ରାୟଗଡ଼ା,୧୨।୮(ଆଶିଷ ରଞ୍ଜନ ପଣ୍ଡା): ସ୍ବାଧୀନ ଭାବେ ପ୍ରଥମ ଥର ପାଇଁ ୨୦୧୯ ସାଧାରଣ ନିର୍ବାଚନରେ ବିଧାୟକ ହେବା ପରେ ବହୁତ ଚର୍ଚ୍ଚାରେ ଥିଲେ ରାୟଗଡ଼ା ବିଧାୟକ ମକରନ୍ଦ ମୁଦୁଲି । ଏବେ ସେ ଦିଲ୍ଲୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟିବା ପରେ ଜିଲାରେ ରାଜନୈତିକ ମହଲରେ ଆଲୋଡ଼ନ ସୃଷ୍ଟି ହୋଇଛି। ମକରନ୍ଦ ଝୋଡ଼ିଆ ସମ୍ପ୍ରଦାୟକୁ ଆଦିବାସୀ ମାନ୍ୟତା ଦାବିରେ ଯାଇଥିଲେ, ନା ଆଗାମୀ ନିର୍ବାଚନରେ ଭାଜପାରେ ଯୋଗଦେଇ ଭାଜପାରୁ ପ୍ରାର୍ଥୀ ହେବା ନେଇ ଆଲୋଚନା କରିବାକୁ ଯାଇଥିଲେ, ସେ ନେଇ ଆଲୋଚନା ଜୋର ଧରିଛି। ତେବେ ପୂର୍ବରୁ ବିଜେଡିର ଦଳୀୟ କାର୍ଯ୍ୟକ୍ରମରେ ଯୋଗଦେଉଥିବା ସ୍ବାଧୀନ ବିଧାୟକ ମକରନ୍ଦ ଅଚାନକ ଭାଜପାର ଶୀର୍ଷ ନେତୃତ୍ୱଙ୍କୁ ଭେଟିବା ଅଞ୍ଚଳବାସୀଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ବିଧାୟକ ମକରନ୍ଦଙ୍କୁ ପଚାରିବାରୁ ସେ କହିଛନ୍ତି, ଅଞ୍ଚଳବାସୀଙ୍କ ଦାବି ଓ ଅଞ୍ଚଳର ବିକାଶ ନେଇ ସେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟିଥିଲେ । ତେବେ ଆଗାମୀ ନିର୍ବାଚନରେ ପୁଣି ଥରେ ସ୍ବାଧୀନ ଭାବେ ନିର୍ବାଚନ ଲଢ଼ିବେ ନା ଅନ୍ୟ କୌଣସି ଦଳରୁ ପ୍ରାର୍ଥୀ ହେବେ ବୋଲି ପଚାରିବାରୁ ତାହା ସମୟ କହିବ ବୋଲି କହିଛନ୍ତି। ରାଜନୀତିରେ କେତେବେଳେ କ’ଣ ହେଉଛି ତାହା ଆଗରୁ କିଛି କହିହେବ ନାହିଁ ବୋଲି କହିଥିଲେ । ହେଲେ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟିବା ସମୟରେ ଓଡ଼ିଶାର ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି ସାଥିରେ ରହିଥିବା ଏକ ବଡ଼ ପରିବର୍ତ୍ତନ ବୋଲି ରାଜନୈତିକ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି । ବିଜେଡି ସହ ଦୀର୍ଘ ସମୟ ରହିବା ପରେ ଶାସକ ଦଳରୁ ମକରନ୍ଦ ରାୟଗଡ଼ା ନିର୍ବାଚନ ମଣ୍ଡଳୀରେ ପ୍ରାର୍ଥୀ ହେବା ନେଇ ସମ୍ଭାବନା କମ୍ ଥିବା ଜଣାପଡ଼ିବା ପରେ ମକରନ୍ଦ ଏହି ପଦକ୍ଷେପ ନେଇଥିବା ନେଇ ଚର୍ଚ୍ଚା ଚାଲିଛି। ତେବେ ନିର୍ବାଚନ ପାଖେଇ ଆସୁଥିବା ବେଳେ ସ୍ବାଧୀନ ବିଧାୟକଙ୍କ ଭାଜପା ଶୀର୍ଷ ନେତୃତ୍ୱଙ୍କୁ ଭେଟିବା ଭାଜପା ଓ ବିଜେଡିରେ ହଇଚଇ ସୃଷ୍ଟି କରୁଛି । ଆଗାମୀ ଦିନରେ ମକରନ୍ଦ କେଉଁ ଦଳ ଆଡ଼କୁ ଢଳୁଛନ୍ତି ତାହା ଦେଖିବାକୁ ବାକି ରହିଲା। ଆଗାମୀ ନିର୍ବାଚନରେ ସେ କଂଗ୍ରେସ ଦଳରୁ ମଧ୍ୟ ପ୍ରାର୍ଥୀ ହୋଇପାରନ୍ତି ବୋଲି କିଛିଦିନ ତଳେ ଚର୍ଚ୍ଚା ଚାଲିଥିଲା ।
