ଭୁବନେଶ୍ୱର,୨୪।୧୧: ଅନ୍ତର୍ଜାତୀୟ ତୀରନ୍ଦାଜ ରଞ୍ଜିତ ନାଏକ ୨୦୨୦ ଟୋକିଓ ଅଲିମ୍ପିକ୍ସ ଚୟନ ଶିବିରକୁ ମନୋନୀତ ହୋଇଛନ୍ତି। ଫଳରେ ଝାଡ଼ଖଣ୍ଡର ଜାମସେଦପୁରସ୍ଥିତ ଜେଆରଡି ଟାଟା ସ୍ପୋଟର୍ସ କମ୍ପ୍ଲେକ୍ସରେ ସୋମବାରଠାରୁ ଆରମ୍ଭ ହୋଇଥିବା ଚୟନ ଶିବିରରେ ସେ ଯୋଗଦେଇଛନ୍ତି। ଏଥିରୁ ୪ଜଣ ରିକର୍ଭ ପୁରୁଷ ଓ ୪ ଜଣ ରିକର୍ଭ ମହିଳା ମନୋନୀତ ହୋଇ ପୁଣେସ୍ଥିତ ଏଏସ୍ଆଇଠାରେ ଚାଲିଥିବା ପ୍ରଶିକ୍ଷଣ ଶିବିରରେ ଯୋଗଦେବେ। କିସ୍ ଛାତ୍ର ରଞ୍ଜିତ ଓଡ଼ିଶାର ଏକମାତ୍ର ତୀରନ୍ଦାଜଭାବେ ଏହି ଶିବିରରେ ଯୋଗ ଦେଇଛନ୍ତି। ସର୍ବଦା କ୍ରୀଡ଼ା ପ୍ରତିଭାମାନଙ୍କୁ ପ୍ରୋତ୍ସାହିତ ଯୋଗାଇ ଆସୁଥିବା କିସ୍ ପ୍ରତିଷ୍ଠାତା ଏମ୍ପି ଅଚ୍ୟୁତ ସାମନ୍ତ ରଞ୍ଜିତଙ୍କୁ ଶୁଭେଚ୍ଛା ଜଣାଇବା ସହ ତାଙ୍କ ସଫଳତା କାମନା କରିଛନ୍ତି। ରଞ୍ଜିତ ପୂର୍ବରୁ ପ୍ରଥମ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାରେ ବ୍ୟକ୍ତିଗତ ବର୍ଗରେ ରୌପ୍ୟ ଓ ଦଳଗତ ବର୍ଗରେ ସ୍ବର୍ଣ୍ଣ ପଦକ ହାସଲ କରିଥିଲେ। ୨୦୧୫ରେ ସେ ସାଂଘାଇଠାରେ ଅନୁଷ୍ଠିତ ବିଶ୍ୱକପ୍ ଷ୍ଟେଜ୍-୧ ଓ ଷ୍ଟେଜ୍-୨ରେ ଅଂଶଗ୍ରହଣ କରିଥିବା ବେଳେ ୨୦୧୪ରେ ତାଇପେଠାରେ ଅନୁଷ୍ଠିତ ଏସୀୟ ଗ୍ରାଁ ପ୍ରି ଚାମ୍ପିୟନଶିପ୍, ୨୦୧୩ରେ ଚାଇନାର ଉକ୍ସିଠାରେ ଅନୁଷ୍ଠିତ ବିଶ୍ୱ ଯୁବ ଚାମ୍ପିୟନଶିପ୍ରେ ମଧ୍ୟ ଅଂଶଗ୍ରହଣ କରିଥିଲେ। ୨୦୧୩ରେ ଆସାମର କୋକ୍ରାଝରଠାରେ ଅନୁଷ୍ଠିତ କନିଷ୍ଠ ଜାତୀୟ ତୀରନ୍ଦାଜୀ ଚାମ୍ପିୟନଶିପ୍ରେ ସ୍ବର୍ଣ୍ଣ, ୨୦୧୩-୧୪ରେ ସବ୍-ଜୁନିୟର ଜାତୀୟ ତୀରନ୍ଦାଜୀ ପ୍ରତିଯୋଗିତାରେ ୪ଟି ସ୍ବର୍ଣ୍ଣ ପଦକ ହାସଲ କରିଥିଲେ। ଜାମସେଦପୁରସ୍ଥିତ ଚୟନ ଶିବିରକୁ ତାଙ୍କ ସହ ପ୍ରଶିକ୍ଷକ ରାଜେଶ ହଁାସଦା ମଧ୍ୟ ଯାଇଛନ୍ତି।
