ଆରଡ଼ି,୧୦।୭(ଡି.ଏନ.ଏ.): ଭଦ୍ରକ ଜିଲା ଧୁଷୂରୀ ଥାନା ଅଧୀନ ଦୋହରାପାଟଣା ନିକଟରେ ଭଦ୍ରକ-ଆରଡ଼ି ରାଜ୍ୟ ରାଜପଥ ପାର୍ଶ୍ୱରେ ଏକ କମ୍ପାନୀ ପକ୍ଷରୁ ଏକ ଗ୍ୟାସ୍ ଯୋଗାଣ କେନ୍ଦ୍ର ନିର୍ମାଣ ଚାଲିଛି। ୩ବର୍ଷ ହେଲା ଏହି ନିର୍ମାଣ କାର୍ଯ୍ୟ ଚାଲୁ ରହିଛି। ଏଠାରୁ ବିଭିନ୍ନ ସ୍ଥାନକୁ ପାଇପ୍ ବିଛା ଯାଉଛି। ହେଲେ ବିଭାଗୀୟ କର୍ମଚାରୀଙ୍କ ଦାୟିତ୍ୱହୀନତା ଯୋଗୁ ସ୍ଥାନୀୟ ଅଞ୍ଚଳରେ ବିଭିନ୍ନ ସମସ୍ୟା ଉପୁଜୁଛି। ଯାହାକି ଲୋକଙ୍କ ମୁଣ୍ଡବ୍ୟଥାର କାରଣ ହୋଇଛି। ଭାରିଯାନରେ ଆବଶ୍ୟକତାଠାରୁ ଅଧିକ ଓଜନର ପାଇପ୍ ନିଆଯିବା ଯୋଗୁ କୁଳେଇପଦା-ପାରଡିଆ ଆର୍ଡି ରୋଡ୍ ଫାଟିଯାଇଛି। ଏହାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ଏଥିସହ ରାଜ୍ୟ ରାଜପଥ ଉପରେ ସେମାନଙ୍କ ଯାନ ରହିବା ଯୋଗୁ ବିଭିନ୍ନ ସମୟରେ ଦୁର୍ଘଟଣା ଘଟୁଥିବା ଅଭିଯୋଗ ହେଉଛି। ସେହିପରି ପାଇପ୍ ବିଛାଣ ସମୟରେ ରାସ୍ତା ଉପରେ ମାଟି ଜମି ରହି ବର୍ଷାଦିନେ ରାସ୍ତା ସମ୍ପୂର୍ଣ୍ଣ ଖସଡ଼ା ହୋଇଯାଉଛି। ଫଳରେ ବାଇକ୍ ଚାଳକ ଦୁର୍ଘଟଣାର ସମ୍ମୁଖୀନ ହେଉଛନ୍ତି ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି। ଶନିବାର ପୋକଲିନ ଯୋଗେ ପାଇପ ବିଛାଇବା ବେଳେ ରାସ୍ତାର ଉଭୟପାର୍ଶ୍ୱରେ ଶତାଧିକ ଯାନ ଅଟକି ରହିଥିଲା।
ପୂର୍ବରୁ କର୍ମଚାରୀଙ୍କ ବୋଲେରୋ ପାରଡିଆ ଗ୍ରାମର ଜଣେ ବ୍ୟକ୍ତିଙ୍କ ଗାଈକୁ ଧକ୍କା ଦେଇଥିଲା। ଗାଈର ଚିକିତ୍ସା ଖର୍ଚ୍ଚ ପ୍ରାୟ ୫ ହଜାର ଟଙ୍କା ହୋଇଥିବା ବେଳେ କମ୍ପାନୀ ଅଧିକାରୀ ଅର୍ଥରାଶି ଯୋଗାଇଦେବେ କହି ଫେରାର ହୋଇଯାଇଛନ୍ତି। ଉକ୍ତ କମ୍ପାନୀ ଅଧିକାରୀ ଓ କର୍ମଚାରୀଙ୍କ ଏତାଦୃଶ କାର୍ଯ୍ୟ ବିରୋଧରେ ଆନ୍ଦୋଳନ କରିବେ ବୋଲି ସ୍ଥାନୀୟ ଅଧିବାସୀ ଚେତାବନୀ ଦେଇଛନ୍ତି। ରାତିରେ ରାସ୍ତାପାର୍ଶ୍ୱ କାର୍ଯ୍ୟ କରିବା, ଭାରିଯାନରେ ଆବଶ୍ୟକତା ଅନୁସାରେ ପାଇପ୍ ନେବା, ନିର୍ମାଣ କାର୍ଯ୍ୟ ଯଥାସମ୍ଭବ ସାରିବାକୁ ସେମାନେ ଦାବି କରିଛନ୍ତି।
