ଭୁବନେଶ୍ୱର,୧୪।୮(ବ୍ୟୁରୋ): ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ରାଜସ୍ବ ବିପର୍ଯ୍ୟୟ ଓ ପରିଚାଳନା ବିଭାଗର ସ୍ବତନ୍ତ୍ର ସଚିବ ଅଜୟ କୁମାର ଦାସଙ୍କୁ ଗୁରୁବାର ଭିଜିଲାନ୍ସ ଗିରଫ କରିଛି। ପରେ ତାଙ୍କୁ ସ୍ବତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଛି।
ଅଜୟଙ୍କ ନାମରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ଆସିଥିଲା। ବୁଧବାର ସକାଳେ ଭିଜିଲାନ୍ସର ୫ଟି ଟିମ୍ ତାଙ୍କ ଘର, ଅଫିସ୍ ସମେତ ୬ଟି ସ୍ଥାନରେ ଚଢାଉ କରିଥିଲା। ଟଙ୍କପାଣି ରୋଡ୍ ରତ୍ନାକର ବାଗ ଲେନ୍ସ୍ଥିତ ପୈତୃକ ତଥା ଆବାସିକ ଘର, ପଟିଆସ୍ଥିତ ଫ୍ଲାଟ, ନୂଆଗଁାରେ ଥିବା ଆଉଟ ହାଉସ, ବାଲେଶ୍ୱରସ୍ଥିତ ଦୁଇ ମହଲା ଘରେ ଚଢ଼ାଉ କରାଯାଇ ତାଙ୍କ ସମ୍ପତ୍ତିର ଯାଞ୍ଚ କରାଯାଇଥିଲା। ଯାଞ୍ଚବେଳେ ମୋଟ ୩କୋଟି ୭୯ ହଜାର ୫୩୮ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି। ତାଙ୍କ ନାମରେ ୨ଟି ଦୁଇ ମହଲାବିଶିଷ୍ଟ କୋଠା ରହିଛି। ଏହାର ଆନୁମାନିକ ମୂଲ୍ୟ ୬୭ ଲକ୍ଷ ୨୦ ହଜାର ୯୫୧ ଟଙ୍କା ହେବ। ଗୋଟିଏ ଏକ ତାଲାବିଶିଷ୍ଟ କୋଠାର ମୂଲ୍ୟ ୭ଲକ୍ଷ ୯ ହଜାର ୯୮୬ ଟଙ୍କାରେ ହିସାବ କରିଛି ଭିଜିଲାନ୍ସ। ସେହିପରି ପୁରୀ ଓ ଭୁବନେଶ୍ୱରରେ ଥିବା ୪ଟି ଫ୍ଲାଟର ମୂଲ୍ୟ ୬୭ଲକ୍ଷ ୨୨ହଜାର ୧୬୦ ଟଙ୍କା ହେବ ବୋଲି କୁହାଯାଇଛି। ଏହାବାଦ୍ ଭୁବନେଶ୍ୱର,ବାଲେଶ୍ୱର ଓ ଭଦ୍ରକରେ ୧୨ଲକ୍ଷ ୯୫ ହଜାର ୧୦୦ ଟଙ୍କାର ୯ଟି ପ୍ଲଟ ରହିଛି। ବ୍ୟାଙ୍କ୍ ଜମା ୫୦ ଲକ୍ଷ ୮୫୩ ହଜାର ୭୯୯ ଟଙ୍କା ରହିଥିବାବେଳେ ସାହାରା ଇଣ୍ଡିଆରେ ୪ଲକ୍ଷ ଟଙ୍କା ଲଗାଇଛନ୍ତି। ୨ଟି ଚାରିଚକିଆ ଯାନର ମୂଲ୍ୟ ୧୧ଲକ୍ଷ ୫୦ ହଜାର ଟଙ୍କା ଓ ୨ଟି ଦୁଇଚକିଆ ଗାଡ଼ିର ମୂଲ୍ୟକୁ ୧ଲକ୍ଷ ୨ହଜାର ଟଙ୍କାରେ ହିସାବ କରାଯାଇଛି। ୨୬ ଲକ୍ଷ ୧୧ହଜାର ୬୫ ଟଙ୍କାର ସୁନା ଓ ରୁପା ଅଳଙ୍କାର ଏବଂ ନଗଦ ୨ ଲକ୍ଷ ୬୯ ହଜାର ୧୧୦ଟଙ୍କାର ମିଳିଛି। ଘରର ବିଭିନ୍ନ ସାମଗ୍ରୀର ମୂଲ୍ୟ ୮ଲକ୍ଷ ୨୭ ହଜାର ୨୫୬ ଟଙ୍କା ରହିଛି। ଏହାସହ ୮୧ ଲକ୍ଷ ୫୩ ହଜାର ୬୧୧ଟଙ୍କାର ବିଭିନ୍ନ ଜୀବନ ବୀମା ରହିଥିବା ଭିଜିଲାନ୍ସ ରିପୋର୍ଟରେ ଉଲ୍ଲେଖ କରାଯାଇଛି।
ଅଜୟଙ୍କ ଚାକିରି କାଳ ଆଉ ଦୁଇମାସ ଥିବାରୁ ଭିଜିଲାନ୍ସ ଦ୍ୱାରା ଗିରଫ ହୋଇ ଜେଲ ଯିବା ଘଟଣାକୁ ନେଇ ନାନା ଚର୍ଚ୍ଚା ହେଉଛି। ଅନ୍ୟପକ୍ଷରେ ତାଙ୍କ ବିରୋଧରେ ସରକାରୀ ସ୍ତରରେ କାଯ୍ୟାନୁଷ୍ଠାନ ପାଇଁ ମଧ୍ୟ ପ୍ରକ୍ରିୟା ଆରମ୍ଭ ହୋଇଥିବା ସୂଚନା ମିଳିଛି।
