ହାଇଦ୍ରାବାଦ୍,୩୧।୧୦: କଂଗ୍ରେସର ଭାରତ ଯୋଡୋ ଯାତ୍ରା ଏବେ ତେଲେଙ୍ଗାନାରେ ଚାଲିଛି। ଏହି ଅବସରରେ କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ତେଲେଙ୍ଗାନାର ରେଙ୍ଗା ରେଡ୍ଡି ଜିଲାର କୋଥୁରରେ ଏକ ଖବରଦାତା ସମ୍ମିଳନୀ କରିଛନ୍ତି। ଏଥିରେ ସେ ଗୁଜରାଟ ନିର୍ବାଚନ ସହ ଭାରତ ଯୋଡୋର ପରିକଳ୍ପନାକୁ ନେଇ ନିଜ ମତ ରଖିଛନ୍ତି। ସେ କହିଛନ୍ତି, ଗୁଜରାଟରେ ଆମ ଆଦମୀ ପାର୍ଟିର କୌଣସି ସଂଗଠନ ନାହିଁ। ଏହି ଦଳ କେବଳ ପ୍ରଚାରରେ ସୀମିତ। ଗୁଜରାଟ ନିର୍ବାଚନରେ କଂଗ୍ରେସ ଦଳ ଜିତିବ।
ସେହିପରି ଭାରତ ଯୋଡୋ ଯାତ୍ରା ଆରମ୍ଭ କରିବା ନେଇ ରାହୁଲ କହିଛନ୍ତି, ବହୁ ବର୍ଷ ପୂର୍ବେ ଆମେ ଏହି ଯାତ୍ରା ଆରମ୍ଭ କରିବା କଥା ଭାବୁଥିଲୁ କିନ୍ତୁ କୋଭିଡ କାରଣରୁ ଏହି ଯାତ୍ରା ବନ୍ଦ କରିବାକୁ ପଡିଥିଲା। ରାଜନୀତିରେ ଯୋଗଦେବା ପୂର୍ବରୁ ମୁଁ ଏହି ଯାତ୍ରା ବିଷୟରେ ଚିନ୍ତା କରିଥିଲି। ଦେଶର ସାମ୍ବିଧାନିକ ଢାଞ୍ଚାରେ ଅନେକ କ୍ଷତି ହୋଇଛି। ଏହାକୁ ରୋକିବା ପାଇଁ କଂଗ୍ରେସ ନିରନ୍ତର ପ୍ରୟାସ ଜାରି ରଖିବ।
ସୂଚନାଯୋଗ୍ୟ,ସୋମବାର ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରାର ୫୩ତମ ଦିନ ଥିଲା। ଏପର୍ଯ୍ୟନ୍ତ ଏହି ଯାତ୍ରା ଚାରୋଟି ରାଜ୍ୟର ୧୬ଟି ଜିଲା ଦେଇ ଗତି କରିଛି। ଭାରତ ଯୋଡୋ ଯାତ୍ରା ଏପର୍ଯ୍ୟନ୍ତ ୨,୧୭୨ କିଲୋମିଟର ଦୂରତା ଅତିକ୍ରମ କରିଛି।
