ଜୋହାନ୍ସବର୍ଗ,୩୦।୬(ପି.ଟି.): କୋଭିଡ୍-୧୯ ମହାମାରୀର ଆତଙ୍କ ଜାରି ରହିଥିବା ବେଳେ ଯୁବ ଉଇକେଟକିପର ବ୍ୟାଟ୍ସମ୍ୟାନ କ୍ୱିଣ୍ଟନ ଡିକକ୍ଙ୍କ ନେତୃତ୍ୱରେ ଦକ୍ଷିଣ ଆଫ୍ରିକାର ୪୪ ଜଣ କ୍ରିକେଟର ଟ୍ରେନିଂକୁ ଫେରିଛନ୍ତି। ହାଇପରଫର୍ମାନ୍ସ ସ୍କ୍ବାଡରେ ସାମିଲ ଥିବା ଏହି ଖେଳାଳିମାନେ ଦେଶର କ୍ରୀଡ଼ା ମନ୍ତ୍ରଣାଳୟରୁ ଅନୁମତି ମିଳିବା ପରେ ସୋମବାର ପ୍ରଶିକ୍ଷଣ ଆରମ୍ଭ କରିଛନ୍ତି। ମାର୍ଚ୍ଚ ୧୫ ତାରିଖ ପରଠାରୁ ଏହି ମହାମାରୀ କାରଣରୁ ଦକ୍ଷିଣ ଆଫ୍ରିକାରେ ସବୁପ୍ରକାର କ୍ରିକେଟ କାର୍ଯ୍ୟକଳାପକୁ ବାତିଲ କରାଯାଇଥିଲା। ସେତେବେଳେ ଦକ୍ଷିଣ ଆଫ୍ରିକାରେ ଦିନିକିଆ ଘରୋଇ ଟୁର୍ନାମେଣ୍ଟ ଚାଲୁ ରହିଥିଲା।
ଏହି ସମୟରେ ଦକ୍ଷିଣ ଆଫ୍ରିକା ଦଳ ଏକ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଖେଳିବାକୁ ଭାରତ ଗସ୍ତରେ ଆସିଥିଲା। ଧର୍ମଶାଳାରେ ଅନୁଷ୍ଠିତ ପ୍ରଥମ ମ୍ୟାଚ୍ ବର୍ଷା ଯୋଗୁ ବାତିଲ ହୋଇଥିବା ବେଳେ ମହାମାରୀ କାରଣରୁ ଏହି ସିରିଜକୁ ବାତିଲ କରିବାକୁ ପଡିଥିଲା। ଦକ୍ଷିଣ ଆଫ୍ରିକାରେ ଏପର୍ଯ୍ୟନ୍ତ ୧,୩୮,୦୦୦ ଜଣ ଏହି ମହାମାରୀରେ ସଂକ୍ରମିତ ହୋଇଛନ୍ତି ଓ ୨,୪୦୦ ମୃତ୍ୟୁବରଣ କରିଛନ୍ତି।
ଖେଳାଳିମାନେ ନିରୀକ୍ଷଣରେ ଥିବା ଛୋଟିଆ ଛୋଟିଆ ଗ୍ରୁପ୍ରେ ନିଜ ଫ୍ରାଞ୍ଚାଇଜ ଟିମ୍ର ଚିହ୍ନା ତଥା ନିକଟତମ କୋଚ୍ଙ୍କ ସହିତ ପ୍ରଶିକ୍ଷଣ ନେବେ ବୋଲି କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ) ତରଫରୁ କୁହାଯାଇଛି। ସିଏସ୍ଏର କୋଭିଡ୍-୧୯ ଷ୍ଟିଅରିଂ କମିଟି ଦ୍ୱାରା ଜାରି କରାଯାଇଥିବା ନିର୍ଦ୍ଦେଶନାମାକୁ ଖେଳାଳିମାନେ କଡାକଡି ରୂପେ ପାଳନ କରିବେ। ସମ୍ପୂର୍ଣ୍ଣ ପରିବେଶକୁ ସାନିଟାଇଜ୍ କରିବା ସହ ଖେଳାଳି ଓ ସପୋର୍ଟ ଷ୍ଟାଫ୍ମାନଙ୍କୁ ନିୟମିତ ଭାବେ ଟେଷ୍ଟ କରିବା ଉପରେ ଗୁରୁତ୍ୱ ଦିଆଯିବ। ସେହିପରି ମହିଳା କ୍ରିକେଟରଙ୍କ ପାଇଁ ହାଇ ପରଫର୍ମାନ୍ସ ଟ୍ରେନିଂ ନେଇ ମଧ୍ୟ ବିଚାର କରାଯାଉଛି ବୋଲି ସିଏସ୍ଏ ତରଫରୁ କୁହାଯାଇଛି। ସିଏସ୍ଏ ଅନୁମିତ ନ ଦେବା ପର୍ଯ୍ୟନ୍ତ ଟ୍ରେନିଂ ସେସନରେ ଗଣମାଧ୍ୟମ ପ୍ରତିନିଧିମାନଙ୍କୁ ବାରଣ କରାଯାଇଛି। ଦକ୍ଷିଣ ଆଫ୍ରିକାର ସବୁ ଖେଳାଳି ଏହି ଟ୍ରେନିଂ ସେସନ୍ରେ ଅଂଶଗ୍ରହଣ କରିବେ।
