ମସ୍କୋ,୧୧ ।୨: ରୁଷିଆ ଓ ୟୁକ୍ରେନ୍ ମଧ୍ୟରେ ଚାଲିଥିବା ଯୁଦ୍ଧକୁ ବର୍ଷେ ପୂରଣ ହେବାକୁ ଯାଉଛି । ହେଲେ ଏହି ଯୁଦ୍ଧ ଏବେବି ପ୍ରଥମ ଦିନ ଭଳି ଲାଗି ରହିଛି । ଶୁକ୍ରବାର ରୁଷିଆ ୧ ଘଣ୍ଟା ଭିତରେ ୟୁକ୍ରେନ୍ ଉପରେ ୧୭ ମିଶାଇଲ ମାଡ କରିଥିବା ସୂଚନା ମିଳିଛି । ଏଥିରେ ରୁଷିଆ ସେନା ୟୁକ୍ରେନର ଏନର୍ଜି ସେଣ୍ଟରକୁ ଟାର୍ଗେଟ କରିଥିଲେ । ଏହା ପୂର୍ବରୁ ରୁଷିଆ ୟୁକ୍ରେନର ବିଜୁଳି ଘର ଉପରେ ବି ଆକ୍ରମଣ କରିଥିଲା ।
ସୂଚନାଯୋଗ୍ୟ, ୟୁକ୍ରେନ୍ ଉପରେ ରୁଷିଆର ଆକ୍ରମଣ ଶୁକ୍ରବାର ସକାଳ ପ୍ରାୟ ୪ଟାରେ ଆରମ୍ଭ ହୋଇଥିଲା । ୟୁକ୍ରେନର ଜପୋରିଜିୟାରେ ପ୍ରଥମେ ମିଶାଇଲ ମାଡ କଲା ରୁଷିଆ । ଦ କ୍ୱିଭ ଇଣ୍ଡିପେଣ୍ଡେଣ୍ଟର ରିପୋର୍ଟ ଅନୁଯାୟୀ, ରୁଷିଆ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଏହା ପ୍ରଥମଥର ଯେ ଏକା ସହ ଏତେ ମିଶାଇଲ ମାଡ କରିଛି ରୁଷିଆ । ରୁଷିଆ ସେନାଙ୍କ ପକ୍ଷରୁ ଏବେ ପର୍ଯ୍ୟନ୍ତ ଛୋଟ ବଡ ଅନେକ ମିଶାଇଲ ମାଡ କରାଯାଇଛି ୟୁକ୍ରେନ୍ ଉପରେ । ଖାର୍କିଭର ମେୟର ଇଗୋର ତେରଖୋବ କହିଛନ୍ତି, ରୁଷିଆ ସେନା ତାଙ୍କ ଆକ୍ରମଣରେ ଏନର୍ଜି ସେଣ୍ଟରକୁ ଟାର୍ଗେଟ କରିଥିଲେ ।
