ନୂଆଦିଲ୍ଲୀ,୨୫ା୮(ପି.ଟି.):ବାଲେଶ୍ୱର ଜିଲା ବାହାନଗା ବଜାର ରେଳ ଷ୍ଟେଶନ ନିକଟ ଲେଭଲ କ୍ରସିଂରେ ମରାମତି କାର୍ଯ୍ୟ ପୂର୍ବରୁ ବରିଷ୍ଠ ଡିଭିଜନାଲ ଏବଂ ଟେଲିକମ୍ ଇଞ୍ଜିନିୟରଙ୍କ ଅନୁମତି ନିଆଯାଇ ନ ଥିଲା। ଏପରି କି ଏଥିପାଇଁ କୌଣସି ସର୍କିଟ୍ ଡାଏଗ୍ରାମକୁ ମଧ୍ୟ ଅନୁମୋଦନ କରାଯାଇ ନ ଥିଲା। ଫଳରେ ଗତ ଜୁନ୍ ୨ରେ ଟ୍ରେନ୍ ଦୁର୍ଘଟଣା ଘଟିଥିଲା ବୋଲି ଏହାର ତଦନ୍ତ କରୁଥିବା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) କହିଛି।
ଭୁବନେଶ୍ୱରସ୍ଥିତ ଏକ ସ୍ବତନ୍ତ୍ର କୋର୍ଟରେ ସିବିଆଇ ପକ୍ଷରୁ ଗୁରୁବାର ଯୁକ୍ତି ବଢ଼ାଯାଇଛି ଯେ, ବାହାନଗା ବଜାର ଷ୍ଟେଶନ ନିକଟ ଗେଟ୍ ନମ୍ବର ୯୪ର ଲେଭଲ କ୍ରସିଂ(ଏଲ୍ସି)ରେ ମରାମତି କାର୍ଯ୍ୟ ଏହି ଦୁର୍ଘଟଣାର ଅନ୍ୟତମ କାରଣ। ବରିଷ୍ଠ ସେକ୍ସନ ଇଞ୍ଜିନିୟର (ସିଗ୍ନାଲ ଇନ୍-ଚାର୍ଜ) ଅରୁଣ କୁମାର ମହନ୍ତ ଏହି ମରାମତି କାର୍ଯ୍ୟ କରିଥିଲେ। ସେ ଏଥିରେ ଅନ୍ୟ ଏକ ଏଲ୍ସି ଗେଟ୍ ନମ୍ବର ୭୯ର ସର୍କିଟ ଡାଏଗ୍ରାମକୁ ବ୍ୟବହାର କରିଥିଲେ ବୋଲି ସିବିଆଇ କୋର୍ଟରେ ଅଭିଯୋଗ ଆଣିଛି। ଅନ୍ୟପକ୍ଷେ ଅରୁଣ ଏହି ଅଭିଯୋଗକୁ ଖଣ୍ଡନ କରି କହିଥିଲେ, କେଏମ୍ ୨୫୫/୧୧-୧୩ରେ ଏଲ୍ସି ଗେଟ୍ ନଂ.୯୪ ଭଲଭାବେ କାର୍ଯ୍ୟ କରୁ ନ ଥିଲା। କିନ୍ତୁ ଉଚ୍ଚ ଅଧିକାରୀମାନେ ଏଥିପାଇଁ କୌଣସି ପଦକ୍ଷେପ ନେଇ ନ ଥିଲେ। ଅରୁଣ ଆହୁରି କହିଥିଲେ, ଏହାର ତଦାରଖ କାର୍ଯ୍ୟ ଅନ୍ୟ କେତେଜଣ ବ୍ୟକ୍ତିଙ୍କୁ ଦିଆଯାଇଥିଲା। ତେଣୁ ଦୁର୍ଘଟଣା ପାଇଁ ସେ ଦାୟୀ ନୁହନ୍ତି।
