ନୂଆଦିଲ୍ଲୀ,୨୭।୫: ପାକିସ୍ତାନର ପୂର୍ବତନ ଖେଳାଳି ତଥା ଲୋକପ୍ରିୟ କମେଣ୍ଟେଟର୍ ରମିଜ ରାଜା ନିଜ ଦେଶର କ୍ରିକେଟ ବ୍ୟବସ୍ଥାକୁ ନେଇ କଡ଼ା ଟିପ୍ପଣୀ ଦେଇଛନ୍ତି। ଜିମ୍ବାଓ୍ବେ ଗସ୍ତରେ ପୁରୁଣା ଖେଳାଳିମାନଙ୍କୁ ପଠାଇବା ଗୋଟିଏ ପାଦ ଆଗକୁ ବଢ଼ିବା ସହ ଦୁଇ ପାଦ ପଛକୁ ଭଳି ନିଷ୍ପତ୍ତି ପ୍ରମାଣିତ ହୋଇଛି। ପାକିସ୍ତାନକୁ ଏବେ ନୂଆ ଖେଳାଳିଙ୍କୁ ସୁଯୋଗ ଦେବା ଉଚିତ ବୋଲି ସେ କହିଛନ୍ତି।
ଏକ ୟୁଟ୍ୟୁବ୍ ଚ୍ୟାନେଲ୍ ସହ ସାକ୍ଷାତକାରରେ ରମିଜ କହିଛନ୍ତି, ନୂଆ ଖେଳାଳିଙ୍କ ସହ ଆପଣ ହାରିଗଲେ ମଧ୍ୟ କେଉଁ ଖେଳାଳିଙ୍କ ପାଖରେ ସାମର୍ଥ୍ୟ ଅଛି, କାହା ପାଖରେ ନାହିଁ ତାହା ଜାଣିପାରିବେ। କାରଣ ଟି୨୦ ଅନ୍ତର୍ଜାତୀୟ କ୍ରିକେଟରେ ପୁରାତନ ଖେଳାଳିଙ୍କୁ ସୁଯୋଗ ଦେବାର କୌଣସି ଅର୍ଥ ନାହିଁ। କାରଣ ଏହି ଟୁର୍ନାମେଣ୍ଟରେ ୪୦-୪୫ ବର୍ଷୀୟ ଖେଳାଳି ଖେଳିବା ଦେଖିବାକୁ ମିଳୁନାହିଁ। ଦେଖିବାକୁ ଗଲେ ଆମ ପାଖରେ ଏମ୍ଏସ୍ ଧୋନୀ କିମ୍ବା ସଚିନ ତେନ୍ଦୁଲକର ନାହାନ୍ତି, ଯେଉଁମାନେ ପ୍ରଦର୍ଶନରେ ୫୦ ପ୍ରତିଶତ ହ୍ରାସ ହୋଇଥିଲେ ମଧ୍ୟ ବହୁତ ଉପଯୋଗୀ। ଆମର ଭୂଲ ନିଷ୍ପତ୍ତି ଯୋଗୁ ମ୍ୟାଚ୍ ହାରିବାର ସମ୍ଭାବନା ବୃଦ୍ଧି ପାଉଛି। ଆମେ କେବଳ ଜିତିବା ଲାଗି ସିଷ୍ଟମ୍ ଭାଙ୍ଗୁଛୁ। ପାକିସ୍ତାନକୁ ଏବେ ଏ ବିଷୟରେ ପୁନର୍ବାର ଚିନ୍ତା କରିବା ଆବଶ୍ୟକ ହୋଇପଡ଼ିଛି।
ଏବେ ନୂଆ ଖେଳାଳିଙ୍କ ସହ ଆଗକୁ ବଢ଼ନ୍ତୁ। ଅଜିମ୍ବାଓ୍ବେ ବିପକ୍ଷରେ ନୂଆ ଖେଳାଳିଙ୍କ ସହ ଓହ୍ଲାଇ ହାରିଗଲେ ବି ଏହା ପରୀକ୍ଷାମୂଳକ ମ୍ୟାଚ୍ ଥିଲା ବୋଲି ସମସ୍ତେ ଭାବିବେ। କାରଣ ଏଭଳି ସୁଯୋଗ କମ ମିଳୁଛି। ଚାପ ବଢ଼ିଲେ ପୁରୁଣା ଖେଳାଳିଙ୍କୁ ଡାକିପାରିବେ। ଚାପ ବଢ଼ିଲେ ଫିକ୍ସର ମାନଙ୍କୁ ଡାକିହେବ। ନଚେତ ଜଣେ ଅତିରିକ୍ତ ଉଇକେଟକିପରଙ୍କୁ ମଧ୍ୟମ ଅର୍ଡର ବ୍ୟାଟ୍ସମ୍ୟାନ୍ ଭାବେ ଖେଳାନ୍ତୁ। ଏଭଳି କଲେ ଦଳ ଗଠନ ହୁଏ। ମାତ୍ର ଏବେ ଦଳର ଚିନ୍ତାଧାରା ଯୋଗୁ ନୂଆ ଖେଳାଳିଙ୍କୁ ସୁଯୋଗ ମିଳିବା କଷ୍ଟକର ହୋଇପଡ଼ୁଛି ବୋଲି ସେ କହିଛନ୍ତି।
