ବର୍ତ୍ତମାନ ବେପରୁଆ ଗାଡ଼ିଚାଳନା ସାଙ୍ଗକୁ ଗାଡ଼ିରେ ମୋବାଇଲ ଫୋନ୍ ବ୍ୟବହାର ଦିନକୁଦିନ ସଡ଼କ ଦୁର୍ଘଟଣାଜନିତ ଜୀବନହାନି ସଂଖ୍ୟା ବୃଦ୍ଧି କରୁଛି। ତେଣୁ ସୁରକ୍ଷା ଦୃଷ୍ଟିରୁ ଏଥିପ୍ରତି ସଚେତନ ରହିବା ଆବଶ୍ୟକ…
ଓ୍ବାଲର୍ଡ ହେଲ୍ଥ ଅର୍ଗାନାଇଜେଶନ୍ (ଡବ୍ଲ୍ୟୁଏଚ୍ଓ) ରିପୋର୍ଟ ମୁତାବକ, ବର୍ତ୍ତମାନ ସମଗ୍ର ପୃଥିବୀରେ ୮ମ ସର୍ବାଧିକ ମୃତ୍ୟୁସଂଖ୍ୟାର କାରଣ ସାଜିଛି ସଡ଼କ ଦୁର୍ଘଟଣା। ଏହାଦ୍ୱାରା କୌଣସି ନା କୌଣସି ସ୍ଥାନରେ ପ୍ରତି ୨୪ ସେକେଣ୍ଡରେ ଜଣଙ୍କର ବା ବର୍ଷକୁ ପ୍ରାୟ ୧.୩ ବିଲିୟନ୍ ଜୀବନହାନି ହେଉଛି। ତେବେ ଅତ୍ୟନ୍ତ ପରିତାପର ବିଷୟ ଯେ, ସବୁଆଡ଼େ ହେଉଥିବା ଦୁର୍ଘଟଣା ମଧ୍ୟରେ ଭାରତରେ ସଡ଼କ ଦୁର୍ଘଟଣାଜନିତ ମୃତ୍ୟୁହାର ସର୍ବାଧିକ। ଅର୍ଥାତ୍ ଏଠାରେ ବର୍ଷକୁ ୧.୫ ମିଲିୟନ ଲୋକଙ୍କ ମୃତ୍ୟୁ ହେଉଥିବା ବେଳେ ସେଥିରେ ଯୁବପିଢ଼ିଙ୍କ ସଂଖ୍ୟା ସର୍ବାଧିକ।
ଗାଡ଼ି ଚଳାଇବା ବେଳେ ସାମାନ୍ୟ ଅବହେଳା ବି ବଡ଼ ଦୁର୍ଘଟଣାର କାରଣ ସାଜିପାରେ। ତେଣୁ ନିଜ ସହିତ ଅନ୍ୟମାନଙ୍କ ସୁରକ୍ଷା ନିମନ୍ତେ ଗାଡ଼ି ଚଲାଇବା ବେଳେ କେତେକ ଦିଗ ପ୍ରତି ସତର୍କ ରହିବା ନିହାତି ଆବଶ୍ୟକ…
ଦ୍ରୁତ ଗତି ମହାବିପତ୍ତି: ଅଧିକ ସ୍ପିଡ୍ରେ ଗାଡ଼ି ଚଲାଇବା ବର୍ତ୍ତମାନ ଅଧିକାଂଶ ଦୁର୍ଘଟଣାର ମୂଳ କାରଣ ସାଜିଛି। ସ୍ପିଡ୍ରେ ଗାଡ଼ି ଚଲାଇବା ଦ୍ୱାରା ଆଗରେ କୌଣସି ଗାଡ଼ି, ମଣିଷ କିମ୍ବା ପଶୁ ଆସିଗଲେ ପିଟି ହୋଇଯାଏ କିମ୍ବା ହଠାତ୍ ବ୍ରେକ୍ କରିବା ଦ୍ୱାରା ଗାଡ଼ି ଭାରସାମ୍ୟ ହରାଇ ପଡ଼ିଯାଏ। ଏପରି ନ ହେବା ଲାଗି ଗାଡ଼ିର ସ୍ପିଡ୍ ସବୁବେଳେ ମଧ୍ୟମ ତଥା ନିୟନ୍ତ୍ରଣରେ ରଖନ୍ତୁ।
