ନୂଆଦିଲ୍ଲୀ: ଦିଲ୍ଲୀ ଜନ୍ତରମନ୍ତରରେ ଚାଲିଥିବା ଛାତ୍ର ଆନ୍ଦୋଳନ ଏବଂ ପେପର୍ ଲିକ୍ ପ୍ରସଙ୍ଗକୁ ନେଇ ବଲିଉଡ୍ ଅଭିନେତା ସଲମାନ ଖନ୍ ପୁଣିଥରେ ଏକ ଗୁରୁତ୍ୱପୂର୍ଣ୍ଣ ସୋସିଆଲ ମିଡିଆ ପୋଷ୍ଟ ସେୟାର କରିଛନ୍ତି। ପୂର୍ବରୁ ଏହି ପ୍ରସଙ୍ଗକୁ ଏକ ଗମ୍ଭୀର ସମସ୍ୟା ବୋଲି ଦର୍ଶାଇଥିବା ସଲମାନ, ବର୍ତ୍ତମାନର ନୂତନ ପୋଷ୍ଟରେ ଆନ୍ଦୋଳନରତ ଛାତ୍ରଛାତ୍ରୀମାନଙ୍କୁ ନିଜ ନିଜ ଘରକୁ ଫେରିଯିବା ପାଇଁ ଅନୁରୋଧ କରିଛନ୍ତି। ଦେଶର ମାନ୍ୟବର ପ୍ରଧାନମନ୍ତ୍ରୀ ଏହି ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସେ ଦୃଢ଼ ଆଶା ବ୍ୟକ୍ତ କରିଛନ୍ତି।
ସଲମାନ ଖନ୍ ନିଜର ଏକ୍ସ (ଟ୍ୱିଟର୍) ଆକାଉଣ୍ଟରେ ଲେଖିଛନ୍ତି ଯେ ପାଠପଢ଼ା ଏବଂ ସୁରକ୍ଷା ଉଭୟ ଦୃଷ୍ଟିରୁ ଛାତ୍ରଛାତ୍ରୀମାନେ ଦେଶର ପ୍ରଥମ ପ୍ରାଥମିକତା ଅଟନ୍ତି, ତେଣୁ ସେମାନଙ୍କୁ କିମ୍ବା ସେମାନଙ୍କ ପିତାମାତାଙ୍କୁ ଚିନ୍ତା କରିବାର କୌଣସି ଆବଶ୍ୟକତା ନାହିଁ। ପ୍ରଧାନମନ୍ତ୍ରୀ ଏହି ବିଷୟରେ ଟ୍ୱିଟ୍ କରିସାରିଛନ୍ତି ଏବଂ ପେପର୍ ଲିକ୍ ପାଇଁ ଦାୟୀ ସମସ୍ତ ବ୍ୟକ୍ତିଙ୍କ ବିରୋଧରେ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସେ ଦୃଢ଼ ବିଶ୍ୱାସ ରଖିଛନ୍ତି। ଏହାସହ ସମସ୍ତ ଛାତ୍ରଛାତ୍ରୀଙ୍କୁ ନିଜ ପିତାମାତାଙ୍କ ପାଖକୁ ତଥା ଘରକୁ ଫେରିଯିବାକୁ ସେ ନବନିବେଦନ କରିଛନ୍ତି।
ଏହା ବ୍ୟତୀତ, ଆନ୍ଦୋଳନରେ ବ୍ରତୀ ଥିବା ସୋନମ ୱାଙ୍ଗଚୁକ୍ଙ୍କୁ ସଲମାନ ଅନୁରୋଧ କରିଛନ୍ତି। ସେ ପୋଷ୍ଟରେ ଉଲ୍ଲେଖ କରିଛନ୍ତି ଯେ ଏହାକୁ ଆଉ ଅଧିକ ଆଗକୁ ବଢ଼ାନ୍ତୁ ନାହିଁ ଏବଂ କିଛି ଖାଇପିଇ ନିଅନ୍ତୁ। ଯଦି ଆବଶ୍ୟକ ପଡ଼େ ତେବେ ସେ ନିଜ ଘରୁ ଖାଦ୍ୟ ପଠାଇ ଦେବେ ବୋଲି ମଧ୍ୟ ସଲମାନ କହିଛନ୍ତି। ସଲମାନଙ୍କ ଏହି ପୋଷ୍ଟ ସୋସିଆଲ ମିଡିଆରେ ଭାଇରାଲ ହେବା ସହ ଲୋକଙ୍କଠାରୁ ଭିନ୍ନ ଭିନ୍ନ ପ୍ରତିକ୍ରିୟା ଲାଭ କରୁଛି।
ଅନ୍ୟପକ୍ଷରେ, କେବଳ ସଲମାନ ଖନ୍ ନୁହଁନ୍ତି, ଦକ୍ଷିଣ ଭାରତୀୟ ସିନେମାର ମେଗାଷ୍ଟାର ମମ୍ମୁଟି ମଧ୍ୟ ଆନ୍ଦୋଳନରତ ଛାତ୍ରଛାତ୍ରୀଙ୍କ ସମର୍ଥନରେ ଏକ ବାର୍ତ୍ତା ସେୟାର କରିଛନ୍ତି। ସେ ନିଜ ପୋଷ୍ଟରେ ଉଲ୍ଲେଖ କରିଛନ୍ତି ଯେ ଯୁବପିଢ଼ି ହେଉଛନ୍ତି ଦେଶର ପ୍ରକୃତ ସମ୍ପତ୍ତି, ତେଣୁ ସେମାନଙ୍କ ସ୍ୱରକୁ ଶୁଣିବା, ସେମାନଙ୍କୁ ସୁରକ୍ଷା ଦେବା ଏବଂ ସେମାନଙ୍କୁ ସଶକ୍ତ କରିବା ଆମର କର୍ତ୍ତବ୍ୟ।
