ବାଲିଗୁଡା, ୧୮।୩ (ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲା ବାଲିଗୁଡା ଉପଖଣ୍ଡ ଅନ୍ତର୍ଗତ କୋଟଗଡ଼ ବ୍ଲକରେ ବାଘର ଗର୍ଜନକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଆତଙ୍କ ଖେଳିଯାଇଛି। କଲୋନୀ ସାହି ଓ ନିକଟସ୍ଥ ନବଜ୍ୟୋତି ହଷ୍ଟେଲ ପରିସରରେ ବାଘ ବୁଲୁଥିବା ନେଇ ସନ୍ଦେହ କରାଯାଉଛି।
ମଙ୍ଗଳବାର ରାତି ପ୍ରାୟ ୧୦ଟା ସମୟରେ ନବଜ୍ୟୋତି ହଷ୍ଟେଲର ଅନ୍ତେବାସୀ ଓ ସ୍ଥାନୀୟ ଲୋକେ ଏକ ଭୟଙ୍କର ଗର୍ଜନ ଶୁଣିବାକୁ ପାଇଥିଲେ। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ,ବାଘଟି ହଷ୍ଟେଲ ଆଡୁ ଆସି ପାଚେରୀ ଡେଇଁ ଭିତରକୁ ପଶିଥିଲା। ରାତିରେ ମାଙ୍କଡ଼ ଓ କୁକୁରମାନଙ୍କ ଅସ୍ବାଭାବିକ ଚିତ୍କାର ଶୁଣାଯାଇଥିଲା। ବୁଧବାର ସକାଳେ ହଷ୍ଟେଲ ପଛପଟେ ଏବଂ ନିକଟସ୍ଥ ନାଳ ପାଖରେ ବାଘର ପାଦ ଚିହ୍ନ ସ୍ପଷ୍ଟ ଭାବେ ଦେଖିବାକୁ ମିଳିଛି।
ଖବର ପାଇ କୋଟଗଡ଼ ରେଞ୍ଜର ବାଳଗୋପାଳ ବେହେରାଙ୍କ ନିର୍ଦ୍ଦେଶରେ ଏକ ସ୍ବତନ୍ତ୍ର ଫରେଷ୍ଟର ଟିମ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଛନ୍ତି। ବାଘର ଗତିବିଧି ଉପରେ ନଜର ରଖିବା ପାଇଁ ବିଭିନ୍ନ ସ୍ଥାନରେ ସ୍ବତନ୍ତ୍ର ଟ୍ରାପ କ୍ୟାମେରା ଲଗାଯାଇଛି। ପାଦ ଚିହ୍ନ ଓ ଗର୍ଜନକୁ ନେଇ ଅନୁସନ୍ଧାନ ଚାଲିଛି। କ୍ୟାମେରା ଫୁଟେଜ ଯାଞ୍ଚ ପରେ ଜଣାପଡ଼ିବ ତାହା ପ୍ରକୃତରେ ବାଘ କିମ୍ବା ଅନ୍ୟ କୌଣସି ବନ୍ୟଜନ୍ତୁ। ଯଦି ବାଘ ହୋଇଥାଏ, ତେବେ ତାକୁ ଧରିବା ପାଇଁ ଯଥାଶୀଘ୍ର ପଦକ୍ଷେପ ନିଆଯିବ ବୋଲି କୋଟଗଡ଼ ବନ ବିଭାଗ ପକ୍ଷରୁ କୁହାଯାଇଛି।
ପରିସ୍ଥିତିକୁ ଦୃଷ୍ଟିରେ ରଖି କଲୋନୀ ସାହି, ହୋତା କଲୋନୀ ଓ ଆମ୍ବେଦକର କଲୋନୀର ବାସିନ୍ଦାଙ୍କୁ ବନ ବିଭାଗ ପକ୍ଷରୁ ସଚେତନ କରାଯାଇଛି। ସନ୍ଧ୍ୟା ପରେ ବାହାରେ ଏକାକୀ ବୁଲାବୁଲି କରନ୍ତୁ ନାହିଁ। ଜରୁରୀ କାମରେ ବାହାରକୁ ଗଲେ ସମୂହ (Group) ହୋଇ ଯାଆନ୍ତୁ। ନାଳ କିମ୍ବା ଜଙ୍ଗଲିଆ ଅଞ୍ଚଳକୁ ଯିବା ବେଳେ ସତର୍କ ରୁହନ୍ତୁ। ବର୍ତ୍ତମାନ ସୁଦ୍ଧା ଅଞ୍ଚଳରେ ଉତ୍ତେଜନା ଲାଗି ରହିଥିବା ବେଳେ ବନ ବିଭାଗ ଘଟଣାର ତନାଘନା ଜାରି ରଖିଛି।
