ଜେରୁଜେଲମ,୮।୧: ହମାସ ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ୩ମାସରୁ ଅଧିକ ସମୟ ଧରି ଚାଲିଆସୁଛି। ଯୁଦ୍ଧରେ ଏପର୍ଯ୍ୟନ୍ତ ଉଭୟ ପାର୍ଶ୍ୱରୁ ହଜାର ହଜାର ଲୋକ ପ୍ରାଣ ହରାଇଛନ୍ତି। ଯେଉଁଠାରେ ଇସ୍ରାଏଲ ହମାସକୁ ସମ୍ପୂର୍ଣ୍ଣ ରୂପେ ହଟାଇବାକୁ ନିଷ୍ପତ୍ତି ନେଇଛି। ଏଥି ସହିତ, ବର୍ତ୍ତମାନ ଆତଙ୍କବାଦୀ ଗୋଷ୍ଠୀ ମଧ୍ୟ ଏହାର କାର୍ଯ୍ୟକଳାପରୁ ବିରତ ନୁହଁନ୍ତି। ବର୍ତ୍ତମାନ ଯୁଦ୍ଧର ଗତି ମନ୍ଥର ହେଉନାହିଁ କିମ୍ବା ଲୋକଙ୍କ ଜୀବନ ପ୍ରତି ଧ୍ୟାନ ଦିଆଯାଉ ନାହିଁ। ଏହି ସମୟରେ, ଇସ୍ରାଏଲର ସେନା ବିମାନ ଆକ୍ରମଣରେ ଗାଜାରେ ଦୁଇଜଣ ସାମ୍ବାଦିକଙ୍କ ହତ୍ୟା ଖବର ଶୁଣି ସମଗ୍ର ଦେଶ ଚକିତ ହୋଇଯାଇଛି। ଏହି ଆକ୍ରମଣରେ ଅଲ ଜଜିରା ସାମ୍ବାଦିକ ୱେଲ ଅଲ-ଡାହଦୋହଙ୍କ ଅନ୍ୟ ଜଣେ ପୁଅ ହାମଜା ୱେଲ ଡାହଦୋହଙ୍କର ମୃତ୍ୟୁ ଘଟିଛି। ଏହାପୂର୍ବରୁ ଅକ୍ଟୋବରରେ ହୋଇଥିବା ଆକ୍ରମଣରେ ସେ ତାଙ୍କ ପତ୍ନୀ, ପୁଅ, ଝିଅ ଏବଂ ନାତିଙ୍କୁ ହରାଇଥିଲେ। ୱେଲ ଅଲ-ଡାହଦୋହ ନିଜର ପ୍ରିୟଜନଙ୍କୁ ହରାଇବା ପରେ ଚକିତ ହୋଇଯାଇଛନ୍ତି। କତାର ଗଣମାଧ୍ୟମ ଏହି ମୃତ୍ୟୁକୁ ଟାର୍ଗେଟ ହତ୍ୟା ବୋଲି ବର୍ଣ୍ଣନା କରିଛି।
ହମାସ ଅଧିକୃତ ଗାଜାରେ ଥିବା ସ୍ବାସ୍ଥ୍ୟ ମନ୍ତ୍ରଣାଳୟ ଦାବି କରିଛି ଯେ ପାଲେଷ୍ଟାଇନ ଅଞ୍ଚଳରେ ଇସ୍ରାଏଲର ଏୟାର ଷ୍ଟ୍ରାଇକରେ ଦୁଇ ସାମ୍ବାଦିକଙ୍କ ମୃତ୍ୟୁ ଘଟିଛି। ମନ୍ତ୍ରଣାଳୟ ଏବଂ ଡାକ୍ତରମାନେ ଦାବି କରିଛନ୍ତି ଯେ ଏକ କାରରେ ଯାତ୍ରା କରୁଥିବା ସମୟରେ ଭିଡିଓ ଷ୍ଟ୍ରିଙ୍ଗର ମୁସ୍ତାଫା ଥୁରିଆ ଏବଂ ଅଲ ଜଜିରା ଟେଲିଭିଜନ ନେଟୱାର୍କ ସାମ୍ବାଦିକ ହାମଜା ୱେଲ ଡାହଦୋହଙ୍କର ମୃତ୍ୟୁ ଘଟିଛି। ଏଥି ସହ ଅଲ ଜଜିରା ରିପୋର୍ଟ କରିଛି ଯେ ଏହି ଆକ୍ରମଣରେ ଏହାର ଦୁଇ ସାମ୍ବାଦିକଙ୍କ ମୃତ୍ୟୁ ଘଟିଛି। ଜଣେ ସ୍ବାଧୀନ ସାମ୍ବାଦିକ ହାଜେମ ରାଜାବ ଗୁରୁତର ଆହତ ହୋଇଛନ୍ତି।
