ଭୁବନେଶ୍ୱର,୨୪ା୬(ବ୍ୟୁରୋ)- ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରା ସହ ସେମାନଙ୍କର ଅଟକି ଯାଇଥିବା ରଥ ମଧ୍ୟ ଗଡ଼ିଥିଲା। ନିଜ ଜନ୍ମମାଟିକୁ ଫେରିଆସିବା ଜାଣି ୩ ମାସରୁ ଦୀର୍ଘଦିନ ଧରି ଦୁର୍ବଃସହ ହୋଇପଡ଼ିଥିବା ଜୀବନ ଏବଂ ମନକୁ ଶାନ୍ତି ଏବଂ ଆଶ୍ୱସ୍ତି ମିଳିଥିଲା। ଲକ୍ଡାଉନ୍ ଯୋଗୁ ତାମିଲନାଡ଼ୁରେ ଫସିରହିଥିବା ଜଗତସିଂହପୁର କୁଜଙ୍ଗ ଅଞ୍ଚଳର ଅନିରୁଦ୍ଧ ମଲ୍ଲିକ ଓ ତାଙ୍କ ପରିବାରକୁ ଏଭଳି ସହଯୋଗର ହାତ ବଢାଇ ତାଙ୍କପାଇଁ ଦେବଦୂତ ସାଜିଛନ୍ତି ଅଭିନେତା ସବ୍ୟସାଚୀ ମିଶ୍ର। କିଛିଦିନ ତଳେ ସବ୍ୟସାଚୀ ତାମିଲନାଡ଼ୁରେ ଫସିଥିବା ଆଉଏକ ଦମ୍ପତିଙ୍କୁ ନିଜ ଘରକୁ ଫେରାଇ ଆଣିଥିଲେ। ଏବେ ପୁଣିଥରେ ଏକ ପରିବାରକୁ ସହଯୋଗର ହାତ ବଢାଇ ଏହି ଅଭିନେତା ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି।
ଏକ ସୋସିଆଲ ମିଡ଼ିଆ ପୋଷ୍ଟରେ ଅନିରୁଦ୍ଧ, ତାଙ୍କ ପତ୍ନୀ ଏବଂ ତାଙ୍କ ଝିଅ ଓଡ଼ିଶା ଫେରିବାକୁ ଅନୁରୋଧ କରିଥିଲେ। ‘ଆମର ଏଠାରେ ଖାଇବା, ପିଇବା ଓ ରହିବାରେ ହବୁ ଅସୁବିଧା ହେଉଛି। ଆମେ ଓଡ଼ିଶା ଯିବାକୁ ଚାହୁଁଛୁ।’ ବୋଲି ମହିଳାଜଣକ ଏହି ପୋଷ୍ଟ ମାଧ୍ୟମରେ କହିଥିଲେ। ଏ ସମ୍ପର୍କରେ ଜାଣିବା ପରେ ସବ୍ୟସାଚୀ ତୁରନ୍ତ ତାଙ୍କୁ ଯୋଗାଯୋଗ କରିଥିଲେ। ପାଖରେ ଅର୍ଥ ନଥିବାରୁ ବସ୍ ଭଡ଼ା ଦେଇ ଆସିବା ଅନିରୁଦ୍ଧଙ୍କ ପକ୍ଷେ ସମ୍ଭବ ନଥିଲା। ଏହା ଜାଣିବା ପରେ ସବ୍ୟସାଚୀ ସେହିଦିନ ସଙ୍ଗେ ସଙ୍ଗେ ବସ୍ର ବ୍ୟବସ୍ଥା କରିଥିଲେ। ରଥଯାତ୍ରା ଦିନ ଅର୍ଥାତ୍ ମଙ୍ଗଳବାର ସକାଳେ ସେମାନେ ବସ୍ରେ ବସି ଓଡ଼ିଶା ଅଭିମୁଖେ ବାହାରିଥିଲେ। ତାଙ୍କସହ ଉକ୍ତ ଅଞ୍ଚଳରେ ଫସିଥିବା ଅନ୍ୟ ଓଡ଼ିଆମାନେ ମଧ୍ୟ ଏହି ବସ୍ରେ ଆସିଥିଲେ।
