କୈଶୋରାବସ୍ଥା ବା ଯୁବାବସ୍ଥାକୁ ଅନେକେ ମଜାମସ୍ତିରେ ବିତାଇବାକୁ ପସନ୍ଦ କରନ୍ତି। ଆଉ ଏଥିପାଇଁ ଆଗ-ପଛ ବିଚାର ନ କରି ନିଜର ସମସ୍ତ ଆୟକୁ ମଧ୍ୟ ବ୍ୟୟ କରିବାକୁ ପଛାନ୍ତି ନାହିଁ। ବର୍ତ୍ତମାନର ଏହି ଖୁସି ଆଳରେ ଯେ ସେମାନେ ନିଜ ଭବିଷ୍ୟତ ପ୍ରତି ଅଣଦେଖା କରିବସନ୍ତି ସେ ଦିଗରେ ଅବଗତ ନ ଥା’ନ୍ତି। ହେଲେ ସୁଖମୟ ବର୍ତ୍ତମାନ ସହିତ ଏକ ସମୃଦ୍ଧ ଭବିଷ୍ୟତ ଲାଗି ଯୁବାବସ୍ଥାରୁ ହିଁ ସଞ୍ଚୟ ଆରମ୍ଭ କରିବା ବୁଦ୍ଧିମତ୍ତାର କାର୍ଯ୍ୟ….
ଯୋଜନା କରନ୍ତୁ: ଭବିଷ୍ୟତ ପାଇଁ ଲକ୍ଷ୍ୟ ରଖିଲେ ସଞ୍ଚୟ କରିବାକୁ ଆଗ୍ରହ ସୃଷ୍ଟି ହୋଇଥାଏ। ତେଣୁ ପ୍ରଥମେ ମନରେ ଏକ ଲକ୍ଷ୍ୟ ରଖି କ’ଣ ପାଇଁ ସଞ୍ଚୟ କରିବାକୁ ଚାହୁଁଛନ୍ତି ସ୍ଥିର କରନ୍ତୁ।
ବଜେଟ ପ୍ରସ୍ତୁତ କରନ୍ତୁ: ସଞ୍ଚୟ କରିବାକୁ ହେଲେ ବଜେଟ ସ୍ଥିର କରିବା ସବୁଠୁ ଗୁରୁତ୍ବପୂର୍ଣ୍ଣ। କିନ୍ତୁ ଏହି ବଜେଟ ଏପରି ହେବା ଦରକାର, ଯେଉଁଥିରେ ବ୍ୟୟ ସବୁବେଳେ ନିଜର ଆୟକୁ ଧ୍ୟାନରେ ରଖି ହେଉଥିବ। ଅନେକ ସମୟରେ ଦେଖାଯାଏ, ଯୁବପିଢ଼ି ଅନ୍ୟକୁ ଦେଖି କିମ୍ବା ବିଜ୍ଞାପନ ଦ୍ବାରା ପ୍ରଭାବିତ ହୋଇ ଆବଶ୍ୟକତାଠାରୁ ଅଧିକ ଖର୍ଚ୍ଚ କରି ବସନ୍ତି। ହେଲେ ଏହା ପ୍ରକୃତରେ କେତେ ଆବଶ୍ୟକ ବିଚାର କରନ୍ତୁ, ନିଜ ବଜେଟ ଭିତରେ ଏହାକୁ ସୀମିତ ରଖିବାକୁ ଚେଷ୍ଟା କରନ୍ତୁ ଏବଂ ବଳକା ଟଙ୍କାକୁ ଭବିଷ୍ୟତ ଲାଗି ସଞ୍ଚୟ କରନ୍ତୁ।
