ନୂଆଦିଲ୍ଲୀ,୧୨।୧୧: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଦୃଷ୍ଟାନ୍ତମୂଳକ ସଫଳତା ହାସଲ କରିବା ପରେ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ୍ ଶର୍ମାଙ୍କୁ ପୂର୍ବତନ କ୍ରିକେଟରମାନେ ଭୂୟସୀ ପ୍ରଶଂସା କରିଛନ୍ତି। ରୋହିତ ଏବେ ଭାରତୀୟ ଟି୨୦ ଦଳରେ ଅଧିନାୟକ ହେବା ଉଚିତ ବୋଲି ସେମାନେ ମତ ଦେଇଛନ୍ତି। ରୋହିତଙ୍କ ନେତୃତ୍ୱରେ ମୁମ୍ବାଇ ପଞ୍ଚମଥର ପାଇଁ ଆଇପିଏଲ୍ ଟାଇଟଲ ହାସଲ କରିବା ପରେ ଏଭଳି ମନ୍ତବ୍ୟ ଦେଇଛନ୍ତି ପୂର୍ବତନ କ୍ରିକେଟରମାନେ। ଅନ୍ୟପଟେ ଭାରତୀୟ ନିୟମିତ ଅଧିନାୟକ ବିରାଟ କୋହଲି ୮ଟି ସଂସ୍କରଣ ଖେଳିବା ସତ୍ତ୍ୱେ ଏପର୍ଯ୍ୟନ୍ତ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ପାଇଁ ଆଇପିଏଲ ଟାଇଟଲ ଜିତିପାରି ନାହାନ୍ତି। ରୋହିତ ଟି୨୦ ଓ ଦିନିକିଆ ଫର୍ମାଟରେ କୋହଲିଙ୍କ ଡେପୁଟି ରହିଛନ୍ତି। ସଦ୍ୟ ସମାପ୍ତ ଦିଲ୍ଲୀ ବିପକ୍ଷ ଆଇପିଏଲ୍ ଫାଇନାଲ ମ୍ୟାଚ୍ରେ ରୋହିତ ସର୍ବାଧିକ ଦ୍ରୁତ ୬୮ ରନ ସଂଗ୍ରହ କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଆରସିବି ପ୍ଲେ- ଅଫ୍ରେ ଏଲିମିନେଟ୍ ହୋଇଥିଲା।
ଯଦି ରୋହିତ ଭାରତର ଅଧିନାୟକ ନ ହୁଅନ୍ତି ତେବେ ଏହା ସେମାନଙ୍କ କ୍ଷତି ହେବ, ରୋହିତଙ୍କର ନୁହେଁ ବୋଲି ପୂର୍ବତନ ଓପନର ଗୌତମ ଗମ୍ଭୀର କହିଛନ୍ତି। ରୋହିତ ୫ଟି ଆଇପିଏଲ୍ ଟାଇଟଲ ଜିତିଛନ୍ତି ଓ ଟୁର୍ନାମେଣ୍ଟ ଇତିହାସରେ ସଫଳତମ ଅଧିନାୟକ ସାବ୍ୟସ୍ତ ହୋଇଛନ୍ତି। ଯଦି ରୋହିତଙ୍କୁ ନେତୃତ୍ୱ ଦିଆ ନ ଯାଏ ତେବେ ଏହା ଲଜ୍ଜାଜନକ ବିଷୟ ହେବ। ସୀମିତ ଓଭରରେ ରୋହିତ ନିଶ୍ଚିତ ଭାବେ କୋହଲିଙ୍କଠାରୁ ଭଲ ଅଧିନାୟକ ସାବ୍ୟସ୍ତ ହେବେ। ତେଣୁ ଭାରତର ନେତୃତ୍ୱକୁ ଏବେ ଭାଗ କରିବାର ସମୟ ଆସି ଉପନୀତ ହୋଇଛି। ଭିନ୍ନ ଭିନ୍ନ ଫର୍ମାଟ ପାଇଁ ଅଲଗା ନେତୃତ୍ୱର ଆବଶ୍ୟକତା ରହିଛି। ତେବେ କୋହଲି ଅଧିନାୟକ ହିସାବରେ ଖରାପ କହୁନାହିଁ ବୋଲି ଗମ୍ଭୀର ସ୍ପଷ୍ଟ କରିଛନ୍ତି। ତେବେ ରୋହିତ ଅପେକ୍ଷାକୃତ ଭଲ ଅଧିନାୟକ ହୋଇପାରିବେ ବୋଲି ସେ କହିଛନ୍ତି। ସେହିପରି ପୂର୍ବତନ ଇଂଲଣ୍ଡ ଅଧିନାୟକ ମାଇକେଲ ଭନ୍ ମଧ୍ୟ ରୋହିତଙ୍କ ସପକ୍ଷରେ ମତ ଦେଇଛନ୍ତି। ରୋହିତଙ୍କ ନେତୃତ୍ୱରେ ଭାରତ ଟି୨୦ରେ ଆହୁରି ଭଲ ପ୍ରଦର୍ଶନ କରିବ। ଇଂଲଣ୍ଡ ଓ ଅଷ୍ଟ୍ରେଲିଆ ଭଳି ଭାରତ ପାଇଁ ମଧ୍ୟ ଭିନ୍ନ ଭିନ୍ନ ଫର୍ମାଟ ପାଇଁ ଅଲଗା ଅଧିନାୟକ ନିଯୁକ୍ତ କରିହେବ। କୋହଲି ଜଣେ ସୁପରଷ୍ଟାର ଓ ସୁପର ହ୍ୟୁମାନ। ସେ ଦିନିକିଆ ଓ ଟେଷ୍ଟରେ ଅଧିନାୟକ ରହିବାରେ କୌଣସି ସମସ୍ୟା ନାହିଁ। ପୁଣି ଏହା ହେଲେ କୋହଲିଙ୍କ ଉପରୁ କାର୍ଯ୍ୟଭାର କମିବ ବୋଲି ଭନ୍ କହିଛନ୍ତି। ସେହିପରି ରୋହିତ ଟି୨୦ ଫର୍ମାଟରେ ଅପେକ୍ଷାକୃତ ଭଲ ଅଧିନାୟକ ହୋଇପାରିବେ ବୋଲି ପୂର୍ବତନ ଓପନର ବୀରେନ୍ଦ୍ର ସେହ୍ବାଗ କହିଛନ୍ତି।