ଫୋନ୍ ବ୍ୟବହାର ବିପଦପୂର୍ଣ୍ଣ: ନ୍ୟାଶନାଲ ସେଫ୍ଟି କାଉନ୍ସିଲ ରିପୋର୍ଟ ଅନୁଯାୟୀ, ଗାଡ଼ି ଚଲାଇବା ବେଳେ ମୋବାଇଲ ଫୋନ୍ ବ୍ୟବହାର ଦୁର୍ଘଟଣା ପାଇଁ ବିଶେଷ ଭାବେ ଦାୟୀ। ଅନେକଙ୍କ ମନରେ ଏକ ଧାରଣା ଥାଏ ଯେ, ସିଧାସଳଖ ମୋବାଇଲ ଫୋନ୍ ନ ଧରି ବ୍ଲୁଟୁଥ୍ ଭଳି ହ୍ୟାଣ୍ଡ୍ସ ଫ୍ରି ଡିଭାଇସ୍ ବ୍ୟବହାର କରିବା ନିରାପଦ। ହେଲେ ବାସ୍ତବରେ ଏହା ମଧ୍ୟ ଦୁର୍ଘଟଣା ଲାଗି ସମପରିମାଣରେ ଦାୟୀ। ତେବେ ଏହାଦ୍ୱାରା ଚାଳକ ନିଜ ଜୀବନ ସହିତ ଅନ୍ୟମାନଙ୍କ ଜୀବନକୁ ମଧ୍ୟ ମୃତ୍ୟୁମୁଖକୁ ଠେଲି ଦେଇଥାଏ। କେବଳ ଏତିକି ନୁହେଁ, ବର୍ତ୍ତମାନ ଅଧିକାଂଶ ଯୁବପିଢ଼ିଙ୍କଠାରେ ଗାଡ଼ି ଚଲାଇବା ବେଳେ ଦେଖିବାକୁ ମିଳୁଥିବା ସେଲ୍ଫି ନେବା, ଭିଡିଓ ଶୁଟ୍ କରିବାର କ୍ରେଜ୍ ବି ଆକ୍ସିଡେଣ୍ଟ ହେବାର ଅନ୍ୟ ଏକ ମୁଖ୍ୟ କାରଣ। ତେଣୁ ଗାଡ଼ି ଚଲାଇବା ବେଳେ କଲ୍ ଆସୁଥିଲେ ରାସ୍ତା କଡ଼ରେ ଡ୍ରାଇଭିଂ ବନ୍ଦ କରି କଥା ହୁଅନ୍ତୁ କିମ୍ବା ପହଞ୍ଚତ୍ବା ପରେ ଫୋନ୍ କରନ୍ତୁ। ସେହିପରି ଗାଡ଼ି ଚଲାଇବା ବେଳେ ଫଟୋ, ଭିଡିଓ ଆଦି ଉଠାନ୍ତୁ ନାହିଁ କିମ୍ବା ଗାଡ଼ିରେ ବସିଥିଲେ ଚାଳକଙ୍କୁ ଏସବୁ କରି ଡିଷ୍ଟର୍ବ କରନ୍ତୁ ନାହିଁ। ଏଭଳି ଦୁର୍ଘଟଣା ରୋକିବା ଲାଗି କାଲିଫର୍ନିଆ, କନେକ୍ଟିକଟ୍, ଡେଲାଓ୍ବେର୍, ଓ୍ବାଶିଂଟନ୍ ଡିସି, ହାଓ୍ବାଇ, ଇଲିନୋଇସ୍, ମାରିଲାଣ୍ଡ, ନେଭାଡ଼ା, ନ୍ୟୁୟର୍କ, ଆରେଗନ୍, ଭେରମଣ୍ଟ ଭଳି କେତେକ ସହରରେ ଗାଡ଼ି ଚଲାଇବା ସମୟରେ ମୋବାଇଲ ଫୋନ୍ ବ୍ୟବହାର କରିବା ନିଷେଧ କରାଯାଇଛି।
ହେଲ୍ମେଟ୍ ଓ ସିଟ୍ବେଲ୍ଟ:
