟରେ ପରସ୍ପରକୁ ଭେଟିଛନ୍ତି। ୧୯୬୬ ବିଶ୍ୱକପ୍ରେ ଇଂଲଣ୍ଡ ୨-୦ ଏବଂ ୧୯୮୨ ବିଶ୍ୱକପ୍ରେ ୩-୧ ଗୋଲ୍ରେ ବିଜୟ ଲାଭ କରିଥିଲା। ପୋଲାଣ୍ଡକୁ ୩-୧ ଗୋଲ୍ରେ ପରାସ୍ତ କରି ଫ୍ରାନ୍ସ କ୍ୱାର୍ଟରଫାଇନାଲରେ ପ୍ରବେଶ କରିଛି। ଡିଡିଏର ଡେସଚାମ୍ପଙ୍କ ନେତୃତ୍ୱରେ ଏହି ଦଳକୁ ଚଳିତ ବିଶ୍ୱକପ୍ର ସବୁଠାରୁ ଶକ୍ତିଶାଳୀ ଦଳ ବିବେଚନା କରାଯାଉଛି। କିଲିଆନ ଏମ୍ବାପେ ହେଉଛନ୍ତି ଦଳର ପ୍ରମୁଖ ଖେଳାଳି। ଅନ୍ୟପକ୍ଷରେ ସେନେଗାଲ ବିପକ୍ଷ ମ୍ୟାଚ ୩-୦ ଗୋଲ୍ରେ ଜିତି ଇଂଲଣ୍ଡ କ୍ୱାର୍ଟରଫାଇନାଲକୁ ଉନ୍ନୀତ ହୋଇଛି। ଏହି ବିଜୟ ସହ ଦଳ ଚଳିତ ବିଶ୍ୱକପ୍ର ଅନ୍ୟତମ ଟାଇଟଲ ଦାବିଦାର ଭାବେ ଉଭା ହୋଇଛି।
-(ଚିଭାକ ସ୍ପୋଟର୍ସ)
