ନୂଆଦିଲ୍ଲୀ,୨।୯: ଆଫଗାନିସ୍ତାନ ବିପକ୍ଷରେ ହେବାକୁ ଥିବା ଟି-୨୦ ସିରିଜ ପାଇଁ ବିସିସିଆଇ ମଙ୍ଗଳବାର ଭାରତୀୟ ଦଳ ଘୋଷଣା କରିଛି। ଶ୍ରେୟସ ଆୟରଙ୍କ ନେତୃତ୍ୱରେ ୧୫ ଜଣିଆ ଦଳରେ ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କୁ ମଧ୍ୟ ସ୍ଥାନ ମିଳିଛି। ନିକଟରେ ଇଂଲଣ୍ଡ ବିପକ୍ଷରେ ଅନ୍ତର୍ଜାତୀୟ ଡେବ୍ୟୁ କରିଥିବା ବୈଭବଙ୍କ ପାଇଁ ଏହା ପ୍ରଥମ ଘରୋଇ ଟି-୨୦ ସିରିଜ ହେବ।
ଏହି ସିରିଜ ପାଇଁ ଭାରତୀୟ ଦଳକୁ ଜସପ୍ରୀତ ବୁମରାଙ୍କ ମଧ୍ୟ ପ୍ରତ୍ୟାବର୍ତ୍ତନ ହୋଇଛି। ତେବେ ଫିଟନେସ କ୍ଲିୟରାନ୍ସ ମିଳିବା ପରେ ହିଁ ସେ ମ୍ୟାଚ ଖେଳିପାରିବେ। ଅନ୍ୟପକ୍ଷରେ, ଦଳରେ ସ୍ଥାନ ପାଇବେ ବୋଲି ଆଶା କରାଯାଉଥିବା କିଛି ବଡ଼ ନାଁକୁ ଚୟନକର୍ତ୍ତାମାନେ ବାଦ ଦେଇଛନ୍ତି।
ଭାରତର ପୂର୍ବତନ ଟି-୨୦ ସିରିଜରେ ରିଙ୍କୁ ସିଂହ ଦଳରେ ଥିଲେ। କିନ୍ତୁ ଆଫଗାନିସ୍ତାନ ବିପକ୍ଷ ଟି-୨୦ ସିରିଜ ପାଇଁ ତାଙ୍କୁ ସ୍ଥାନ ମିଳିନାହିଁ। ଭାରତ ପାଇଁ ୪୮ଟି ଟି-୨୦ ଅନ୍ତର୍ଜାତୀୟ ମ୍ୟାଚ ଖେଳି ରିଙ୍କୁ ୭୦୨ ରନ କରିଛନ୍ତି। ଏଥିରେ ୩ଟି ଅର୍ଦ୍ଧଶତକ ରହିଛି। ତାଙ୍କ ଷ୍ଟ୍ରାଇକ ରେଟ ୧୫୬.୩୪ ଥିବାବେଳେ ଦଳରେ ତାଙ୍କ ଭୂମିକା ଜଣେ ଫିନିଶର ଭାବେ ରହିଛି।
ସ୍ପିନର କୁଲଦୀପ ଯାଦବ ମଧ୍ୟ ଆଫଗାନିସ୍ତାନ ବିପକ୍ଷ ସିରିଜ ପାଇଁ ଭାରତୀୟ ଦଳରେ ସ୍ଥାନ ପାଇନାହାନ୍ତି। କୁଲଦୀପଙ୍କୁ ନେଇ ଦଳ ଚୟନରେ ନିରନ୍ତର ପରିବର୍ତ୍ତନ ଦେଖିବାକୁ ମିଳୁଛି। ଗୋଟିଏ ସିରିଜରେ ଖେଳିବା ପରେ ପରବର୍ତ୍ତୀ ସିରିଜରୁ ସେ ବାଦ ପଡ଼ୁଛନ୍ତି।
ଏହି ବର୍ଷ ଟି-୨୦ ବିଶ୍ୱକପ ଜିତିଥିବା ଭାରତୀୟ ଦଳର ଅଂଶ ଥିଲେ କୁଲଦୀପ। ସେ ବିଶ୍ୱକପରେ ପାକିସ୍ତାନ ବିପକ୍ଷରେ ନିଜର ଶେଷ ଟି-୨୦ ମ୍ୟାଚ ଖେଳିଥିଲେ। ୩୧ ବର୍ଷୀୟ କୁଲଦୀପ ଭାରତ ପାଇଁ ୫୪ଟି ଟି-୨୦ ମ୍ୟାଚ ଖେଳି ୯୫ଟି ଉଇକେଟ୍ ନେଇଛନ୍ତି।
ଅଲରାଉଣ୍ଡର କୃଣାଲ ପାଣ୍ଡ୍ୟାଙ୍କୁ ମଧ୍ୟ ଦଳରେ ସ୍ଥାନ ମିଳିନାହିଁ। ଗତ ଦୁଇଟି ଆଇପିଏଲ ସିଜିନରେ ବ୍ୟାଟ ଓ ବଲରେ ଭଲ ପ୍ରଦର୍ଶନ କରିଥିବାରୁ ଆଫଗାନିସ୍ତାନ ବିପକ୍ଷ ସିରିଜରେ ତାଙ୍କ ପ୍ରତ୍ୟାବର୍ତ୍ତନ ହୋଇପାରେ ବୋଲି ଆଶା କରାଯାଉଥିଲା। କିନ୍ତୁ ଚୟନକର୍ତ୍ତାମାନେ ପୁଣିଥରେ ତାଙ୍କୁ ଅଣଦେଖା କରିଛନ୍ତି। ଏହା ପରେ କୃଣାଲ ଏକ ଷ୍ଟୋରୀ ଶେୟାର କରି ଏବେ ବି ଆଶା ବଜାୟ ରହିଛି ବୋଲି ଲେଖିଥିଲେ। ୩୫ ବର୍ଷୀୟ କୃଣାଲ ଭାରତ ପାଇଁ ୧୯ଟି ଟି-୨୦ ମ୍ୟାଚ ଖେଳିଛନ୍ତି। ୧୦ଟି ଇନିଂସରେ ସେ ୧୨୪ ରନ କରିବା ସହ ୧୫ଟି ଉଇକେଟ୍ ମଧ୍ୟ ନେଇଛନ୍ତି। ୨୦୨୧ ପରେ ଭାରତୀୟ ଟି-୨୦ ଦଳକୁ ତାଙ୍କ ପ୍ରତ୍ୟାବର୍ତ୍ତନ ହୋଇନାହିଁ।
ଭାରତୀୟ ଦଳ: ଶ୍ରେୟସ ଆୟର (ଅଧିନାୟକ), ତିଳକ ବର୍ମା (ଉପଅଧିନାୟକ), ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ସଞ୍ଜୁ ସାମସନ (ଉଇକେଟ୍କିପର), ଈଶାନ କିଶନ (ଉଇକେଟ୍କିପର), ଶିବମ ଦୁବେ, ନୀତୀଶ କୁମାର ରେଡ୍ଡୀ, ଅକ୍ଷର ପଟେଲ, ୱାଶିଂଟନ ସୁନ୍ଦର, ବରୁଣ ଚକ୍ରବର୍ତ୍ତୀ, ରବି ବିଷ୍ଣୋଇ, ଜସପ୍ରୀତ ବୁମରା, ଅର୍ଶଦୀପ ସିଂହ, ହର୍ଷିତ ରାଣା।