ଅନେକେ ଟ୍ରାଫିକ୍ ନିୟମ ଅନୁଯାୟୀ ଫାଇନ୍ ଦେବା ଡରରେ ହେଲ୍ମେଟ୍ ପିନ୍ଧୁଥିବା ବେଳେ ଟ୍ରାଫିକ୍ ନ ଥିବା ସ୍ଥାନରେ ହେଲ୍ମେଟ୍ ଖୋଲି ଗାଡ଼ି ଚଳାନ୍ତି। ହେଲେ ଏହାଦ୍ୱାରା ଦୁର୍ଘଟଣା ହେଲେ ମୁଣ୍ଡରେ ଆଘାତ ଲାଗିବା ସହ ମୃତ୍ୟୁ ଆଶଙ୍କା ବୃଦ୍ଧି ପାଇଥାଏ। ତେଣୁ ଦୁଇଚକିଆ ଯାନ ଚଲାଇବା ବେଳେ ହେଲମେଟ୍ ନିହାତି ପିନ୍ଧିବା ଆବଶ୍ୟକ। ସେହିପରି ପଛରେ ବସିଥିବା ବ୍ୟକ୍ତିଙ୍କୁ ବି ହେଲ୍ମେଟ୍ ପିନ୍ଧିବା ଜରୁରୀ। ସେହିପରି ୪ ଚକିଆ ଗାଡ଼ି ଚଲାଇବା ବେଳେ ସିଟ୍ ବେଲ୍ଟ ବାନ୍ଧିବା ସବୁଠୁ ଗୁରୁତ୍ବପୂର୍ଣ୍ଣ କଥା। କାରଣ ହଠାତ୍ ଆକ୍ସିଡେଣ୍ଟ ହୋଇଗଲେ ଏହା ବେଶି କ୍ଷତି ହେବାରୁୁ ରକ୍ଷା କରିଥାଏ ା ତେଣୁ ଏଥିପ୍ରତି ସତର୍କ ହେବା ଜରୁରୀ।
ରୁହନ୍ତୁ ନିଶାମୁକ୍ତ: ଆଲ୍କୋହଲ ପିଇ ଗାଡ଼ି ଚଲାଇବା ଦୁର୍ଘଟଣାର ଅନ୍ୟ ଏକ ମୁଖ୍ୟ କାରଣ। ତେଣୁ ଡ୍ରିଙ୍କ୍ସ କରିଥିଲେ ଗାଡ଼ି ଚଲାନ୍ତୁ ନାହିଁ। କାରଣ ଆପଣଙ୍କ ଏହି ଭୁଲ ନିଜ ସହିତ ଅନ୍ୟର ଜୀବନକୁ ବି ବିପଦରେ ପକାଇପାରେ।
ଓଭରଲୋଡ୍: ବାଇକ୍ ହେଉ ବା କାର୍, ଗୋଟେ ଗାଡ଼ିରେ ଆବଶ୍ୟକତାଠାରୁ ଅଧିକ ବ୍ୟକ୍ତି ଯାଆନ୍ତୁ ନାହିଁ। କାରଣ ଏହାଦ୍ୱାରା କେବେକେବେ ଗାଡ଼ିି ଭାରସାମ୍ୟ ହରାଇ ଦୁର୍ଘଟଣା ହେବାର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।
ଟ୍ରାଫିକ୍ ନିୟମ: ଟ୍ରାଫିକ ନିୟମକୁ କେବଳ ଫାଇନ୍ ଦେବାରୁ ବଞ୍ଚତ୍ତ ହେବାର ଏକ ମାଧ୍ୟମ ବୋଲି ଭାବନ୍ତୁ ନାହିଁ। ମଣିଷସମାଜର ସୁରକ୍ଷା ନିମନ୍ତେ କରାଯାଇଥିବା ଏହିସବୁ ନିୟମ ମାନନ୍ତୁ ଏବଂ ନିଜ ସହ ଅନ୍ୟମାନଙ୍କୁ ମଧ୍ୟ ସୁରକ୍ଷିତ ରଖନ୍ତୁ।
