ବରଗଡ଼,୨୮।୨(ପ୍ରେମାନନ୍ଦ ଖମାରୀ):ପ୍ରାଥମିକ କୃଷି ସମବାୟ ସମିତି(ପ୍ୟାକ୍ସ)ରେ କାର୍ଯ୍ୟରତ କର୍ମଚାରୀମାନେ ବିଭିନ୍ନ ଦାବି ନେଇ ଗୁରୁବାର ବରଗଡ଼ ଉପ ନିବନ୍ଧକ, ସମବାୟ ସମିତି ସମୂହଙ୍କ କାର୍ଯ୍ୟାଳୟ ଆଗରେ ଧାରଣାରେ ବସିଥିଲେ। ଏଥି ସହିତ ସେମାନଙ୍କ ଦାବି ସମୂହ ନେଇ ସମବାୟ ସମିତିର ନିବନ୍ଧକଙ୍କ ଉଦ୍ଦେଶ୍ୟରେ କର୍ମଚାରୀମାନେ ବରଗଡ଼ ଉପ ନିବନ୍ଧକଙ୍କୁ ଏକ ଦାବିପତ୍ର ପ୍ରଦାନ କରିଥିଲେ। ଦାବିପତ୍ରରେ ସପ୍ତମ ବେତନ ହାରରେ ଦରମା, ପଦୋନ୍ନତି ଆଦି ଦାବି କରାଯାଇଛି। ଦାବି ପୂରଣ ନ ହେଲେ ସେମାନେ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦିଆଯାଇଛି।
ଦାବିପତ୍ରରେ ଉଲ୍ଲେଖ ରହିଛି, ପ୍ରାଥମିକ ସମବାୟ ସମିତିର କର୍ମଚାରୀମାନେ କୃଷିକାର୍ଯ୍ୟରେ ସବସିଡ଼ିରେ ବିହନ ଯୋଗାଣ, ରାସାନିକ ସାର, କୀଟନାଶକ ଯୋଗାଣ, କୃଷି ଉପକରଣ ଓ ଯନ୍ତ୍ରପାତି ଋଣ, କୃଷିଋଣ, ପ୍ରଧାନମନ୍ତ୍ରୀ ଫସଲବୀମାରେ ପଞ୍ଜୀକରଣ, ଗ୍ରାମାଞ୍ଚଳର ଚାଷୀଙ୍କୁ ବ୍ୟାଙ୍କିଙ୍ଗ୍ ସୁବିଧା ଯୋଗାଇବା, ଧାନ ସଂଗ୍ରହ ଆଦି ଯୋଜନାରେ କାର୍ଯ୍ୟ କରି ଆସୁଛନ୍ତି। କିନ୍ତୁ ସେମାନଙ୍କ ପ୍ରତି ରାଜ୍ୟ ସରକାର ଅଣଦେଖା ମନୋଭାବ ପୋଷଣ କରି ଆସୁଥିବା କର୍ମଚାରୀମାନେ ଅଭିଯୋଗ କରିଛନ୍ତି। ରାଜ୍ୟର ବିଭିନ୍ନ ବିଭାଗର କର୍ମଚାରୀମାନଙ୍କୁ ସପ୍ତମ ବେତନ ହାରରେ ଦରମା ପ୍ରଦାନ କରାଯାଉଛି। ମାତ୍ର ଏଥିରେ ସମବାୟ ସମିତିର କର୍ମଚାରୀଙ୍କୁ ବାଦ୍ ଦିଆଯାଇଛି। ତେଣୁ ଉକ୍ତ ପତ୍ରକୁ ସରଳୀକରଣ କରାଯାଇ ସମିତିରେ କାର୍ଯ୍ୟରତ ସମସ୍ତ କର୍ମଚାରୀଙ୍କୁ ସପ୍ତମ ବେତନ ହାରରେ ଦରମା ପ୍ରଦାନ ପାଇଁ ଦାବି ହୋଇଛି।
ସେହିପରି ସମବାୟ ସମିତିରେ କାର୍ଯ୍ୟରତ କର୍ମଚାରୀଙ୍କ ଅଭିଜ୍ଞତା, ବରିଷ୍ଠତା, ଶିକ୍ଷାଗତ ଯୋଗ୍ୟତା, କାର୍ଯ୍ୟଦକ୍ଷତାକୁ ଭିତ୍ତି କରି କେନ୍ଦ୍ର ବ୍ୟାଙ୍କକୁ ପଦୋନ୍ନତି ଦେବା ପାଇଁ ନିର୍ଦ୍ଦେଶ ରହିଛି। କିନ୍ତୁ ତାକୁ ଅଣଦେଖା କରି ସିଧାସଳଖ ବ୍ୟାଙ୍କରେ ନିଯୁକ୍ତି ଦିଆଯାଉଥିବା ଅଭିଯୋଗ ହୋଇଛି। ଏ ଦିଗରେ ମଧ୍ୟ ପଦକ୍ଷେପ ନେବାକୁ ଦାବି ହୋଇଛି। ଏହା ସହିତ ସମିତିର ସଭ୍ୟମାନଙ୍କଠାରୁ ସଂଗୃହୀତ ଅଂଶଧନର ମାତ୍ର ୫୦ପ୍ରତିଶତ କେନ୍ଦ୍ର ବ୍ୟାଙ୍କରେ ଜମା ରଖିବା, ଧାନ ସଂଗ୍ରହ ବ୍ୟବସ୍ଥାରୁ ମିଳୁଥିବା କମିଶନ ଟଙ୍କାର ସୁଧରେ ଧାନ ବ୍ୟବସାୟ, ଚାଷୀ ପଞ୍ଜୀକରଣ, ଯାଞ୍ଚ ପ୍ରକ୍ରିୟା, ସାଟେଲାଇଟ୍ ସର୍ଭେକ୍ଷଣ ଆଦିରେ ନିୟୋଜିତ କର୍ମଚାରୀଙ୍କ ଦରମା, ଧାନ ବ୍ୟବସାୟରେ ବ୍ୟବହୃତ କାଗଜ, କମ୍ପ୍ୟୁଟର, ପ୍ରିଣ୍ଟର ଆଦି ଖର୍ଚ୍ଚ ଭରଣା କରିବା, ସମବାୟ ସମିତିର ସମ୍ପାଦକଙ୍କ ସମେତ ସମସ୍ତ କର୍ମଚାରୀଙ୍କୁ କ୍ୟାଡ଼ରଭୁକ୍ତ କରାଯିବା ଆଦି ଦାବି ହୋଇଛି। ଧାରଣାରେ ବରଗଡ଼ ଜିଲାରେ ରହିଥିବା ସମସ୍ତ ସମବାୟ ସମିତିର କର୍ମଚାରୀମାନେ ସାମିଲ ହୋଇଥିଲେ।
