ସଜନାଗଡ଼,୨୩|୧(ଡି.ଏନ.ଏ.) ବାଲେଶ୍ୱରରୁ ମୟୂରଭଞ୍ଜ ଜିଲାକୁ ସଂଯୋଗ କରୁଥିବା ସେରଗଡ଼ ଭାୟା ନୀଳଗିରି-ଉଦଳା ୧୯ନଂ. ରାଜ୍ୟ ରାଜପଥର ସଜନାଗଡ଼ଠାରେ ଥିବା ବଡ଼ପୋଲ(ଘାଘରା ସେତୁ) ପାର୍ଶ୍ୱରୁ ପୁଣି ମାଟି ଅତଡ଼ା ଧସିଛି। ପୂର୍ତ୍ତ ବିଭାଗ ପକ୍ଷରୁ ସେଠାରେ ଏକ ନୂଆ ସେତୁ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ୨ ବର୍ଷ ପୂର୍ବେ ପୋଲ ନିର୍ମାଣ ଲାଗି ଶିଳାନ୍ୟାସ କରାଯାଇଥିଲା। ମାତ୍ର ଠିକାଦାର କାମ ବିଳମ୍ବ କରିବାରୁ ଏହି କାମ ସରିନାହିଁ। ପ୍ରଶାସନିକ ଅଧିକାରୀଙ୍କ ତାଗିଦ ପରେ କିଛି ଦିନ ହେବ କାମ ଚାଲୁ ରହିଛି। ତେବେ ପୁରୁଣା ପୋଲ ପାଶର୍ବରେ ଥିବା ମାଟିକୁ ଠିକାଦାର ଜେସିବି ସାହାଯ୍ୟରେ ଅଧିକ ତାଡ଼ି ଦେଇଥିବାରୁ ଏବେ ବଡ଼ପୋଲ ବିପଦ ସଙ୍କୁଳ ପାଲଟିଛି। ଭାରୀଯାନ ଚଳାଚଳ ସମୟରେ ଏହି ପୋଲର ଗୋଟିଏ ପାର୍ଶ୍ୱରୁ ମାଟି ଅତଡ଼ା ଖସିପଡୁଛି। ଶନିବାର ଭୋର ସମୟରେ ମଧ୍ୟ ଅତଡ଼ା ଧସି ପଡ଼ିଥିବା ଦେଖିବାକୁ ମିଳିଛି। ସେହି ସ୍ଥାନରେ ବଡ଼ପୋଲର ଗୋଟିଏ ପାଖର ସୁରକ୍ଷା ବାଡା ମଧ୍ୟ ଝୁଲି ରହିିଛି। ମୟୂରଭଞ୍ଜକୁ ସଂଯୋଗ କରୁଥିବା ଉକ୍ତ ପୋଲରେ ଦୈନିକ ହଜାର ହଜାର ଗାଡ଼ି ଯାତାୟାତ କରୁଥିବା ବେଳେ ଏବେ ଉଭୟ ଗାଡ଼ି ଓ ଯାତ୍ରୀଙ୍କ ଜୀବନ ପ୍ରତି ବିପଦ ବଢ଼ିଛି। ପୂର୍ତ୍ତ ବିଭାଗ ପକ୍ଷରୁ କୌଣସି ବ୍ୟବସ୍ଥା କରା ନ ଗଲେ କେଉଁ ମୁହୂର୍ତ୍ତରେ ଦୁର୍ଘଟଣା ଘଟିବାର ଆଶଙ୍କାକୁ ଏଡ଼ାଇ ଦେଇ ହେବନାହିଁ। ଲୋକଙ୍କ ସୁରକ୍ଷା ଦିଗରେ ପ୍ରଶାସନର ନିରବତାକୁ ଅଞ୍ଚଳବାସୀ ତୀବ୍ର ବିରୋଧ କରୁଛନ୍ତି। କୌଣସି ବଡ଼ ଦୁର୍ଘଟଣା ପୂର୍ବରୁ ପୂର୍ତ୍ତ ବିଭାଗ ଏଥିପ୍ରତି ଗୁରୁତ୍ୱ ଦେଇ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ପୂର୍ତ୍ତ ବିଭାଗ କନିଷ୍ଠଯନ୍ତ୍ରୀ ଲକ୍ଷ୍ମଣ ସିଂଙ୍କୁ ପଚାରିବାରୁ ଠିକାଦାର ପୁରୁଣା ପୋଲ ପାଶର୍ବରୁ ଅଧିକ ମାଟି କାଟିଦେବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି ଓ ଲୋକଙ୍କ ସୁରକ୍ଷା ପାଇଁ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