ମାନସିକତାରେ ପରିବର୍ତ୍ତନ ଆବଶ୍ୟକ: ଅଧିକାଂଶ ଯୁବପିଢ଼ି ଭାବନ୍ତି ସଞ୍ଚୟ କରିବା ଦ୍ବାରା ନିଜ ଇଚ୍ଛା ଏବଂ ଆବଶ୍ୟକତା ଅପୂରଣୀୟ ରହିଥାଏ। ହେଲେ ଏହା ସମ୍ପୂର୍ଣ୍ଣ ଠିକ୍ ନୁହେଁ। ତେଣୁ ଛାତ୍ରୀଛାତ୍ର ହୋଇଥିଲେ ପକେଟ୍ ମନିରୁ ବି କିଛି ଖର୍ଚ୍ଚ କାଟ କରି ସଞ୍ଚୟ କରିପାରିବେ। ରୋଜଗାରକ୍ଷମ ହୋଇଥିଲେ ସଞ୍ଚୟ କରିବା ଲାଗି ସର୍ବପ୍ରଥମେ ଏକ ତାଲିକା ପ୍ରସ୍ତୁତ କରି ନିଜ ମାସିକ ଖର୍ଚ୍ଚ ଆକଳନ କରିବା ପରେ ଆନୁମାନିକ ବଳକା ଅର୍ଥକୁ ପ୍ରଥମେ ସଞ୍ଚୟ କରିବାକୁ ଚେଷ୍ଟା କରନ୍ତୁ। ମନେରଖନ୍ତୁ, ଖର୍ଚ୍ଚ କରିବା ପରେ ଯାହା ଟଙ୍କା ବଳୁଛି ସଞ୍ଚୟ ନ କରି ପ୍ରଥମେ କେତେ ଟଙ୍କା ସଞ୍ଚୟ କରିବେ ତାହା ସ୍ଥିର କରିବା ପରେ ବଳକା ଟଙ୍କାକୁ ଖର୍ଚ୍ଚ କରିବା ହିଁ ବୁଦ୍ଧିମତ୍ତାର କାମ।
ଠିକ୍ ଭାବେ ସଞ୍ଚୟ ଗୁରୁତ୍ୱପୂର୍ଣ୍ଣ: ସଞ୍ଚତ୍ତ ଅର୍ଥକୁ ଘରେ ନ ରଖି ବ୍ୟାଙ୍କ୍, ପୋଷ୍ଟ ଅଫିସ୍ ଆଦିରେ ଜମାରଖିଲେ ସୁଧ ମଧ୍ୟ ପାଇପାରିବେ। ଏଥିପାଇଁ ବର୍ଷକୁ ଥରେ କିମ୍ବା ଦୁଇଥର ଟଙ୍କା ନ ରଖି ପ୍ରତିମାସରେ ଅଳ୍ପ ଅଳ୍ପ ଟଙ୍କା ଆର୍ଡି (ରିକରିଂ ଡିପୋଜିଟ୍) ଆକାରରେ ଜମା କରିବା ସହଜ ହେବ। ଅଧିକ ଦିନ ଯାଏ ରଖିବାକୁ ଚାହୁଁଥିଲେ ଏଫ୍ଡି କିମ୍ବା ଅନ୍ୟାନ୍ୟ ଡିପୋଜିଟ୍ ପ୍ଲାନ୍, ପେନ୍ସନ୍ ପ୍ଲାନ୍ ଆଦି ମଧ୍ୟ ଏକ ଭଲ ଉପାୟ। ଆପଣ ଚାହିଁଲେ ଶେୟାର ମାର୍କେଟ, ରିୟଲ ଇଷ୍ଟେଟ୍, ମ୍ୟୁଚୁଆଲ ଫଣ୍ଡ ଭଳି ସଂସ୍ଥାରେ ବି ଟଙ୍କା ଇନ୍ଭେଷ୍ଟ କରିପାରିବେ। ହେଲେ ଅଧିକ ରିଟର୍ନ ପାଇବା ଆଶାରେ ଏଥିରେ ଟଙ୍କା ନିବେଶ କରୁଥିଲେ ସତର୍କ ରୁହନ୍ତୁ ଏବଂ କୌଣସି ଏକ୍ସପର୍ଟଙ୍କ ପରାମର୍ଶ ନିଅନ୍ତୁ।
