ନୂଆଦିଲ୍ଲୀ,୨୯।୮: NDAରେ ଦଳିତ ସଂରକ୍ଷଣକୁ ନେଇ ଫାଟ ସ୍ପଷ୍ଟ ଦେଖାଯାଉଛି। ଲୋକ ଜନଶକ୍ତି ପାର୍ଟି (ରାମବିଲାସ) ର ମୁଖ୍ୟ କେନ୍ଦ୍ରମନ୍ତ୍ରୀ ଚିରାଗ ପାଶୱାନ, ମୋଦି କ୍ୟାବିନେଟରେ ଥିବା ନିଜର ସହଯୋଗୀ ଏବଂ ହିନ୍ଦୁସ୍ତାନ ଆୱାମୀ ମୋର୍ଚ୍ଚା (HAM) ର ଅଧ୍ୟକ୍ଷ ଜୀତନରାମ ମାଂଝୀଙ୍କୁ ଇସ୍ତଫା ଦେବାକୁ କହିଛନ୍ତି। କେବଳ ଏତିକି ନୁହେଁ, ଚିରାଗ ପାଶୱାନ ବିହାର ସରକାରରେ ମନ୍ତ୍ରୀ ଥିବା ସନ୍ତୋଷ ସୁମନଙ୍କୁ ମଧ୍ୟ ନିଜ ପଦ ଛାଡ଼ିବାକୁ କହିଛନ୍ତି। କେନ୍ଦ୍ରମନ୍ତ୍ରୀ ଶନିବାର କହିଛନ୍ତି ଯେ ଜୀତନରାମ ମାଂଝୀ ଦଳିତ ସଂରକ୍ଷଣରେ ସବ-କ୍ୟାଟେଗୋରାଇଜେସନ (ଉପ-ବର୍ଗୀକରଣ) କଥା କହୁଛନ୍ତି, ଏପରି ସ୍ଥିତିରେ ସେ ଏବଂ ତାଙ୍କ ପୁଅ ସବୁଠାରୁ ପ୍ରଥମେ ମନ୍ତ୍ରୀପଦ ଛାଡ଼ିବା ଉଚିତ।
ଶନିବାର ସାମ୍ୱାଦିକମାନଙ୍କ ସହ କଥା ହୋଇ ଚିରାଗ ପାଶୱାନ କହିଛନ୍ତି “ଅନୁସୂଚିତ ବର୍ଗର ସମସ୍ତ ଜାତି ଏକାଠି ଛିଡ଼ା ହୋଇଛନ୍ତି, ସେଥିପାଇଁ ଶକ୍ତିଶାଳୀ ଅଛନ୍ତି। ଯଦି ସେମାନଙ୍କର ଏକତା ନ ରହେ, ତେବେ ସଂରକ୍ଷଣ ଶେଷ ହୋଇଯିବ।” ସେ କହିଛନ୍ତି “ମୁଁ ସେତେବେଳେ ବି ସ୍ୱର ଉତ୍ତୋଳନ କରିଥିଲି, ଯେତେବେଳେ ଦଳିତ ଏବଂ ମହାଦଳିତର ବିଭାଜନ କରିବାକୁ ଚେଷ୍ଟା କରାଯାଇଥିଲା। ଆମ ପାର୍ଟି ଦଳିତ ସଂରକ୍ଷଣରେ ସବ-କୋଟା (ଉପ-କୋଟା) ସପକ୍ଷରେ ଆଦୌ ନାହିଁ।” ଚିରାଗ ପାଶୱାନ ଏହାକୁ ସମ୍ପୂର୍ଣ୍ଣ ଭାବେ ସମ୍ୱିଧାନର ଅବମାନନା ବୋଲି ଆଖ୍ୟା ଦେଇଛନ୍ତି। ସେ କହିଛନ୍ତି “ସମ୍ୱିଧାନରେ ଦଳିତମାନଙ୍କୁ ବହୁତ ଭାବିଚିନ୍ତି ସଂରକ୍ଷଣ ଦିଆଯାଇଛି, ଏହା ସମାଜ ଏବଂ ଅଛୁଆଁଭାବ ଆଧାରରେ ଦିଆଯାଇଛି, ସେଥିରେ କୌଣସିଠାରେ ବି ଆର୍ଥିକ ସ୍ଥିତିକୁ ସଂରକ୍ଷଣର ଆଧାର ବୋଲି କୁହାଯାଇ ନାହିଁ।”
ଚିରାଗ ପାଶୱାନ କେନ୍ଦ୍ରମନ୍ତ୍ରୀ ଜୀତନରାମ ମାଂଝୀଙ୍କୁ କଡ଼ା ଜବାବ ଦେଇ କହିଛନ୍ତି, “ଯଦି ସେ ଚାହୁଁଛନ୍ତି ଯେ ସଂରକ୍ଷଣରେ ସବ-କ୍ୟାଟେଗୋରୀ (ଉପ-ବର୍ଗ) ହେବା ଉଚିତ, ତେବେ ସବୁଠାରୁ ପ୍ରଥମେ ସେ ମନ୍ତ୍ରୀ ପଦ ଛାଡ଼ନ୍ତୁ ଏବଂ ବିହାର ସରକାରରେ ମନ୍ତ୍ରୀ ଥିବା ତାଙ୍କ ପୁଅ ସନ୍ତୋଷ ସୁମନ ମଧ୍ୟ ଇସ୍ତଫା ଦିଅନ୍ତୁ।” ସେ କହିଛନ୍ତି “ଦୁଇ ବାପ-ପୁଅ ଯଦି ସମ୍ୱିଧାନ ବଦଳାଇବାକୁ ଚାହୁଁଛନ୍ତି, ତେବେ ଇସ୍ତଫା ଦେବା ପରେ ସଂରକ୍ଷଣ ମୁଦ୍ଦାରେ ଗୃହକୁ ଆସି ଆଲୋଚନା କରନ୍ତୁ।” ବାସ୍ତବରେ, ଶୁକ୍ରବାର ଦିନ ସନ୍ତୋଷ ସୁମନ ସଂରକ୍ଷଣ ବ୍ୟବସ୍ଥାର ସମୀକ୍ଷା ମୁଦ୍ଦା ଉଠାଇଥିଲେ। ସେ କହିଥିଲେ ଯେ ସେ ଚାହୁଁଛନ୍ତି SC-ST ସଂରକ୍ଷଣରେ ସବ-କ୍ୟାଟେଗୋରାଇଜେସନ ଲାଗୁ ହେଉ। ଜୀତନରାମ ମାଂଝୀଙ୍କ ପୁଅ କହିଥିଲେ ଯେ ତାଙ୍କର ବିଶ୍ୱାସ କେଉଁ ସମୁଦାୟକୁ ସଂରକ୍ଷଣର କେତେ ଲାଭ ମିଳୁଛି, ଏହାର ମୂଲ୍ୟାଙ୍କନ ହେବା ଜରୁରୀ। ସେ କହିଥିଲେ ଯେ ଅନେକ ଜାତି ଏତେ ପଛୁଆ ହୋଇ ରହିଛନ୍ତି, ଯେଉଁମାନଙ୍କୁ ସଂରକ୍ଷଣର ପୂରା ଫାଇଦା ମିଳିପାରୁ ନାହିଁ।
