ସିମ୍ଲା,୧୪ା୮: ହିମାଚଳପ୍ରଦେଶରେ ପ୍ରବଳ ବର୍ଷା ଓ ଭୂସ୍ଖଳନ ଯୋଗୁ ୪୮ ଜଣଙ୍କ ମୃତ୍ୟୁ ଘଟିଛି। ଲଗାଣ ବର୍ଷା ଜାରି ରହିବା ସହ ନଦୀଗୁଡ଼ିକରେ ବନ୍ୟା ଆସିଥିବାରୁ ରାଜ୍ୟର ଶିକ୍ଷାନୁଷ୍ଠାନଗୁଡ଼ିକୁ ବନ୍ଦ କରିଦିଆଯାଇଛି। ଭୂସ୍ଖଳନ ଯୋଗୁ ୭୫୨ଟି ରାସ୍ତା ଅବରୋଧ ହେବା ସହ ବହୁ ଘରଦ୍ୱାର ଭାଙ୍ଗିଯାଇଛି। ଶିମଲାର ସୁମେରହିଲ୍ ଅଞ୍ଚଳରେ ଭୂସ୍ଖଳନ ଯୋଗୁ ଏକ ଶିବ ମନ୍ଦିର ଭୁଶୁଡ଼ିବାରୁ ୯ ଜଣଙ୍କ ମୃତ୍ୟୁ ଘଟିଛି। ଭୂସ୍ଖଳନ ସମୟରେ ମନ୍ଦିରକୁ ପ୍ରାୟ ୫୦ ଜଣ ଲୋକ ପୂଜା କରିବାକୁ ଆସିଥିଲେ। ମନ୍ଦିର ଭଗ୍ନାବଶେଷ ତଳେ ୧୫ ଜଣ ରହିଯାଇଥିବା ଆଶଙ୍କା କରାଯାଉଛି। ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ସେଠାକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି। କୁଲ୍ଲୁ, କିନ୍ନଉର ଏବଂ ଲହାଉଲ ଓ ସ୍ପିଟିକୁ ଛାଡ଼ିଦେଲେ ଅନ୍ୟ ୯ଟି ଜିଲାରେ ଭୀଷଣ ବର୍ଷା ଜାରି ରହିବ ବୋଲି ପାଣିପାଗ ବିଭାଗ ସତର୍କ କରାଇଛି।
ବାଦଲଫଟା ବର୍ଷା ଯୋଗୁ ରବିବାର ରାତିରେ ସୋଲାନ ଜିଲାର ଜାଡ଼ୋନ ଗ୍ରାମରେ ଗୋଟିଏ ପରିବାରର ୭ ଜଣ ପ୍ରାଣ ହରାଇଛନ୍ତି। ଦୁଇଟି ଘର ଭାସିଯାଇଥିବାବେଳେ ୬ ଜଣଙ୍କୁ ଉଦ୍ଧାର କରାଯାଇଥିବା ପୋଲିସ କହିଛି। ସେହିପରି ଜିଲାର ବରେଲା ପଞ୍ଚାୟତରେ ଭୂସ୍ଖଳନରେ ଏକ ଅସ୍ଥାୟୀ ଘର ଭୁଶୁଡ଼ି ପଡ଼ିବାରୁ ୨ ପିଲାଙ୍କ ଜୀବନ ଯାଇଛି। ସେମାନଙ୍କ ମଧ୍ୟରୁ ଜଣକ ମୃତଦେହ ମିଳିଛି। ବନଲରେ ଜଣେ ମହିଳା ଭୂସ୍ଖଳନରେ ପ୍ରାଣ ହରାଇଛନ୍ତି। ହିମାଚଳରେ ରିଲିଫ ଓ ଉଦ୍ଧାର କାର୍ଯ୍ୟରେ ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍ଡିଆର୍ଏଫ୍)ର କେତେକ ଟିମ୍ ନିୟୋଜିତ ହୋଇଥିବା ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା କହିଛନ୍ତି। ବର୍ଷା ବିଭୀଷିକାରେ ବହୁସଂଖ୍ୟାରେ ଲୋକଙ୍କ ଜୀବନ ଯାଇଥିବାରୁ ଶାହା ମର୍ମାହତ ହୋଇଛନ୍ତି।
