କେନ୍ଦ୍ରାପଡ଼ା ଅଫିସ/ ରାଜକନିକା/ ମାର୍ଶାଘାଇ, ୧୯ା୨ (ଡି.ଏନ.ଏ.): କେନ୍ଦ୍ରାପଡ଼ା ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଦ୍ୱିତୀୟ ପର୍ଯ୍ୟାୟ ମତଦାନ ଶୁକ୍ରବାର ସରିଛି। ଏହି ପର୍ଯ୍ୟାୟରେ ରାଜକନିକା ଓ ମାର୍ଶାଘାଇ ବ୍ଲକର ୩ଟି ଲେଖାଏ ଜୋନ୍ ଅଞ୍ଚଳରେ ନିର୍ବାଚନ ଅନୁଷ୍ଠିତ ହୋଇଥିଲା। ଅଳ୍ପ କେତୋଟି ସ୍ଥାନରେ ରାଜନୈତିକ ଉତ୍ତେଜନା ସୃଷ୍ଟି ହୋଇଥିଲେ ମଧ୍ୟ ଭୋଟ ଗ୍ରହଣ ଚାଲୁ ରହିଥିଲା। ରାଜକନିକା ବ୍ଲକରେ ୭୨.୫୪ ପ୍ରତିଶତ ଓ ମାର୍ଶାଘାଇ ବ୍ଲକ ଅଞ୍ଚଳରେ ୭୭ ପ୍ରତିଶତ ଭୋଟ ସଂଗ୍ରହ ହୋଇଛି।
ଜିଲା ପ୍ରଶାସନ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ରାଜକନିକା ବ୍ଲକ ଅଞ୍ଚଳରେ ପୁରୁଷଙ୍କ ଅପେକ୍ଷା ମହିଳା ଅଧିକ ମତଦାନ କରିଛନ୍ତି। ରାଜକନିକା ବ୍ଲକର ମୋଟ୍ ଭୋଟର ସଂଖ୍ୟା ୧,୨୩,୫୦୬। ଚଳିତ ନିର୍ବାଚନରେ ପୁରୁଷ ଭୋଟର ୬୭.୨୮ ପ୍ରତିଶତ ଭୋଟ ଦେଇଥିବା ବେଳେ ୭୮.୩୦ ମହିଳା ଭୋଟର ଗଣତାନ୍ତ୍ରିକ ଅଧିକାର ସିଦ୍ଧ କରିଛନ୍ତି। ରାଜକନିକା ବ୍ଲକର ୨୭ନଂ. ଜୋନ୍ରେ ମୋଟ ୩୯,୦୫୮ ଭୋଟରଙ୍କ ମଧ୍ୟରୁ ୧୩,୧୮୩ ପୁରୁଷ ଓ ୧୪,୨୨୮ ମହିଳା ଭୋଟ ଦେଇଥିଲେ। ସେହିପରି ୨୮ ନଂ. ଜୋନ୍ରେ ମୋଟ ୪୨,୯୦୩ ଭୋଟରଙ୍କ ମଧ୍ୟରୁ ୧୫,୧୮୪ ପୁରୁଷ ଓ ୧୫,୭୧୫ ମହିଳା, ୨୯ ନଂ. ଜୋନ୍ରେ ମୋଟ ୪୧,୫୪୫ ଭୋଟରଙ୍କ ମଧ୍ୟରୁ ୧୫,୦୭୧ ପୁରୁଷ ଓ ୧୬,୨୦୮ ମହିଳା ନିର୍ବାଚନରେ ମତସାବ୍ୟସ୍ତ କରିଛନ୍ତି। ମାର୍ଶାଘାଇ ବ୍ଲକରେ ମୋଟ୍ ଭୋଟରଙ୍କ ସଂଖ୍ୟା ୧,୦୬,୯୩୦। ଏଥିମଧ୍ୟରୁ ନିର୍ବାଚନରେ ୪୨,୨୭୯ ପୁରୁଷ ଓ ୪୦,୬୭୫ ମହିଳା ମତଦାନ କରିଥିଲେ। ଏହି ବ୍ଲକର ୨୪ନଂ. ଜୋନ୍ରେ ମୋଟ ୩୭,୨୬୪ ଭୋଟରଙ୍କ ମଧ୍ୟରୁ ୧୪,୨୩୪ ପୁରୁଷ ଓ ୧୪,୧୯୨ ମହିଳା ଭୋଟ ଦେଇଛନ୍ତି। ସେହିପରି ୨୫ନଂ. ଜୋନ୍ରେ ମୋଟ୍ ୩୬,୪୦୮ ଭୋଟରଙ୍କ ମଧ୍ୟରୁ ୧୫,୦୨୦ ପୁରୁଷ ଓ ୧୩,୯୫୮ ମହିଳା, ୨୬ନଂ. ଜୋନ୍ରେ ମୋଟ୍ ୩୩,୨୫୮ ଭୋଟରଙ୍କ ମଧ୍ୟରୁ ୧୩,୦୨୫ ପୁରୁଷ ଓ ୧୨,୫୨୫ ମହିଳା ନିର୍ବାଚନରେ ଅଂଶଗ୍ରହଣ କରିଛନ୍ତି। ରାଜକନିକାର ଗିରିଆଠାରେ ନିର୍ବାଚନୀ ଉତ୍ତେଜନା ଦେଖାଦେଇଥିଲା। ଏଥିସହ ହାବଳଗଣ୍ଡ ପଞ୍ଚାୟତର ୧ରୁ ୧୧ ନଂ. ବୁଥ କ୍ୟାପ୍ଚରିଂ ହୋଇଥିବା ଓ ସାନି ମତଦାନ ଦାବି କରି ୨୮ ନଂ. ଜୋନ ଜିଲା ପରିଷଦ ପ୍ରାର୍ଥୀ କ୍ଷୀରୋଦ ବେହୁରିଆ ବ୍ଲକ ନିର୍ବାଚନ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି। ପୂର୍ବତନ ଆଳି ବିଧାୟକ ତଥା କଂଗ୍ରେସ ନେତା ଦେବେନ୍ଦ୍ର ଶର୍ମା ଏ ସମ୍ପର୍କରେ ରାଜ୍ୟ ନିର୍ବାଚନ କମିଶନଙ୍କୁ ମଧ୍ୟ ଅଭିଯୋଗ କରିଛନ୍ତି। ମାର୍ଶାଘାଇର କରିଲୋପାଟଣାରେ ଦୁଇ ଏଜେଣ୍ଟଙ୍କ ମଧ୍ୟରେ କଥା କଟାକଟି ହୋଇଥିଲା। ନିର୍ବାଚନ ପ୍ରକ୍ରିୟା ଶାନ୍ତିଶୃଙ୍ଖଳାରେ ସରିଥିବା ଜିଲା ପ୍ରଶାସନ ପକ୍ଷରୁ ରାଜ୍ୟ ନିର୍ବାଚନ କମିଶନରଙ୍କୁ ରିପୋର୍ଟ ପ୍ରଦାନ କରାଯାଇଛି।
