ହିଞ୍ଜିଳିକାଟୁ,୨୦।୬(ଦ୍ବିତୀକୃଷ୍ଣ ପଣ୍ଡା): ହିଞ୍ଜିଳି ଥାନା ପିତଳ ସରପଞ୍ଚ ରାମରାଘବ ପାତ୍ର ଓ ପିତଳ ଭାଜପା ମଣ୍ଡଳ ସଭାପତି ବିଜୟ ପ୍ରଧାନଙ୍କୁ ଗୁରୁବାର ମରଣାନ୍ତକ ଆକ୍ରମଣ ଘଟଣାରେ ପୋଲିସ ୪ ଜଣଙ୍କୁ ଅଟକ ରଖି ପଚରାଉଚରା ଚଳାଇଛି। ଅନ୍ୟପଟେ ଆକ୍ରମଣ ଘଟଣାକୁ ନେଇ ଉତ୍ତେଜନା ଲାଗି ରହିଥିବାରୁ ରାତିରୁ ପିତଳ ଗାଁରେ ପୋଲିସ ଫୋର୍ସ ମୁତୟନ କରାଯାଇଛି। ପୂର୍ବ ଶତ୍ରୁତା ଓ ରାଜନୈତିକ ବିବାଦ ପାଇଁ ଗୁରୁବାର ସନ୍ଧ୍ୟାରେ ୮ରୁ ଉଦ୍ଧର୍ବ ବ୍ୟକ୍ତି ମାରଣାସ୍ତ୍ରରେ ସରପଞ୍ଚ ଓ ଭାଜପା ନେତାଙ୍କୁ ପିତଳ ବନ୍ୟା ଓ ବାତ୍ୟା ଆଶ୍ରୟସ୍ଥଳୀ ନିକଟରେ ସଂଘବଦ୍ଧ ଭାବେ ଆକ୍ରମଣ କରିଥିଲେ। ଫଳରେ ଉଭୟେ ଗୁରୁତର ଆହତ ହୋଇଥିଲେ। ଘଟଣା ନେଇ ସରପଞ୍ଚ ରାମରାଘବଙ୍କ ବାପା ପ୍ରମୋଦ କୁମାର ପାତ୍ର ଶୁକ୍ରବାର ହିଞ୍ଜିଳି ଥାନାରେ ଅଭିଯୋଗ କରିଛନ୍ତି। ୧୩ ଜଣ ବ୍ୟକ୍ତି ଆକ୍ରମଣରେ ସଂପୃକ୍ତ ଥିବା ସେ ଅଭିଯୋଗରେ ଦର୍ଶାଇଛନ୍ତି । ହିଞ୍ଜିଳି ଥାନାରେ ପୋଲିସ ନଂ. ୪୯୨/୨୫ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ଗୁରୁତର ଆହତ ସରପଞ୍ଚ ପାତ୍ର ଓ ଭାଜପା ନେତା ପ୍ରଧାନ ବ୍ରହ୍ମପୁର ବଡ଼ ମେଡ଼ିକାଲରେ ଚିକିତ୍ସିତ ହେଉଛନ୍ତି।
