ନୂଆଦିଲ୍ଲୀ, ୭ା୫ : ଆସନ୍ତା ମାସରେ ଲଡର୍ସଠାରେ ନ୍ୟୁଜିଲାଣ୍ଡ ବିପକ୍ଷରେ ହେବାକୁ ଯାଉଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲ ଏବଂ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପାଇଁ ଶୁକ୍ରବାର ଘୋଷିତ ହୋଇଛି ଭାରତୀୟ ଦଳ। ଆହତ ଓ ବ୍ୟକ୍ତିଗତ ସମସ୍ୟା ଯୋଗୁ ଘରୋଇ ଇଂଲଣ୍ଡ ସିରିଜ୍ରୁ ବାଦ୍ ପଡ଼ିଥିବା ରବୀନ୍ଦ୍ର ଜାଡେଜା, ଯଶପ୍ରୀତ ବୁମରା ଓ ହନୁମା ବିହାରୀଙ୍କ ଭଳି ତାରକା ଦଳକୁ ଫେରିଛନ୍ତି। ଚୟନକର୍ତ୍ତା ଲୋକେଶ ରାହୁଲ ଓ ରିଦ୍ଦିମାନ ଶାହଙ୍କୁ ଦେଇଛନ୍ତି ସୁଯୋଗ। କିନ୍ତୁ ଫିଟ୍ନେସ ଉପରେ ସେମାନଙ୍କ ଖେଳିବା ନିର୍ଭର କରେ। ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଓ ଲେଗ୍ ସ୍ପିନର କୁଲଦୀପ ଯାଦବଙ୍କୁ ଦଳରୁ ବାଦ୍ ଦିଆଯାଇଛି।
ରାହୁଲଙ୍କୁ ନିକଟରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେ ବର୍ତ୍ତମାନ ଆପେଣ୍ଡିସାଇଟ୍ସ ଜନିତ ସମସ୍ୟା ଦେଇ ଗତି କରୁଛନ୍ତି। ଅନ୍ୟପକ୍ଷରେ ଆଇପିଏଲ ବେଳେ ରିଦ୍ଧିମାନ କୋଭିଡ୍-୧୯ ପଜିଟିଭ ଚିହ୍ନଟ ହୋଇଥିଲେ।
ଅଭିମନ୍ୟୁ ଈଶ୍ୱରନ, ପ୍ରସିଦ୍ଧ କ୍ରିଷ୍ଣା, ଅଭେଶ ଖାଁ ଓ ଅର୍ଜାନ ନାଗଓ୍ବାସଓ୍ବାଲାଙ୍କୁ ଷ୍ଟାଣ୍ଡବାଇ ଖେଳାଳି ଭାବେ ଦଳ ସହ ଇଂଲଣ୍ଡ ଗସ୍ତ କରିବେ।
ଭାରତୀୟ ଦଳର ୪ ମାସିଆ ଇଂଲଣ୍ଡ ଗସ୍ତ ଡବ୍ଲ୍ୟୁଟିସି ଫାଇନାଲ ସହ ଆରମ୍ଭ ହେବ, ଯାହା ଜୁନ ୧୮ ତାରିଖରେ ସାଉଥାମ୍ପଟନଠାରେ ଖେଳାଯିବ। ଏହାପରେ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଅଗଷ୍ଟ ୪ ତାରିଖରୁ ଆରମ୍ଭ ହେବ।
ଭାରତୀୟ ଦଳ: ବିରାଟ କୋହଲି (ଅଧିନାୟକ), ଅଜିଙ୍କ୍ୟ ରାହାନେ (ଉପ ଅଧିନାୟକ), ରୋହିତ ଶର୍ମା, ଶୁବମାନ ଗିଲ, ମୟଙ୍କ ଅଗ୍ରଓ୍ବାଲ, ଚେତେଶ୍ୱର ପୂଜାରା, ହନୁମା ବିହାରୀ, ରିଷଭ ପନ୍ତ (ଉଇକେଟକିପର), ରବିଚନ୍ଦ୍ରନ ଅଶ୍ୱିନ, ରବୀନ୍ଦ୍ର ଜାଡେଜା, ଅକ୍ସର ପଟେଲ, ଓ୍ବାଶିଂଟନ ସୁନ୍ଦର, ଯଶପ୍ରୀତ ବୁମରା, ଇଶାନ୍ତ ଶର୍ମା, ମହମ୍ମଦ ଶାମି, ମହମ୍ମଦ ସିରାଜ, ଶାର୍ଦ୍ଦୁଳ ଠାକୁର ଓ ଉମେଶ ଯାଦବ।