ପ୍ରକାଶ ଯେ, ଜୁନ୍ ୨ରେ କରମଣ୍ଡଳ ଏକ୍ସପ୍ରେସ୍ ବାହାନଗା ବଜାର ଷ୍ଟେଶନରେ ଛିଡ଼ା ହୋଇଥିବା ଏକ ମାଲବାହୀ ଟ୍ରେନ୍କୁ ଧକ୍କା ଦେଇଥିଲା। ଏହାର କେତୋଟି ବଗି ଲାଇନଚ୍ୟୁତ ହୋଇ ଯଶଓ୍ବନ୍ତପୁର-ହାଓଡା ଏକ୍ସପ୍ରେସ୍ ସହ ଧକ୍କା ହୋଇଥିଲା। ଏହି ଟ୍ରିପଲ ଟ୍ରେନ୍ ଦୁର୍ଘଟଣାରେ ୨୯୬ ଜଣଙ୍କ ମୃତ୍ୟୁ ଘଟିଥିବାବେଳେ ୧,୨୦୦ରୁ ଊର୍ଦ୍ଧ୍ୱ ଆହତ ହୋଇଥିଲେ। ଜୁଲାଇ ୭ରେ ସିବିଆଇ ଅରୁଣଙ୍କ ସହ ରେଲଓ୍ବେର ଅନ୍ୟ ୨ ଜଣ ଅଧିକାରୀଙ୍କୁ ଗିରଫ କରିଥିଲା। ଭୁବନେଶ୍ୱରସ୍ଥିତ ଏକ ସ୍ବତନ୍ତ୍ର ସିବିଆଇ କୋର୍ଟ ନିକଟରେ ଅରୁଣଙ୍କ ଜାମିନ ଆବେଦନକୁ ଖାରଜ କରି ଦେଇଥିଲେ। ସିବିଆଇ ପକ୍ଷରୁ ଦାଖଲ ତଥ୍ୟ ପ୍ରମାଣ ଉକ୍ତ ମାମଲାରେ ତାଙ୍କ ସମ୍ପୃକ୍ତିକୁ ଦର୍ଶାଉଥିବା କୋର୍ଟ କହିଥିଲେ।
ଶୁଣାଣି ବେଳେ ସିବିଆଇ ଯୁକ୍ତି ବାଢ଼ିଥିଲା, ବାହାନଗା ବଜାର ରେଳ ଷ୍ଟେଶନର ଲେଭଲ କ୍ରସିଂ ନଂ.୯୪ର ନର୍ଥ ଗୁମ୍ଟିରେ ଓ୍ବେରିଂ କାମ କରାଯିବା ସମୟରେ ଏଲ୍ସି ଗେଟ୍ ନଂ.୭୯ର ସର୍କିଟ୍ ଡାଏଗ୍ରାମକୁ ବ୍ୟବହାର କରାଯାଇଥିଲା। ଏଥିରେ ୧୧୦ ଭୋଲ୍ଟ ଏସିରୁ ୨୪ ଭୋଲ୍ଟ ଡିସିକୁ ବିଦ୍ୟୁତ୍ ପରିବର୍ତ୍ତନ କରାଯାଇଥିଲା। ମାନୁଏଲ୍ ଅନୁସାରେ ଯାଞ୍ଚ, ଟିକିନିକି ପରୀକ୍ଷା, ସିଗ୍ନାଲରେ ପରିବର୍ତ୍ତନ ଏବଂ ଇଣ୍ଟରଲକିଂ ଇନ୍ଷ୍ଟଲାଇଜେଶନ୍ ପାଇଁ ଅନୁମୋଦିତ ଯୋଜନା ଓ ନିର୍ଦ୍ଦେଶାବଳୀର ଅନୁପାଳନ ସୁନିଶ୍ଚିତ କରିବା ଦାୟିତ୍ୱ ଅଭିଯୁକ୍ତ ଆବେଦନକାରୀ ଅରୁଣଙ୍କୁ ଦିଆଯାଇଥିଲା। କିନ୍ତୁ ସେ ଏପରି କୌଣସି ପଦକ୍ଷେପ ନେଇ ନ ଥିଲେ। ଫଳରେ ଏହି ଦୁଃଖଦ ଦୁର୍ଘଟଣା ଘଟି ୨୯୬ ଜଣଙ୍କ ମୃତ୍ୟୁ ଘଟିଲା ବୋଲି ସିବିଆଇ କୋର୍ଟଙ୍କୁ ଅବଗତ କରାଇଛି।
