ଚେନ୍ନାଇ,୯ା୧(ପି.ଟି.): ସ୍ଥାନୀୟ ମାଡ୍ରାସ ଇଣ୍ଟରନ୍ୟାଶନାଲ ସର୍କିଟରେ ରବିବାର ଅନୁଷ୍ଠିତ ଏମ୍ଆର୍ଏଫ୍ ଏମ୍ଏମ୍ଏସ୍ସି ଏଫ୍ଏମ୍ଏସ୍ସିଆଇ ଇଣ୍ଡିଆନ ନ୍ୟାଶନାଲ କାର୍ ରେସିଂ ଚାମ୍ପିୟନଶିପ୍ର ଦ୍ୱିତୀୟ ରାଉଣ୍ଡରେ ଏକ ଦୁର୍ଘଟଣା ଘଟିଛି। ଏଥିରେ ରେସ୍ର କେ.ଇ. କୁମାରଙ୍କ ମୃତ୍ୟୁ ଘଟିଛି। ତାଙ୍କୁ ୫୭ବର୍ଷ ବୟସ ହୋଇଥିଲା। ସକାଳେ ସାଲୁନ୍ କାର୍ ରେସ୍ ବେଳେ କୁମାରଙ୍କ କାର୍ ଜଣେ ପ୍ରତିଯୋଗୀଙ୍କ କାର୍ ସହ ଧକ୍କା ହୋଇଥିଲା। କାର୍ଟି ଟ୍ରାକ୍ ବାହାରକୁ ଖସିଯାଇ ବାଡରେ ଧକ୍କା ଦେବାପରେ ଓଲଟିପଡ଼ିଥିଲା।
ରେସ୍କୁ ତୁରନ୍ତ ବନ୍ଦ (ରେଡ୍ ଫ୍ଲାଗ୍) ରଖାଯାଇଥିଲା। କୁମାରଙ୍କୁ ପ୍ରଥମେ ଦୁର୍ଘଟଣାଗ୍ରସ୍ତ କାର୍ରୁ ବାହାର କରାଯାଇ ଟ୍ରାକ୍ର ମେଡିକାଲ ସେଣ୍ଟରରେ ତାଙ୍କର ପ୍ରାଥମିକ ଚିକିତ୍ସା କରାଯାଇଥିଲା। ପରେ ଆମ୍ବୁଲାନ୍ସ ଯୋଗେ ତାଙ୍କୁ ସ୍ଥାନୀୟ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। ଡାକ୍ତରମାନଙ୍କ ସମସ୍ତ ଉଦ୍ୟମ ସତ୍ତ୍ୱେ କୁମାରଙ୍କୁ ମୃତ୍ୟୁ ମୁଖରୁ ବଞ୍ଚାଇପାରି ନ ଥିଲେ। ମିଟ୍ ଚେୟାରମ୍ୟାନ ଭିକି ଚାଣ୍ଡୋକ୍ ଏହାକୁ ଏକ ଦୁର୍ଭାଗ୍ୟଜନକ ଘଟଣା ବୋଲି ବର୍ଣ୍ଣନା କରିଛନ୍ତି। କୁମାର ଜଣେ ଅଭିଜ୍ଞ ରେସର। ଜଣେ ପ୍ରତିଯୋଗୀ ଓ ବନ୍ଧୁ ହିସାବରେ ତାଙ୍କୁ ବହୁଦିନ ହେଲା ସେ ଜାଣନ୍ତି। ତା
ଙ୍କ ବିୟୋଗରେ ସମଗ୍ର ରେସିଂ ସମୁଦାୟ ଗଭୀର ଶୋକ ପ୍ରକାଶ କରିବା ସହ ତାଙ୍କ ପରିବାର ପ୍ରତି ସମବେଦନା ଜ୍ଞାପନ କରୁଛି। ଚାଣ୍ଡୋକ୍ କହିଛନ୍ତି, କ୍ରୀଡ଼ାର ଜାତୀୟ ପରିଚାଳନା ପରିଷଦ ଏଫ୍ଏମ୍ଏସ୍ସିଆଇ ଏବଂ ଆୟୋଜକଗଣ ଏମ୍ଏମ୍ଏସ୍ସି ତରଫରୁ ଘଟଣାର ତଦନ୍ତ ଆରମ୍ଭ କରାଯାଇଛି। ଅନ୍ୟପକ୍ଷରେ କୁମାରଙ୍କୁ ସମ୍ମାନ ଜଣାଇ ଏମ୍ଏମ୍ଏସ୍ସି ଦିନର ଅବଶିଷ୍ଟ କାର୍ଯ୍ୟସୂଚୀକୁ ବାତିଲ କରଥିଲା।