ରାକ୍ଷୀରାଣୀ ତରାଇ (ଯାଜପୁର)- ଏବେ ଘରେ ରହି ପାଖ ବଜାରକୁ କମ୍ପ୍ୟୁଟର ଶିଖିବାକୁ ଯାଉଛି। ପ୍ରତିଦିନ ମମି କିଛି କିଛି ହାତ ଖର୍ଚ୍ଚ ପାଇଁ ଦିଅନ୍ତି। ହେଲେ, ସେଥିରୁ ବେଶି ଖର୍ଚ୍ଚ କରେ ଓ କିଛି ସଞ୍ଚୟ କରେ। ବଜାରକୁ ସାଙ୍ଗମାନଙ୍କ ସହ ଗଲେ ବିଭିନ୍ନ ଜିନିଷ କିଣିବାକୁ ଆଉ ଖାଇବାକୁ ଇଚ୍ଛା ହୁଏ। ଘର ପାଇଁ ବି ଅନେକ ସମୟରେ ନୂଆ ନୂଆ ଜିନିଷ ନେଇ ଆସେ। ତେଣୁ ସଞ୍ଚୟ କରିବାକୁ ଚାହିଁଲେ ମଧ୍ୟ କରିପାରେ ନାହିଁ। ବେଳେବେଳେ ବଦଖର୍ଚ୍ଚ କରିଦିଏ ବୋଲି ମମି ଗାଳି କରନ୍ତି। ହେଲେ ଧୀରେ ଏହି ଅଭ୍ୟାସ ପରିବର୍ତ୍ତନ କରି ସଞ୍ଚୟ କରିବାକୁ ଭାବିଛି।
ସୁବ୍ରତ କୁମାର ରାଉଳ (ସମ୍ବଲପୁର ବିଶ୍ୱବିଦ୍ୟାଳୟ, ସମ୍ବଲପୁର)- ଘରର ସବୁ ଦାୟିତ୍ୱ ମୋ ଉପରେ ଥିବାରୁ ସଞ୍ଚୟକୁ ବେଶି ପ୍ରାଧାନ୍ୟ ଦେଉଛି। ବଦ୍ଖର୍ଚ୍ଚ ଆଦୌ କରେନି। ଏକଥା ସତ ଯେ, ଘରେ ଥିବା ଅପେକ୍ଷା ଏବେ ହଷ୍ଟେଲରେ ରହୁଥିବାରୁ ଖର୍ଚ୍ଚ ଟିକେ ବଢ଼ିଯାଇଛି। ଇଚ୍ଛା ନ ଥିଲେ ବି ସାଙ୍ଗମାନଙ୍କ ସହ ବୁଲିଗଲା ବେଳେ ଅଧିକ ଖର୍ଚ୍ଚ ହୋଇଯାଉଛି। ସେଥିପାଇଁ ଜଗି ରଖି ଖର୍ଚ୍ଚ କରୁଛି। ଯେତେବେଳେ ବି ଘରକୁ ଆସେ, ପାଖରେ ସଞ୍ଚୟ କରି ରଖିଥିବା ଟଙ୍କାରୁ ଘର ଲୋକଙ୍କ ପାଇଁ କିଛି କିଛି ଜିନିଷ ନେଇ ଆସେ।
ସୌରଭ ସାଇରାଜ (ଛାତ୍ର, ବାଲିପାଟଣା, ଭୁବନେଶ୍ୱର)- କଲେଜ ଗଲାବେଳେ ବାପା ଦେଉଥିବା ହାତ ଖର୍ଚ୍ଚକୁ ମୁଁ ସାଇତି ରଖେ। ଅଧା କିଛି ପଇସା ଖର୍ଚ୍ଚ କରି ଆଉ କିଛି ବଞ୍ଚାଏ। ସେଇ ଟଙ୍କାରେ ମୋର ଗାଡ଼ି ତେଲ ଖର୍ଚ୍ଚ କିମ୍ବା ଗାଡ଼ି ମେଣ୍ଟେନାନ୍ସ କରିନିଏ। ଅସମୟରେ ମଧ୍ୟ ମୋ ସେଭିଂସ୍ ବହୁ କାମରେ ଲାଗେ। ବାହାରକୁ ହଠାତ୍ ବୁଲିବାକୁ ପ୍ଲାନିଂ ହେଲେ ସେଭିଂସରୁ ଖର୍ଚ୍ଚ କରେ। ଭବିଷ୍ୟତରେ ଜବ୍ କଲେ ପ୍ରତିମାସରେ ପ୍ଲାନିଂ କରି ସେଭିଂସ୍ କରିବି ବୋଲି ଭାବିଛି।
