ଭୁବନେଶ୍ୱର,୧୯ା୧୧(ବ୍ୟୁରୋ)-ଖଣ୍ଡଗିରି ଥାନା ତପୋବନ ଅଞ୍ଚଳରୁ ଶୁକ୍ରବାର ପୋଲିସ ଟଙ୍କା ଭର୍ତ୍ତି ବ୍ୟାଗ୍ ସହ ଜଣେ ଯୁବକଙ୍କୁ ଧରିଛି। ଉକ୍ତ ବ୍ୟାଗ୍ଟିରେ ପ୍ରାୟ ୩୦ଲକ୍ଷ ଟଙ୍କା ଥିବା ନେଇ ପୋଲିସ ସୂଚନା ଦେଇଛି। ତେବେ ଥାନାକୁ ଆଣି ଯୁବକଙ୍କୁ ପଚରାଉଚରା କରାଯାଇଥିଲା। ତାଙ୍କ ନାମ ମହାବୀର ପ୍ରସାଦ ଦାସ ଓ ସେ ପାରଳାଖେମୁଣ୍ଡିରୁ ଏହି ଟଙ୍କା ଆଣୁଥିଲେ ବୋଲି ପୋଲିସ ଆଗରେ କହିଛନ୍ତି।
ଅନ୍ୟପକ୍ଷରେ ମହାବୀରଙ୍କୁ ପୋଲିସ ଅଟକ ରଖିବା ଜାଣିବା ପରେ ଛତିଆ ଅଞ୍ଚଳର ପ୍ରଳୟ କୁମାର ପାଢୀ ନାମକ ଜଣେ ଯୁବକ ଥାନାରେ ପହଞ୍ଚତ୍ ମହାବୀର ତାଙ୍କ ସାଙ୍ଗ ଓ ଉକ୍ତ ଟଙ୍କା ତାଙ୍କର ବୋଲି ଦାବି କରିଛନ୍ତି। ପ୍ରଳୟ କହିଛନ୍ତି, ସେ ପାନ ମସଲା ଓ ଗୁଟ୍ଖା ହୋଲ୍ସେଲିଂ କରନ୍ତି। କଟକ ମାଲ୍ଗୋଦାମରୁ ରାଜ୍ୟର ବିଭିନ୍ନ ଜିଲାକୁ ତାଙ୍କ ମାଲ୍ ଯାଇଥାଏ। ମାତ୍ର ଲକ୍ଡାଉନ ଓ ଶଟ୍ଡାଉନ ଯୋଗୁ ତାଙ୍କର ଏବାବଦ ବକେୟା ଟଙ୍କା ସଂଗ୍ରହ ହୋଇପାରି ନ ଥିଲା। ତେଣୁ ସେ ମହାବୀରଙ୍କୁ ପାରଳାଖେମୁଣ୍ଡିକୁ ବକେୟା ଟଙ୍କା ଆଦାୟ କରିବା ପାଇଁ ପଠାଇଥିଲେ। ମହାବୀର ସେଠାକାର ବ୍ୟବସାୟୀଙ୍କଠାରୁ ୩୦ଲକ୍ଷ ବକେୟା ଟଙ୍କା ସଂଗ୍ରହ କରି ବସ୍ ଯୋଗେ ଆସି ଭୁବନେଶ୍ୱରରେ ଓହ୍ଲାଇଥିଲେ। କଟକ ଯିବା ପାଇଁ ତପୋବନ ପେଟ୍ରୋଲ ପମ୍ପ ନିକଟରେ ଛିଡା ହୋଇଥିବା ସମୟରେ ପୋଲିସ ତାଙ୍କୁ ଧରିଥିଲା। ଏହି ଟଙ୍କା ସମ୍ପୂର୍ଣ୍ଣ ଭାବେ ତାଙ୍କର ଓ ଏବାବଦ ସମସ୍ତ କାଗଜପତ୍ର ସେ ପୋଲିସ ନିକଟରେ ଦାଖଲ କରିବେ ବୋଲି କହିଥିଲେ। ତେବେ ପ୍ରଳୟଙ୍କ କଥା କେତେ ସତ ସେନେଇ ଯାଞ୍ଚ କରାଯାଉଛି। ସମସ୍ତ କାଗଜପତ୍ର ସହ ଜିଏସ୍ଟି ବାବଦରେ ଯାଞ୍ଚ ସରିବା ପରେ ଯଦି କିଛି ଖିଲାପ ହୋଇଥିବା ଜଣାପଡିବ ତା’ହେଲେ ମାମଲାକୁ ଆୟକର ବିଭାଗକୁ ହସ୍ତାନ୍ତର କରାଯିବ ବୋଲି ଡିସିପି ଉମାଶଙ୍କର ଦାଶ କହିଛନ୍ତି।
