ଭୁବନେଶ୍ୱର,୨୦ା୬(ବ୍ୟୁରୋ): ରାଜ୍ୟ ସରକାର ବିଧାୟକମାନଙ୍କ ଲାଗି ଅତ୍ୟାଧୁନିକ କ୍ୱାର୍ଟର୍ସ ନିର୍ମାଣ ନିମନ୍ତେ ପ୍ରାୟ ୮୭୦ ଗଛ କାଟିବା ଯୋଜନା କରିଥିବା ବେଳେ ବର୍ତ୍ତମାନ ସୁଦ୍ଧା ସେଥିରୁ ୩୫୦ ଗଛ କଟାଯାଇସାରିଛି। ଶହ ଶହ ବର୍ଷ ତଳର ବିରାଟକାୟ ଗଛ କାଟି କ୍ୱାର୍ଟର୍ସ ନିର୍ମାଣ କଥାକୁ ବିଭିନ୍ନ ମହଲରେ ବିରୋଧ ହେବା ପରେ ସେଥିରେ ରୋକ ଲାଗିଛି। ବର୍ତ୍ତମାନ ସେହି ପ୍ରକ୍ରିୟାକୁ ରାଜ୍ୟ ସରକାର ବନ୍ଦ ରଖିଛନ୍ତି। ଏହି ପ୍ରସଙ୍ଗରେ ଏକ ପିଆଇଏଲ୍ ଫାଇଲ କରାଯିବା କାରଣରୁ ଏହି କାର୍ଯ୍ୟ ବନ୍ଦ ରହିଥିବା ଜଣାପଡ଼ିଛି। ତେବେ କାମ ବନ୍ଦ ରହିଥିଲେ ମଧ୍ୟ ଆଗକୁ ହେବାର ଯଥେଷ୍ଟ ସମ୍ଭାବନା ରହିଛି। କାରଣ କ୍ୱାର୍ଟର୍ସ ଅନ୍ୟତ୍ର କରିବା ନେଇ ଏ ପର୍ଯ୍ୟନ୍ତ ଓବିସିସି(ଓଡ଼ିଶା ବ୍ରିଜ କନ୍ଷ୍ଟ୍ରକଶନ କର୍ପୋରେଶନ) ଏବଂ ସାଧାରଣ ପ୍ରଶାସନ ବିଭାଗ ପକ୍ଷରୁ କିଛି ନିଷ୍ପତ୍ତି ହୋଇନାହିଁ। ଏହି ଗଛକଟା ଘଟଣାରେ ଯେଉଁ ପିଆଇଏଲ୍ ହୋଇଛି ସରକାରଙ୍କ ତରଫରୁ ତାହାର ଉତ୍ତର କେବଳ ରଖାଯାଉଥିବା ଜଣାପଡ଼ିଛି। ଅନ୍ୟପଟେ ଏହି ଘଟଣାରେ ମହାନଦୀ ବଞ୍ଚାଅ ଆନ୍ଦୋଳନ ପକ୍ଷରୁ ସୋମବାର ଆଉ ଏକ ମାମଲା ରୁଜୁ କରାଯିବ ବୋଲି ସୁଦର୍ଶନ ଦାସ ସୂଚନା ଦେଇଛନ୍ତି। ତାଙ୍କ ଅଭିଯୋଗ ଅନୁଯାୟୀ, ବଗାୟତ ଜମିରେ କିପରି କ୍ୱାର୍ଟର୍ସ ନିର୍ମାଣ ଲାଗି ଗଛ କଟା ହେଲା ସେନେଇ ମାମଲା କରାଯିବ। ହେଲେ ଜଣେ ବରିଷ୍ଠ ଅଧିକାରୀ କିନ୍ତୁ ଏହାକୁ ଖଣ୍ଡନ କରିଛନ୍ତି। ସେ କହିଛନ୍ତି, ରାଜ୍ୟ ସରକାରଙ୍କ ଜମି, ତେଣୁ ସରକାର ଯାହା ଚାହିଁବେ ତାହା କରିପାରିବେ। ଏହା ଘରବାଡ଼ି ଜମି ବୋଲି ଅଧିକାରୀ ଜଣଙ୍କ ଯୁକ୍ତି ବାଢ଼ିଛନ୍ତି। ସେହିପରି ସୁଦର୍ଶନ କହିଛନ୍ତି, ଟ୍ରି ଆକ୍ଟ ଅନୁସାରେ କେଉଁଠାରେ ଗଛ କାଟିବ ନ କାଟିବ ତା’ର ନିୟମ ରହିଛି। ତେଣୁ ସେ ଦିଗରେ କ’ଣ ନିୟମ ଉଲ୍ଲଂଘନ କରାଯାଇଛି ସେନେଇ ମଧ୍ୟ ମାମଲା କରାଯିବ। ହେଲେ କ୍ୱାର୍ଟର୍ସ ନିର୍ମାଣ ଅନ୍ୟତ୍ର ସ୍ଥାନାନ୍ତର ହେବା ନେଇ କିଛି ଯୋଜନା ନାହିଁ ବୋଲି ସାଧାରଣ ପ୍ରଶାସନ ବିଭାଗର ଜଣେ ଅଧିକାରୀ ସୂଚନା ଦେଇଛନ୍ତି। ଦିଲ୍ଲୀର ମୋତିବାଗ୍ ପ୍ଲାନରେ ଏହି କ୍ୱାର୍ଟର୍ସ ନିର୍ମାଣ ହେବ ବୋଲି କହିଛନ୍ତି।
