ନ୍ୟୁୟର୍କ, ୧୪।୧୧: ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କ ଦ୍ୱାରା ଲିଖିତ ପୁସ୍ତକ ‘ଏ ପ୍ରୋମିଜ୍ଡ ଲ୍ୟାଣ୍ଡ୍’ରେ ବିଶ୍ୱର ବିଭିନ୍ନ ନେତାଙ୍କ ସମ୍ପର୍କରେ ଉଲ୍ଲେଖ କରାଯାଇଛି। ଏଥିରେ ସେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସମ୍ପର୍କରେ ଲେଖିଛନ୍ତି, ସେ ଶିକ୍ଷକମାନଙ୍କୁ ପ୍ରଭାବିତ କରିବାକୁ ଆଗ୍ରହୀ ଥିବା ଜଣେ ଭୟାଳୁ ଛାତ୍ର । ତାଙ୍କର କୌଣସି ନିର୍ଦ୍ଦିଷ୍ଟ ଗୁଣ ନାହିଁ। ସେ ଶିକ୍ଷକଙ୍କୁ ପ୍ରଭାବିତ କରିବା ଲାଗି ପାଠ ଘୋଷିଥାନ୍ତି। କିନ୍ତୁ ପାଠକୁ ଅକ୍ତିଆର କରିବା ଯୋଗ୍ୟତା କିମ୍ବା ଆଗ୍ରହ ଅଭାବରୁ ସେ ପରୀକ୍ଷାରେ ଭଲ କରିପାରନ୍ତି ନାହିଁ। ଓବାମାଙ୍କ ଏହି ପୁସ୍ତକକୁ ନେଇ ଜୋର୍ଦାର ଚର୍ଚ୍ଚା ଆରମ୍ଭ ହୋଇଯାଇଛି।
ରାହୁଲଙ୍କ ସମ୍ପର୍କରେ ଓବାମାଙ୍କ ଏଭଳି ମତ ପ୍ରକାଶ ପାଇବା ପରେ ତାଙ୍କୁ ସମାଲୋଚନା କରିବାର ସୁଯୋଗ ଭାଜପାକୁ ମିଳିଯାଇଛି। ଭାରତରେ ରାହୁଲଙ୍କୁ ମିଳୁଥିବା ସମ୍ମାନ ବିଶ୍ୱ ସ୍ତରରେ ପହଞ୍ଚତ୍ପାରିଛି ବୋଲି କେନ୍ଦ୍ରମନ୍ତ୍ରୀ ଗିରିରାଜ ସିଂ ତାଚ୍ଛଲ୍ୟ କରିଛନ୍ତି। ଓବାମାଙ୍କ ଭଳି ବ୍ୟକ୍ତିତ୍ୱ ଯେତେବେଳେ ରାହୁଲଙ୍କ ସମ୍ପର୍କରେ ଏଭଳି ମତ ଦେଉଛନ୍ତି, ତାଙ୍କ ବୁଦ୍ଧିମତ୍ତାକୁ ନେଇ ଆଉ ଆଲୋଚନା କରିବାର କିଛି ନାହିଁ ବୋଲି ସେ କହିଛନ୍ତି।
ଉକ୍ତ ପୁସ୍ତକରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଓ ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ସମ୍ପର୍କରେ ମଧ୍ୟ ଉଲ୍ଲେଖ ରହିଛି। ସେଥିରେ ଥିବା ଅଳ୍ପ କେତେଜଣ ବ୍ୟକ୍ତିତ୍ୱଙ୍କ ସମ୍ପର୍କରେ ନ୍ୟୁୟର୍କ ଟାଇମ୍ସ ପକ୍ଷରୁ ସମୀକ୍ଷା କରାଯାଇଛି। ଅର୍ଥନୀତିଜ୍ଞ ମନମୋହନଙ୍କୁ ଓବାମା ତାଙ୍କ ପୁସ୍ତକରେ ପ୍ରଶଂସା କରିଛନ୍ତି। ଆମେରିକାର ପୂର୍ବତନ ପ୍ରତିରକ୍ଷା ସଚିବ ବବ୍ ଗେଟ୍ସ ଏବଂ ମନମୋହନଙ୍କଠାରେ ଆବେଗହୀନ ସଚ୍ଚୋଟତା ଗୁଣ ରହିଥିବା ସେ ଉଲ୍ଲେଖ କରିଛନ୍ତି।
