ଡୁଙ୍ଗୁରିପାଲି ୧୩।୮(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ନାଇକେନପାଲି ଉଚ୍ଚ ପ୍ରାଥମିକ ବିଦ୍ୟାଳୟକୁ ଯିବା ରାସ୍ତାରେ ଜଣେ ବ୍ୟକ୍ତି ଗଛ ପକାଇ ଅବରୋଧ କରିବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ରାସ୍ତ ବନ୍ଦ ହେବାରୁ ବାଧ୍ୟ ହୋଇ ଶିକ୍ଷକମାନେ ଛାତ୍ରଛାତ୍ରୀଙ୍କୁ ଦୀର୍ଘ ୪ ଘଣ୍ଟା ଧରି ରାସ୍ତା ଉପରେ ପାଠ ପଢ଼ାଇଥିଲେ। ପରେ ପୋଲିସ ପ୍ରଶାସନ ଓ ରାଜସ୍ୱ ବିଭାଗୀୟ ଅଧିକାରୀମାନେ ପହଞ୍ଚି ଗ୍ରାମବାସୀଙ୍କୁ ନେଇ ଏହାର ସମାଧାନ କରିବା ପରେ ପିଲାମାନେ ସ୍କୁଲ ଭିତରକୁ ପ୍ରବେଶ କରିଥିଲେ।
ମିଳିଥିବା ସୂଚନା ମୁତାବକ, ନାଇକେନପାଲି ଗ୍ରାମର ସ୍ୱର୍ଗତ ଶ୍ରୀବଚ୍ଛ ସାହୁ ଆଜକୁ ୩୦ ବର୍ଷ ପୂର୍ବେ ଗ୍ରାମବାସୀ ଓ ସ୍କୁଲ ପ୍ରଶାସନର ସହମତିରେ ନିଜ ଜମିକୁ ବିଦ୍ୟାଳୟକୁ ହସ୍ତାନ୍ତର କରିଥିଲେ ଏବଂ ଏହାର ବଦଳରେ ରାଜସ୍ୱ ବିଭାଗ ପକ୍ଷରୁ ତାଙ୍କୁ ଅନ୍ୟ ଏକ ଜମିର ପଟ୍ଟା ଦିଆଯାଇଥିଲା। ସେହି ଜମି ଦେଇ ହିଁ ସ୍କୁଲକୁ ଯିବା ପାଇଁ ରାସ୍ତା ତିଆରି ହୋଇଥିଲା, ଯାହାକୁ ଦୈନନ୍ଦିନ ପ୍ରାଥମିକ, ଉଚ୍ଚ ପ୍ରାଥମିକ ବିଦ୍ୟାଳୟ ଏବଂ ଅଙ୍ଗନୱାଡି କେନ୍ଦ୍ରର ଛାତ୍ରଛାତ୍ରୀମାନେ ଯିବାଆସିବା ପାଇଁ ବ୍ୟବହାର କରିଥାଆନ୍ତି।
ତେବେ ଗୁରୁବାର ସକାଳ ପ୍ରାୟ ୯:୩୦ ମିନିଟ୍ ସମୟରେ ସ୍ୱର୍ଗତ ଶ୍ରୀବଚ୍ଛଙ୍କ ତିନି ପୁଅଙ୍କ ମଧ୍ୟରୁ ମାଲ ସାହୁ ନାମକ ଜମି ମାଲିକ ବିଦ୍ୟାଳୟକୁ ଯିବା ରାସ୍ତାରେ ଗଛ ପକାଇ ରାସ୍ତାକୁ ସମ୍ପୂର୍ଣ୍ଣ ଅବରୋଧ କରିଦେଇଥିଲେ। ଏହି କାରଣରୁ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ସମେତ ଦୁଇଟି ଅଙ୍ଗନୱାଡି କେନ୍ଦ୍ର ଏବଂ ଶିଶୁ ବାଟିକାର ମୋଟ ୧୩୩ ଜଣ ଛାତ୍ରଛାତ୍ରୀ ସ୍କୁଲ ଭିତରକୁ ଯାଇପାରି ନଥିଲେ। ପରିସ୍ଥିତିକୁ ଦୃଷ୍ଟିରେ ରଖି ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଜେଠୁ ସାହୁ, ଉଚ୍ଚ ପ୍ରାଥମିକ ବିଦ୍ୟାଳୟର ବଳରାମ ପଧାନ, ଅନ୍ୟ ଶିକ୍ଷକଶିକ୍ଷୟିତ୍ରୀ ଏବଂ ଅଙ୍ଗନୱାଡି କର୍ମୀମାନେ ବାଧ୍ୟ ହୋଇ ରାସ୍ତା ଉପରେ ପିଲାମାନଙ୍କୁ ପାଠ ପଢ଼ାଇଥିଲେ। ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ଚାଲିଥିବା ଏହି ବିଦ୍ୟାଳୟର ପିଲାମାନେ ବାହାରେ ପାଠ ପଢ଼ିବା ଦୃଶ୍ୟ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଥିଲା।
ଘଟଣା ସମ୍ପର୍କରେ ଜାଣିବା ପରେ ଗ୍ରାମବାସୀ ସ୍ଥାନୀୟ ପୋଲିସ ଓ ରାମପୁର ତହସିଲଦାରଙ୍କୁ ଅବଗତ କରାଇଥିଲେ। ଖବର ପାଇ ରାମପୁର ଥାନା ଅଧିକାରୀ ବିନୋଦିନୀ ବରିହା, ରାମପୁର ରାଜସ୍ୱ ନିରୀକ୍ଷକ ପଞ୍ଚାନନ ନାଏକ ଏବଂ ସିଆରସିସି ପ୍ରଦୀପ୍ତ ଦାଶ ଘଟଣାସ୍ଥଳରେ ପହଞ୍ଚିଥିଲେ। ପ୍ରଶାସନିକ ଅଧିକାରୀମାନେ ଗ୍ରାମବାସୀଙ୍କୁ ନେଇ ଜମି ଭାଗବଣ୍ଟା ଓ ବିବାଦର ସମାଧାନ କରିବା ପରେ ଦିନ ୧୨:୩୦ ମିନିଟ୍ ସମୟରେ ମାଲ ସାହୁ ରାସ୍ତାରୁ ଗଛ ହଟାଇଥିଲେ।
ଏହିପରି ଭାବେ ପ୍ରାୟ ୪ ଘଣ୍ଟା ଧରି ପିଲାମାନଙ୍କ ପାଠପଢ଼ାରେ ବାଧା ସୃଷ୍ଟି ହୋଇଥିଲା। ରାସ୍ତା ଖୋଲାଯିବା ପରେ ଶିକ୍ଷକମାନେ ଛାତ୍ରଛାତ୍ରୀଙ୍କୁ ସ୍କୁଲ ଭିତରକୁ ପ୍ରବେଶ କରାଇ ପାଠପଢ଼ା ଜାରି ରଖିଥିଲେ ଏବଂ ପରେ ସେମାନଙ୍କ ପାଇଁ ମଧ୍ୟାହ୍ନ ଭୋଜନର ବ୍ୟବସ୍ଥା କରାଯାଇଥିଲା।
