ନୂଆଦିଲ୍ଲୀ,୧୨ ।୧୧: କଂଗ୍ରେସର ସାଧାରଣ ସମ୍ପାଦକ ତଥା କର୍ନାଟକ ପ୍ରଭାରୀ ରଣଦୀପ ସୁରଜେୱାଲା ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାକାରୀଙ୍କୁ ମୁକ୍ତ କରିବାକୁ ନେଇ ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ସମ୍ବିଧାନର ମୂଳ ନୀତିର ଅଣଦେଖା ବୋଲି କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସେ ଚାରୋଟି ପ୍ରଶ୍ନ ପଚାରି କେନ୍ଦ୍ରର ଭାରତୀୟ ଜନତା ପାର୍ଟି(ଭାଜପା) ସରକାର ଏହି ନିଷ୍ପତ୍ତି ଉପରେ ସମିକ୍ଷା କରିବେ କି ନାହିଁ ବୋଲି ପ୍ରଶ୍ନ କରିଛନ୍ତି । ରାଜୀବ ଗାନ୍ଧୀଙ୍କୁ ହତ୍ୟା କରିଥିବା ଉଗ୍ରବାଦୀଙ୍କୁ ଜେଲରୁ ମୁକ୍ତ କରିବାର ନିଷ୍ପତ୍ତି ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସେ କହିଛନ୍ତି ।
ସୁରଜେୱାଲା ଆହୁରି କହିଛନ୍ତି, ଉଗ୍ରବାଦ ବିରୋଧରେ ଲଢେଇ କରିବା ପାଇଁ ଆଜି ପ୍ରତ୍ୟେକ ଦେଶବାସୀଙ୍କ ମୂଳ ଭାବନା ହାରି ଯାଇଛି । ଏହାସହ ସର୍ବ କନିଷ୍ଠ ପ୍ରଧାନମନ୍ତ୍ରୀଙ୍କ ହତ୍ୟାର କ୍ଷତ ପୁଣିଥରେ ସତେଜ ହୋଇଯାଇଛି । ସେ ପ୍ରଶ୍ନ କରିଛନ୍ତି ଯେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କୁ ହତ୍ୟା କରିଥିବା ଉଗ୍ରବାଦୀଙ୍କ ମୁକ୍ତିକୁ ପ୍ରଧାନମନ୍ତ୍ରୀ ମୋଦି ଓ ତାଙ୍କ ସରକାର ସମର୍ଥନ କରୁଛନ୍ତି କି? କାହିଁକି ମୋଦି ସରକାର ସୁପ୍ରିମକୋର୍ଟରେ ଦୃଢ ଭାବେ ତାଙ୍କର ପକ୍ଷ ରଖୁ ନାହାନ୍ତି । ଉଗ୍ରବାଦ ଉପରେ ମୋଦି ସରକାରଙ୍କ ଏହା ଦୋହରା ମନୋଭାବ ନୁହେଁ କି? ଏହି ନିଷ୍ପତ୍ତି ଉପରେ ଭାଜପା ସରକାର ପୁନର୍ବିଚାର ଆବେଦନ କରିବେ କି ବୋଲି ସୁରଜେୱାଲା ପ୍ରଶ୍ନ କରିଛନ୍ତି ।
