ନୂଆଦିଲ୍ଲୀ,୨୭।୫: ମାତ୍ର ୪୦୦ ଟଙ୍କାର ଏକ ବିବାଦ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (SBI) ପାଇଁ ବଡ଼ ଅସୁବିଧା ସୃଷ୍ଟି କରିଛି। ଗ୍ରାହକଙ୍କ ଅଭିଯୋଗକୁ ବର୍ଷ ବର୍ଷ ଧରି ଅଣଦେଖା କରିବା ଏବଂ ତାଙ୍କୁ ଆଇନଗତ ଲଢ଼େଇ ପାଇଁ ବାଧ୍ୟ କରିବା ଯୋଗୁଁ ମହାରାଷ୍ଟ୍ର ରାଜ୍ୟ ଗ୍ରାହକ ବିବାଦ ସମାଧାନ ଆୟୋଗ (SCDRC) ଏସବିଆଇ ଉପରେ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। କୋର୍ଟ ବ୍ୟାଙ୍କର ଆପତ୍ତିକୁ ଖାରଜ କରି ଗ୍ରାହକଙ୍କୁ ମୋଟ ୫୮,୭୦୦ ଟଙ୍କାର କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି।
ଜଣେ ଗ୍ରାହକ ଏଟିଏମରୁ ୧,୫୦୦ ଟଙ୍କା ଉଠାଇବାକୁ ଚେଷ୍ଟା କରିଥିଲେ, କିନ୍ତୁ ମେସିନରୁ ମାତ୍ର ୧,୧୦୦ ଟଙ୍କା ବାହାରିଥିଲା। ଅର୍ଥାତ ୪୦୦ ଟଙ୍କା କମ ମିଳିଥିଲା। ଗ୍ରାହକ ଜଣକ ଏ ସମ୍ପର୍କରେ ବ୍ୟାଙ୍କର କଷ୍ଟମର କେୟାର, ନୋଡାଲ ଅଫିସର ଏବଂ ବ୍ୟାଙ୍କିଙ୍ଗ ଓମ୍ୱୁଡ୍ସମ୍ୟାନ (ଲୋକପାଳ)ଙ୍କ ନିକଟରେ ବାରମ୍ୱାର ଗୁହାରି କରିଥିଲେ ମଧ୍ୟ ବ୍ୟାଙ୍କ ପକ୍ଷରୁ କୌଣସି ସମାଧାନ କରାଯାଇ ନଥିଲା। ଏହାପରେ ସେ ଗ୍ରାହକ ଅଦାଲତର ଦ୍ୱାରସ୍ଥ ହୋଇଥିଲେ।
ଭାରତୀୟ ରିଜର୍ଭ ବ୍ୟାଙ୍କ (RBI) ର ନିୟମ ଅନୁଯାୟୀ, ଯଦି ଏଟିଏମରୁ ଟଙ୍କା ଉଠାଇବା ସମୟରେ କୌଣସି ବିଫଳତା (failed transaction) ହୁଏ, ତେବେ ବ୍ୟାଙ୍କକୁ ୭ଟି କାର୍ଯ୍ୟଦିବସ ମଧ୍ୟରେ ଏହାର ସମାଧାନ କରିବାକୁ ପଡ଼ିବ। ଯଦି ବ୍ୟାଙ୍କ ର୍ନିଦ୍ଧାରିତ ସମୟ ମଧ୍ୟରେ ସମାଧାନ ନକରେ, ତେବେ ବିଳମ୍ୱ ହେଉଥିବା ପ୍ରତିଦିନ ପାଇଁ ଗ୍ରାହକଙ୍କୁ ୧୦୦ ଟଙ୍କା ହିସାବରେ ଜରିମାନା (କ୍ଷତିପୂରଣ) ଦେବାକୁ ହେବ।
ଏହି ମାମଲାରେ ୪୭୭ ଦିନର ବିଳମ୍ୱ ପାଇଁ ଜିଲ୍ଲା ଗ୍ରାହକ ଅଦାଲତ ପୂର୍ୱରୁ ବ୍ୟାଙ୍କକୁ ୪୭,୭୦୦ ଟଙ୍କା ଜରିମାନା ସହ ୧,୦୦୦ ଟଙ୍କା କୋର୍ଟ ଖର୍ଚ୍ଚ ଦେବାକୁ କହିଥିଲେ। ଏହା ବିରୋଧରେ ଏସବିଆଇ ରାଜ୍ୟ କୋର୍ଟରେ ଆପିଲ କରିବାରୁ ରାଜ୍ୟ ଆୟୋଗ ବ୍ୟାଙ୍କର ଆପିଲକୁ ଖାରଜ କରିବା ସହ ଅତିରିକ୍ତ ୧୦,୦୦୦ ଟଙ୍କା ଜରିମାନା ଲଗାଇଛନ୍ତି। ଫଳରେ ମୋଟ ଜରିମାନା ରାଶି ୫୮,୭୦୦ ଟଙ୍କାକୁ ବୃଦ୍ଧି ପାଇଛି।
ଏଟିଏମରୁ ଟଙ୍କା ନ ବାହାରିଲେ କିମ୍ୱା ଆକାଉଣ୍ଟରୁ ଟଙ୍କା କଟିଗଲେ ବିଳମ୍ୱ ନକରି ନିଜ ବ୍ୟାଙ୍କ ଶାଖା କିମ୍ୱା କଷ୍ଟମର କେୟାର ନମ୍ୱରରେ ଅଭିଯୋଗ କରନ୍ତୁ। ଏଟିଏମରୁ ବାହାରିଥିବା ଟ୍ରାଞ୍ଜାକ୍ସନ ରସିଦ ସୁରକ୍ଷିତ ରଖନ୍ତୁ। ଯଦି ରସିଦ ବାହାରି ନଥାଏ, ତେବେ ମୋବାଇଲକୁ ଆସିଥିବା ଏସଏମଏସ (SMS) କିମ୍ୱା ମିନି-ଷ୍ଟେଟମେଣ୍ଟକୁ ପ୍ରମାଣ ଭାବେ ବ୍ୟବହାର କରନ୍ତୁ।
ଅଭିଯୋଗ କରିବା ସମୟରେ ଏଟିଏମ ଆଇଡି, ସମୟ, ସ୍ଥାନ ଏବଂ ଟ୍ରାଞ୍ଜାକ୍ସନ ନମ୍ୱର ନିଶ୍ଚିତ ଭାବେ ଜଣାନ୍ତୁ। ଆରବିଆଇ ନିୟମ ଅନୁସାରେ ବ୍ୟାଙ୍କକୁ ୭ ଦିନ ମଧ୍ୟରେ ଆପଣଙ୍କ ଟଙ୍କା ଫେରସ୍ତ କରିବାକୁ ହେବ। ଯଦି ୭ ଦିନ ମଧ୍ୟରେ ବ୍ୟାଙ୍କ ଟଙ୍କା ଫେରସ୍ତ ନକରେ, ତେବେ ୮ମ ଦିନରୁ ପ୍ରତିଦିନ ପାଇଁ ବ୍ୟାଙ୍କ ଆପଣଙ୍କୁ ୧୦ ୦ ଟଙ୍କା ଲେଖାଏଁ କ୍ଷତିପୂରଣ ଦେବାକୁ ବାଧ୍ୟ।
