ଟେକ୍ନୋଲୋଜିରେ ଆଜିକାଲି ଅବିଶ୍ୱସନୀୟ ବିକାଶ ଘଟିଲାଣି। ପୂର୍ବରୁ କୁହାଯାଉଥିଲା ମହାକାଶରେ ପନିପରିବା ହୋଇପାରିବ ନାହିଁ। କିନ୍ତୁ ଏବେ ଏହା ସମ୍ଭବ ବୋଲି ଜଣାପଡିଛି। ନାସାର ମହାକାଶଚାରୀ ଓ ଫ୍ଲାଇଟ ଇଞ୍ଜିନିୟର କେଟ୍ ରୁବିନ୍ସ ମହାକାଶରେ ମୂଳା ଗଛ ଲଗାଇବାରେ ସଫଳ ହୋଇଛନ୍ତି। ସେ ପୁଣି ଗୋଟିଏ କି ଦୁଇଟି ନୁହେଁ ୨୦ଟି ମୂଳା ଚାଷ କରିଛନ୍ତି। ଇତିହାସରେ ପ୍ରଥମ ଥର ଏହା ଘଟିଛି। ନାସାର ଏ ହେଉଛି ଏକ ବଡ଼ ସଫଳତା। ମାତ୍ର ୨୭ ଦିନରେ ଉତ୍ପାଦିତ ହୋଇଥିବା ଏହି ମୂଳାର ବଡ଼ ହେବା ପ୍ରୋସେସ୍କୁ ଏକ ୧୦ ସେକେଣ୍ଡର ଭିଡିଓ କରି ନାସାର ଏହି ମହାକାଶଚାରୀ ଓ ଫ୍ଲାଇଟ୍ ଇଞ୍ଜିନିୟର କେଟ୍ ପଠାଇଛନ୍ତି। ୨୦୨୧ରେ ସେମାନେ ପୃଥିବୀକୁ ଆସିବା ପରେ ଏହି ମୂଳାକୁ ନେଇ ଆସିବେ। ଆଉ ସମସ୍ତେ ତାକୁ ଦେଖିପାରିବେ। ଏହି ପ୍ଲାଣ୍ଟ ଏକ୍ସପେରିମେଣ୍ଟକୁ ପ୍ଲାଣ୍ଟ ହାବିଟାଟ୍-୦୨ ନାମ ଦିଆଯାଇଥିଲା। ଯେହେତୁ ଏହି ମୂଳା କମ୍ ଦିନରେ ବଡ ହୁଏ ତେଣୁ ଏହି ଚାଷ କରିବାକୁ ନିଷ୍ପତ୍ତି ନିଆଯାଇଥିଲା। ମହାକାଶରେ ଉତ୍ପାଦିତ ଏହି ମୂଳା ଖାଇବା ଯୋଗ୍ୟ ଓ ପୃଥିବୀରେ ଉତ୍ପାଦିତ ମୂଳା ପରି ପୁଷ୍ଟିକର । ପୂର୍ବରୁ ମହାକାଶଚାରୀମାନେ ମହାକାଶରେ ଗହମ ଓ ପତ୍ର ଭଳି ପରିବା ଚାଷ କରିବାକୁ ଚେଷ୍ଟା କରିଥିଲେ, ହେଲେ ସଫଳତା ମିଳି ନ ଥିଲା। ତେଣୁ ଏଥର ସ୍ପେସ୍ ଷ୍ଟେସନ୍ରେ କିଛି ପରିବର୍ତ୍ତନ କରାଯାଇଥିଲା। ଯେଉଁ ଚାମ୍ବରରେ ଏହାକୁ ଚାଷ କରାଯାଇଥିଲା ତା’ ମଧ୍ୟରେ ଧଳା ଏଲଇଡି ଲାଇଟ୍ ପକାଯାଇଥିଲା। ଏହାବାଦ୍ ଏଥିରେ ଲାଲ, ହଳଦିଆ ଓ ନୀଳ ରଙ୍ଗର ଆଲୋକ ବ୍ୟବହାର କରାଯାଇଥିଲା; ଯଦ୍ଦ୍ବାରା ଫସଲ ଭଲରେ ବଡ଼ ହୋଇପାରିବ। ଏହି ୨୦ଟି ମୂଳା ଉତ୍ପାଦନ ପାଇଁ ଅନେକ ଟଙ୍କା ବି ଖର୍ଚ୍ଚ କରାଇଛି।