ଏହି ଘଟଣାରେ ଜଙ୍ଗଲ ଓ ପରିବେଶ ବିଭାଗ କ୍ଷେତ୍ର ଅଧିକାରୀ ମହେନ୍ଦ୍ର ନାଏକ କହିଛନ୍ତି, କାମ ଆମେ ବନ୍ଦ କରିଛୁ। ସରକାରୀ ନିର୍ଦ୍ଦେଶ ଆସିଲେ ପୁଣି କଟାଯିବ। ଏ ପର୍ଯ୍ୟନ୍ତ ୩୫୦ ଗଛ କଟା ସରିଛି। ମୋଟ ୮୭୦ ଗଛ କଟାଯିବ। ହେଲେ ପିଆଇଏଲ ଫାଇଲ୍ ହେବା ଯୋଗୁ ଏହାକୁ ବନ୍ଦ ରଖାଯାଇଛି। ଅନ୍ୟପଟେ କଟା ସରିଥିବା କାଠ ସେଠାରେ ପଡ଼ି ରହିଛି। ଏହି କାଠ କଟା ହେବାପରେ ସେଠାରେ ହିଁ ବିକ୍ରି ହୁଏ ନଚେତ୍ ଡିପୋକୁ ଚାଲିଯାଏ। ମୁଖ୍ୟତଃ ଆମ୍ବ, ବେଲ, ଦେବଦାରୁ, ମାହାଳ, ସଲପ ଓ ନଡ଼ିଆ ଗଛ କଟାଯାଇଛି। ସେସବୁ କାଠରୁ କିଛି ଚୋରି ହୋଇଛି। ବାକି ସବୁ ପଡି ରହିଛି। ତେବେ ଜଙ୍ଗଲ ଓ ପରିବେଶ ବିଭାଗର ଜଣେ ବରିଷ୍ଠ ଅଧିକାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଏହି ଘଟଣାରେ ମୁହଁ ଖୋଲିବାରୁ ତାଙ୍କର ବଦଳି ହୋଇସାରିଛି। ତେଣୁ ସତ କହିଲେ ଏପରି ହଇରାଣ ହେବାକୁ ପଡ଼ିବ। ତାଙ୍କ ଦାୟିତ୍ୱ ଥିଲା କେବଳ ଗଛ କାଟିବା। ମୁଖ୍ୟତଃ ସାଧାରଣ ପ୍ରଶାସନ ଏବଂ ଓବିସିସି ଏହିସବୁ ଦାୟିତ୍ୱ ତୁଲାଉଛି ବୋଲି ସେ କହିଛନ୍ତି।
ତେବେ ଦାୟିତ୍ୱରେ ଥିବା ଓବିସିସିର ଜଣେ ବରିଷ୍ଠ ଅଧିକାରୀ ଏନେଇ କିଛି ମୁହଁ ଖୋଲି ନାହାନ୍ତି। ତେବେ ଆଗକୁ ସେଠାରେ କ୍ୱାର୍ଟର୍ସ ହେବ ବୋଲି ବିଧାନସଭାର ଜଣେ ଅଧିକାରୀ କହିଛନ୍ତି। ବିଧାନସଭା ଏଏସ୍ଓ ଇ. ଚିନା ବାବୁ କହିଛନ୍ତି, ବିଧାୟକମାନଙ୍କ କ୍ୱାର୍ଟର୍ସ ସହିତ ସେଠାରେ ସାଧାରଣ ପ୍ରଶାସନ ବିଭାଗ କ୍ୱାର୍ଟର୍ସ ମଧ୍ୟ ହେବ। ତେଣୁ ବିଧାୟକଙ୍କ କ୍ୱାର୍ଟର୍ସ ଲାଗି ବିଧାନସଭା ଟଙ୍କା ଖର୍ଚ୍ଚ କରିବା ସହ ଜି.ଏ. କ୍ୱାର୍ଟର୍ସ ଟଙ୍କା ସେହି ବିଭାଗ ଖର୍ଚ୍ଚ କରିବ। ତେଣୁ ଆଗକୁ ବୈଠକ ବସିବାର ଅଛି। ବୈଠକ ବସିବା ପରେ କ୍ୱାର୍ଟର୍ସ ନିର୍ମାଣ ନେଇ କ’ଣ ଯୋଜନା କରାଯାଇଛି ସେନେଇ ଜଣାପଡିବ। ସୂଚନାଯୋଗ୍ୟ ଯେ, ରାଜ୍ୟ ସରକାର ୨୭୫ କୋଟି ଟଙ୍କା ଖର୍ଚ୍ଚ କରି ଓଏମ୍ସି କାର୍ଯ୍ୟାଳୟଠାରୁ କମିଶନରେଟ ପୋଲିସ୍ କାର୍ଯ୍ୟାଳୟ ମଧ୍ୟରେ ୩୦୦ କ୍ୱାର୍ଟର୍ସ ନିର୍ମାଣ ଲାଗି ଯୋଜନା ରଖିଥିବା ବେଳେ ୨୦୨୪ ସୁଦ୍ଧା ନିର୍ମାଣ ସରିବ ବୋଲି ଲକ୍ଷ୍ୟ ରଖାଯାଇଛି।
