ଗଞ୍ଜାମ,୭।୧(ଡି.ଏନ୍.ଏ.): ଗଞ୍ଜାମ ସହର ୱାର୍ଡ ନଂ ୫ ମେଡିକାଲ ଗଳି ସ୍ଥିତ ରାମେୟା ବନ୍ଧ ହିଡ଼ରେ ଦୀର୍ଘ ବର୍ଷ ହେବ କିଛି ଭୂମିହୀନ ଲୋକ ବାସ କରି ଆସୁଛନ୍ତି । ସେମାନଙ୍କ ଥଇଥାନ ପାଇଁ ଏନ୍ଏସି ପ୍ରଶାସନ ବାଲିସାହିଠାରେ ଆବାସ ଗୃହ ନିର୍ମାଣ କରିବା ଲକ୍ଷ ରଖିଛି । ଏ ନେଇ ଶୁକ୍ରବାର ଏନ୍ଏସି ସାନିଟେସନ ଏକ୍ସପର୍ଟର ସୁମିତ ବେହେରା, କନିଷ୍ଠ ଯନ୍ତ୍ରୀ ମାନସ ରଞ୍ଜନ ପଣ୍ଡା ଓ ଉତ୍ତମ ବେହେରା ଉକ୍ତ ସାହିକୁ ଜେସିବି ନେଇ ଯିବା ପରେ ବାଲିସାହି ବାସିନ୍ଦା ଏହାର ପ୍ରବଳ ବିରୋଧ କରିଥିଲେ । ଆମ ସାହିରେ ଅନ୍ୟ ସାହି ଲୋକଙ୍କୁ ଆମେ ଜାଗା ଦେବୁ ନାହିଁ ବୋଲି ଜେସିବି ଆଗରେ ବସିରହିଥିଲେ । ଫଳରେ କୌଣସି ଉପାୟ ନ ପାଇ ଏନଏସି କର୍ମଚାରୀମାନେ ଫେରି ଯାଇଥିଲେ । ଅନ୍ୟପଟେ ଏଥିପାଇଁ ପ୍ରଶାସନ ସାହି ବାଲାଙ୍କୁ ନୋଟିସ କରି ନ ଥିବା ସାହି ଲୋକେ ଅଭିଯୋଗ କରିଛନ୍ତି ।
