ମସ୍କୋ,୨୦ ।୬: ଚଳିତ ବର୍ଷ ଫେବୃୟାରୀରୁ ରୁଷିଆ ୟୁକ୍ରେନ ଉପରେ ଆକ୍ରମଣ କରିଥିବା ବେଳେ ଅନୁମାନ କରାଯାଉଥିଲା କି ଖୁବଶୀଘ୍ର ରୁଷିଆ ୟୁକ୍ରେନକୁ ସମ୍ପୂର୍ଣ୍ଣ ଭାବେ ନିଜ ଅଧିନକୁ ନେଇ ଆସିବ । ହେଲେ ଦୀର୍ଘ ପ୍ରାୟ ସାଢେ ୩ ମାସ ହେବ ଯୁଦ୍ଧ ଲାଗିଥିବା ବେଳେ ଏବେ ଏହା ରୁଷିଆ ପକ୍ଷରେ ସମ୍ଭବ ହୋଇନାହିଁ । ଏପଟେ ରୁଷିଆ-ୟୁକ୍ରେନ ଯୁଦ୍ଧ ଫଳରେ ସାରା ବିଶ୍ୱରେ ଏହାର ଘୋର ପ୍ରଭାବ ପଡିଛି । ଏହାକୁ ନେଇ ନାଟୋ କହିଛି ଯୁଦ୍ଧ କିଛି ବର୍ଷ ପର୍ଯ୍ୟନ୍ତ ଚାଲିବ । ଆଉ ୟୁକ୍ରେନ୍ ଖୁବଶୀଘ୍ର ଡୋନବାସକୁ ରୁଷିଆ ସେନାଙ୍କଠାରୁ ନିଜ କବଜାକୁ ନେଇଯିବ । ଏପଟେ ରୁଷିଆ ଦାବି କରିଛି ୟୁକ୍ରେନର ପୂର୍ବରେ ବିଶେଷ ସେନା ଅଭିଯାନ ଜାରି ରହିଛି । ଏମାନେ ଯୋଜନା ଅନୁଯାୟୀ ଆଗକୁ ବଢୁଛନ୍ତି । ଫଳରେ ଖୁବଶୀଘ୍ର ସଫଳତା ମିଳିବ । ସମ୍ପୂର୍ଣ୍ଣ ଡୋନବାସ ରୁଷିଆ ଅଧିନକୁ ଚାଲିଆସିବ ।
ନାଟୋର ମହାସଚିବ ଜେଂସ ଷ୍ଟୋଲଟନବର୍ଗ ଜର୍ମାନୀର ଖବରକାଗଜ ବିଲ୍ଡ ଅମ ଜନଟାଗକୁ ଦେଇଥିବା ସୂଚନା ଅନୁଯାୟୀ, ଆମେରିକା ଓ ୟୁରୋପ ଦେଶରୁ ମିଳୁଥିବା ଆଧୁନିକ ଅସ୍ତ୍ରଶସ୍ତ୍ର ଯୋଗୁ ୟୁକ୍ରେନ୍ ଯୁଦ୍ଧରେ ଆଗକୁ ବଢି ଚାଲିଛି । ଖୁବଶୀଘ୍ର ରୁଷିଆ କବଜାରୁ ୟୁକ୍ରେନ ଡୋନବାସକୁ ମୁକ୍ତ କରିଦେବ । ଷ୍ଟୋଲଟନବର୍ଗ କହିଛନ୍ତି ସମ୍ପୂର୍ଣ୍ଣ ବିଶ୍ୱ ବିଶେଷ ଭାବେ ୟୁରୋପ ଧ୍ୟାନ ଦବା ଦରକାର କି ଏହି ଯୁଦ୍ଧ କିଛି ବର୍ଷଧରି ଚାଲିବ । ୟୁକ୍ରେନକୁ ବିଜୟି କରିବାକୁ ହେଲେ କେବଳ ସେନା ସହାୟତା ନୁହେଁ ବରଂ ଶକ୍ତି ସଙ୍କଟ ଓ ଖାଦ୍ୟ ସଙ୍କଟକୁ ଦୂରେଇବାକୁ ପଡିବ ।
