ଅମ୍ବାଭୋନା,୧୭।୪(ଡି.ଏନ.ଏ):ବରଗଡ଼ ଜିଲା ଅମ୍ବାଭୋନା ବ୍ଲକରେ ମାଓବାଦୀମାନେ ପୁଣି ନିଜ ଉପସ୍ଥିତି ଜାହିର କରିଛନ୍ତି। ଦୀର୍ଘଦିନର ନିରବତା ପରେ ରବିବାର ଉକ୍ତ ବ୍ଲକ ଅନ୍ତର୍ଗତ ଲଖନପୁର ନିକଟସ୍ଥ ଚକ୍ରାମାଳ-ବାବେବିରା ମୁଖ୍ୟରାସ୍ତାର ଚକ୍ରାମାଳ ପୋଲ ନିକଟରେ ମାଓବାଦୀଙ୍କ ଏକ ପୋଷ୍ଟର ଟଙ୍ଗାଯାଇଥିବା ରବିବାର ଦେଖିବାକୁ ମିଳିଛି। ଉକ୍ତ ପୋଷ୍ଟରରେ ଚକ୍ରାମାଳ-ବାବେବିରା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ଆଣି ହିନ୍ଦୀ ଭାଷାରେ ଠିକାଦାରଙ୍କ ଦୁର୍ନୀତି ନେଇ ଉଲ୍ଲେଖ ରହିଛି। ତେବେ ଖବର ଲେଖାହେବା ସୁଦ୍ଧା ସେହି ପୋଷ୍ଟରକୁ ଖୋଲାଯାଇନାହିଁ। ଏ ସମ୍ପର୍କରେ ଅମ୍ବାଭୋନା ଥାନା ଏଏସ୍ଆଇ ବିଜୟ କନ୍ଧେରଙ୍କୁ ପଚାରିବାରୁ ସେଠାରେ ପୋଷ୍ଟର ଝୁଲୁଥିବା ନେଇ ସୂଚନା ମିଳିଛି ବୋଲି କହିଥିଲେ। ପ୍ରକାଶଥାଉକି, ୨୦୧୪ ମସିହାରେ ଉକ୍ତ ବ୍ଲକର ଲଖନପୁର ରାସ୍ତା ନିର୍ମାଣରେ ହୋଇଥିବା ଦୁର୍ନୀତି ବିରୋଧରେ ମାଓବାଦୀମାନେ ସେତେବେଳେ ଠିକାଦାର କ୍ୟାମ୍ପର ଜେସିବି, ରୋଲର, ଟ୍ରାକ୍ଟର ଆଦି ପୋଡ଼ି ଦେବା ସହିତ ପୋଷ୍ଟର ଲଗାଇଥିଲେ। ପୁଣି ୮ବର୍ଷ ପରେ ଏଭଳି ରାସ୍ତାକାମରେ ଅନିୟମିତତା ଅଭିଯୋଗ କରି ମାଓବାଦୀମାନେ ପୋଷ୍ଟର ଲଗାଇବା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
