କାନବେରା: ଲୋକେ କାମ କରିବା ପରେ ଅବସର ଜୀବନକୁ ଭିନ୍ନ ଢଙ୍ଗରେ ପାଳିବାକୁ ଆଶା କରିଥାନ୍ତି। କେହି ଶାନ୍ତ ସ୍ଥାନରେ ବୁଲିବାକୁ ପସନ୍ଦ କରୁଥିବାବେଳେ କେତେକ ତାଙ୍କ ସଉକ ପୂରଣ କରିବାରେ ଲାଗିପଡ଼ନ୍ତି। ହେଲେ ନିକଟରେ ଅଷ୍ଟ୍ରେଲିଆର ଏକ ଦମ୍ପତି ଅବସରପ୍ରାପ୍ତ ଜୀବନରେ ଏକ ଘରର ଯୋଜନା କରିଛନ୍ତି। ଏହି ଦମ୍ପତି ନିଜ ଘରକୁ ବିକି ପୂରା ଜୀବନ ଏକ କ୍ରୁଜ୍ ଜାହାଜରେ ରହିବାକୁ ସ୍ବପ୍ନ ଦେଖିଛନ୍ତି। ୮୦ ବର୍ଷୀୟ ମାଇକ ସୋରୋକର ଏବଂ ତାଙ୍କ ସ୍ତ୍ରୀ ୭୫ ବର୍ଷୀୟା ବାରବରା ଏମ୍ୱି ନୌରେଟିଭ୍ ଜାହାଜରେ ୨.୫ ମିଲିୟନ୍ ଅର୍ଥାତ୍ ୨୦ କୋଟି ଦେଇ ଏକ କ୍ୟାବିନ୍ କିଣିଛନ୍ତି। ଏବେ ସେ ତାହାର କିସ୍ତି ଭରୁଛନ୍ତି। ମାଇକ ଏବଂ ବାରବରା ତାଙ୍କ ବାକିତକ ଜୀବନ ସମୁଦ୍ର ମଝିରେ କିମ୍ବା ସାଗର କୂଳରେ ବିତାଇବାକୁ ଚାହୁଁଛନ୍ତି। କିଛି କ୍ରୁଜ୍ ଜାହାଜ ତାଙ୍କର ସମସ୍ତ କ୍ୟାବିନ ବିକ୍ରି କରିବା ସହିତ ସେଥିରେ ଛୁଟି କଟାଇବାକୁ ଆସୁଥିବା ଲୋକଙ୍କ ପାଇଁ ସମସ୍ତ ପ୍ରକାର ସୁବିଧା ଉପଲବ୍ଧ କରିବ ବୋଲି ଜାହାଜ ପ୍ରସ୍ତୁତ କରୁଥିବା କମ୍ପାନୀ ଦାବି କରିଛିି। ପୂର୍ବରୁ ମାଇକ ଏବଂ ବାରବରା ମାତ୍ର ୪ ଥର ହିଁ କ୍ରୁଜ୍ରେ ଯାତ୍ରା କରିଛନ୍ତି। ଦମ୍ପତି କହିଛନ୍ତି, ସେ ଆଗକୁ ବହୁତସାରା ଲୋକଙ୍କ ସହିତ ଅନେକ ଜାଗା ବୁଲିବାକୁ ଉତ୍ସାହିତ ଅଛନ୍ତି। ଯେଉଁ କ୍ରୁଜ୍ ଜାହାଜରେ ଦମ୍ପତି କ୍ୟାବିନ କିଣିଛନ୍ତି, ଏବେ ତାହା ତିଆରି ଚାଲିଛି। କିଛି ବର୍ଷ ମଧ୍ୟରେ ତାହା ସମ୍ପୂର୍ଣ୍ଣ ହେବ ବୋଲି ଜଣାପଡ଼ିଛି। ସେହି ଜାହାଜରେ ଅନେକ ଲୋକ ମଧ୍ୟ କ୍ୟାବିନ କିଣିବାର ସମ୍ଭାବନା ରହିଛି।
