ନୂଆଦିଲ୍ଲୀ, ୧୧।୮: ରୋହିତ ଶର୍ମା ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ଜବରଦସ୍ତ ପ୍ରଦର୍ଶନ କରିଥିଲେ। ତୃତୀୟ ଦିନିକିଆ ମ୍ୟାଚରେ ଏହି ଭାରତୀୟ ଖେଳାଳି ଏକ ଚମତ୍କାର ଶତକ ହାସଲ କରିବା ସହ ତାଙ୍କ ସେହି ସମାଲୋଚକମାନଙ୍କୁ ଜବାବ ଦେଇଥିଲେ, ଯେଉଁମାନେ ବାରମ୍ବାର ତାଙ୍କ ସନ୍ନ୍ୟାସ ନେଇ ଖବର ପ୍ରଚାର କରୁଛନ୍ତି।
ରୋହିତ ଶର୍ମାଙ୍କ ବିଷୟରେ ଏପରିକି ଖବର ମଧ୍ୟ ପ୍ରଚାର ହୋଇଥିଲା ଯେ, ଲର୍ଡସରେ ହେବାକୁ ଥିବା ଦିନିକିଆ ମ୍ୟାଚ ପରେ ସେ ସନ୍ନ୍ୟାସ ଘୋଷଣା କରିବେ। କିନ୍ତୁ ଏହା ପରେ ବିସିସିଆଇକୁ ନିଜେ ସ୍ପଷ୍ଟୀକରଣ ଦେବାକୁ ପଡ଼ିଥିଲା ଯେ, ରୋହିତ ଶର୍ମା ସନ୍ନ୍ୟାସ ନେଉନାହାନ୍ତି।
ତେବେ ଏବେ ପୁଣି ଥରେ ରୋହିତ ଶର୍ମାଙ୍କ ସନ୍ନ୍ୟାସକୁ ନେଇ ଅଟକଳ ଆରମ୍ଭ ହୋଇଛି। ଏହାର କାରଣ ହେଉଛି ଏକ ଖୁସି ଖବର। ଖବର ଅନୁଯାୟୀ, ରୋହିତ ଶର୍ମା ଏକ ରିଆଲିଟି ଶୋ’ରେ କାମ କରିବାକୁ ଯାଉଛନ୍ତି, ଯେଉଁଥିରେ ସେ ଆଙ୍କର ଭୂମିକାରେ ନଜର ଆସିବେ। ଏହି ଶୋ’ର ନାମ ‘ଏଣ୍ଟରଟେନମେଣ୍ଟ କା ହିଟମ୍ୟାନ’ ବୋଲି ଜଣାପଡ଼ିଛି।
କୁହାଯାଉଛି ଯେ, ରୋହିତ ଶର୍ମାଙ୍କ ଏହି ଶୋ’ ସେପ୍ଟେମ୍ବରରେ ଲଞ୍ଚ ହେବ। ଭାରତର ପରବର୍ତ୍ତୀ ଦିନିକିଆ ସିରିଜ ମଧ୍ୟ ସେପ୍ଟେମ୍ବରରେ ୱେଷ୍ଟଇଣ୍ଡିଜ ବିପକ୍ଷରେ ଖେଳାଯିବ। ଏହାକୁ ନେଇ ଅଟକଳ କରାଯାଉଛି ଯେ, ରୋହିତ ଏବେ ରିଆଲିଟି ଶୋ’ରେ ନଜର ଆସିବେ ଏବଂ ୱେଷ୍ଟଇଣ୍ଡିଜ ବିପକ୍ଷ ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜରେ ଖେଳିବେ ନାହିଁ।
ରୋହିତଙ୍କ ପ୍ରଶଂସକମାନେ ଆଶା କରିବେ ଯେ, ଏହି ଖବର ମଧ୍ୟ ଭୁଲ ପ୍ରମାଣିତ ହେଉ। କାରଣ ରୋହିତଙ୍କ ବ୍ୟାଟିଂ ଏବଂ ଫିଟନେସକୁ ଦେଖିଲେ ଲାଗୁଛି ଯେ, ଏହି ଖେଳାଳି ଆସନ୍ତା ବର୍ଷ ହେବାକୁ ଥିବା ଦିନିକିଆ ବିଶ୍ୱକପରେ ଖେଳିପାରନ୍ତି। ତେବେ ସୂତ୍ର ଅନୁଯାୟୀ, କିଛି ଚୟନକର୍ତ୍ତା ଏହା ଚାହୁଁନାହାନ୍ତି।
