ନୂଆଦିଲ୍ଲୀ, ୧୫।୧ : କମ୍ପ୍ୟୁଟର, ସ୍ମାର୍ଟଫୋନ କିମ୍ବା ଅନ୍ୟାନ୍ୟ ଡିଭାଇସରେ ଅପଡେଟ ଆସିବାକୁ ସକାରାତ୍ମକ ଭାବେ ଗ୍ରହଣ କରାଯାଇଥାଏ। ଏହା ଦ୍ୱାରା ଏହାର ସୁରକ୍ଷାସ୍ତର ଅପଡେଟ ହୋଇଥାଏ। ବଗ୍ ଫିକ୍ସ୍ କରାଯାଇଥାଏ। ଫଳରେ ଭାଇରସ କିମ୍ବା ମାଲୱେର୍ ଆକ୍ରମଣର ଆଶଙ୍କା କମିଯାଏ। ମାତ୍ର ଗୁଗୁଲର କ୍ରୋମ ବ୍ରାଉଜରର ଅପଡେଟ୍ ଲୋକଙ୍କ ସମସ୍ୟାକୁ ବଢ଼ାଇ ଦେଉଥିବା ଅଭିଯୋଗ ହେଉଛି। ଏହାକୁ ଅପଡେଟ କରିବା ପରେ ସିଷ୍ଟମରେ ଏକ ରାନସମୱେର ଆସୁଛି, ଯାହା ୟୁଜରଙ୍କ ଡାଟାକୁ କ୍ଷତି ପହଞ୍ଚାଉଛି ।
ଏକ ରିପୋର୍ଟ ଅନୁଯାୟୀ, ଗୁଗୁଲ କ୍ରୋମ ଏବଂ ମାଇକ୍ରୋସଫ୍ଟ ଏଜକୁ ଅପଡେଟ କରିବା ପରେ ମ୍ୟାଗ୍ନିବେର ରାନସମୱେର ସିଷ୍ଟମରେ ପ୍ରବେଶ କରୁଛି। ତେଣୁ ଏହି ବ୍ରାଉଜର୍ ଗୁଡିକରେ ଅପଡେଟ ଆସିଲେ ଏହାକୁ ଅପଡେଟ ନ କରିବାକୁ ପରାମର୍ଶ ଦିଆଯାଇଛି। ମ୍ୟାଗ୍ନିବେର ରାନସମୱେର ସିଷ୍ଟମରେ ଆସିବା ପରେ ହ୍ୟାକରମାନେ ସହଜରେ ୟୁଜରଙ୍କ ଡାଟା ଚୋରି କରି ବ୍ଲାକମେଲିଂ କରୁଥିବା ଅଭିଯୋଗ ହେଉଛି।
ମ୍ୟାଗ୍ନିବେର ରାନସମୱେର ୟୁଜରଙ୍କ ସିଷ୍ଟମ୍ରେ ପହଞ୍ଚି ଏହାର ସୁରକ୍ଷା ବ୍ୟବସ୍ଥାକୁ ନଷ୍ଟ କରିଥାଏ। ମାଗ୍ନିବର ୟୁଜର ବ୍ରାଉଜିଂ କରୁଥିବା ସମୟରେ ଏହା ଅନ୍ୟ ମାଲୱେର୍ ଡାଉନଲୋଡ ହେବାର ଆଶଙ୍କା ରହିଥାଏ। ୟୁଜର କ୍ରୋମ ଏବଂ ଏଜ ବ୍ରାଉଜରରେ କାମ କରନ୍ତି, ସେତେବେଳେ ନକଲି ୱେବପେଜ୍ଗୁଡ଼ିକ ମାଧ୍ୟମରେ ମାଲୱେୟାର ଡିଷ୍ଟ୍ରିବ୍ୟୁଟ୍ ହୁଏ।
ଥରେ ୟୁଜର ‘ଅପଡେଟ କ୍ରୋମ’ କିମ୍ବା ’ଏଜ ଅପଡେଟ’ ବଟନ ଉପରେ କ୍ଲିକ କଲା ପରେ, ପେଜ .appx ନାମକ ଏକ ବ୍ରାଉଜର୍ ଏକ୍ସଟେନଶନ ଡାଉନଲୋଡ କରିଦେଇଥାଏ। ଏହି ଏକ୍ସଟେନଶନ ବ୍ୟାକ୍ ଗ୍ରାଉଣ୍ଡରେ ଆକ୍ଟିଭ୍ ହୋଇଯାଏ । ଏହା ପରେ ୟୁଜରଙ୍କର ୱିଣ୍ଡୋଜ ଫାଇଲକୁ କ୍ଷତି ପହଞ୍ଚାଇବା ଆରମ୍ଭ କରେ। ୟୁଜରଙ୍କୁ ଏସମ୍ପର୍କରେ କୌଣସି ସୂଚନା ମଧ୍ୟ ମିଳିନ ଥାଏ।
ମ୍ୟାଗ୍ନିବେର ରାନସମୱେର ସିଷ୍ଟମରେ ଥିବା ସମସ୍ତ ଫାଇଲଗୁଡ଼ିକର ଏନକ୍ରିପସନ ଆରମ୍ଭ କରେ। ଏନକ୍ରିପସନ ପ୍ରକ୍ରିୟା ଶେଷ ହେବାପରେ ସିଷ୍ଟମରେ କୌଣସି ଫାଇଲ ଖୋଲିବାକୁ ସମର୍ଥ ହେବେ ନାହିଁ। ଏହି ସମୟରେ, ହ୍ୟାକାମାନେ ୟୁଜରଙ୍କୁ ରାନସମ୍ ନୋଟ ପ୍ୟାଡ ପଠାଇଥାନ୍ତି। ୟୁଜର ଦାବି କରାଯାଇଥିବା ଟଙ୍କା ପୈଠ କଲେ ଫାଇଲ ଖୋଲିବା ସମ୍ଭବ ହୋଇଥାଏ। କେବଳ ଏତିକି ନୁହେଁ, ମ୍ୟାଗ୍ନିବେର ରାନସମୱେର ଟୋର ବ୍ରାଉଜରକୁ ଡାଉନଲୋଡ କରିବାକୁ କହିଥାଏ।
ତେବେ ଆଣ୍ଟିଭାଇରସ ବ୍ୟବହାର କରିବା ଦ୍ୱାରା ମ୍ୟାଗ୍ନିବେର ରାନସମୱେରରୁ ୟୁଜର ସୁରକ୍ଷିତ ରହିପାରିବେ ବୋଲି ପରାମର୍ଶ ଦିଆଯାଇଥାଏ। ଆଣ୍ଟିଭାଇରସ ଅପଡେଟ ଜାରି ରଖିଲେ ସୁରକ୍ଷା ବ୍ୟବସ୍ଥା ସୁଦୃଢ଼ ହୋଇ ରହିଥାଏ। ସବୁବେଳେ ମାଗଣା ଆଣ୍ଟିଭାଇରସକୁ ଏଡ଼ାଇବାକୁ ଚେଷ୍ଟା କଲେ ଭଲ। କେବଳ ଏହାର ଦେୟ ସଂସ୍କରଣ ବ୍ୟବହାର କରିବା ଉପରେ ଗୁରୁତ୍ୱାରୋପ କରାଯାଇଥାଏ।
