ଚଣ୍ଡିଗଡ, ୧୯।୩: ଖଲିସ୍ତାନର ସମର୍ଥକ ତଥା ‘ୱାରିସ ପଞ୍ଜାବ ଦେ’ ସଂଗଠନର ମୁଖ୍ୟ ଅମ୍ରିତପାଲ୍ ସିଂଙ୍କ ପାକିସ୍ତାନୀ ଗୁପ୍ତଚର ଏଜେନ୍ସି ଆଇଏସଆଇ ସହ ସମ୍ପର୍କ ସାମ୍ନାକୁ ଆସିଛି। ପୋଲିସ ଦାବି କରିଛି ଯେ, ଅମ୍ରିତପାଲ ଆଇଏସଆଇ ସହାୟତାରେ ଆନନ୍ଦପୁର ଖାଲସା ଫୋର୍ସ ଗଠନ ପାଇଁ ପ୍ରସ୍ତୁତ ହେଉଥିଲେ। ତାଙ୍କ ଘରୁ ଏବଂ ସାଥୀଙ୍କ ନିକଟରୁ ଉଦ୍ଧାର ହୋଇଥିବା ଅସ୍ତ୍ର ଉପରେ ଏକେଏଫ୍ (ଆନନ୍ଦପୁର ଖାଲସା ଫୋର୍ସ) ଲେଖାଯାଇଥିବା ଦେଖିବାକୁ ମିଳିଥିଲା। ଏହି ଷଡଯନ୍ତ୍ରର ଏକ ଅଂଶ ଭାବରେ ପଞ୍ଜାବରେ ଧର୍ମ ନାମରେ ଘୃଣାଭାବ ପ୍ରଚାର କରାଯାଉଥିଲା। ତାଙ୍କ ପାଖରେ ବିଦେଶୀ ପାଣ୍ଠି ଥିବା ସନ୍ଦେହ କରାଯାଉଛି। ଜଳନ୍ଧର ରେଞ୍ଜ ଡିଜି ସ୍ବପ୍ନ ଶର୍ମା ଅମ୍ରିତପାଲଙ୍କ ପାକିସ୍ତାନର ଗୁପ୍ତଚର ସଂସ୍ଥା ସହ ସମ୍ପର୍କକୁ ନିଶ୍ଚିତ କରିଛନ୍ତି।
ଡିଜି କହିଛନ୍ତି, ଅମ୍ରିତପାଲ ଯାତ୍ରା କରୁଥିବା ମର୍ସିଡିଜ କାର୍ ପୋଲିସ ଏନକାଉଣ୍ଟରରେ ନିହତ ହୋଇଥିବା ଡ୍ରଗ ଚୋରା ଚାଲାଣକାରୀ ରଣଦୀପଙ୍କ ଭାଇଙ୍କର ଥିଲା। ଗାଡି ବିଷୟରେ ସମ୍ପୂର୍ଣ୍ଣ ଅନୁସନ୍ଧାନ କରାଯାଉଛି। ଏହି ଗାଡି ପାଇଁ ଟଙ୍କା କେଉଁଠୁ ଆସିଲା ଏବଂ ଏହା ସହିତ ଅମ୍ରିତପାଲ୍ଙ୍କ ସମ୍ପର୍କ କ’ଣ ତାହା ତଦନ୍ତ କରାଯାଉଛି। ଅମ୍ରିତପାଲ୍ ଦୁବାଇରେ ଟ୍ରକ ଡ୍ରାଇଭର ଭାବରେ କାମ କରୁଥିଲେ। ସେ ଦୁବାଇରେ ପାକିସ୍ତାନୀ ଗୁପ୍ତଚର ସଂସ୍ଥା ସହିତ ଯୋଗାଯୋଗ କରିଥିଲେ। ଧର୍ମ ନାମରେ ନିରୀହ ଯୁବକମାନଙ୍କୁ ଫାନ୍ଦରେ ପକାଇବାକୁ ଅମ୍ରିତପାଲ୍ ଚେଷ୍ଟା କରୁଥିଲେ।
ସୂଚନାଯୋଗ୍ୟ, ଅମ୍ରିତପାଲ୍ଙ୍କୁ ଧରିବା ଲାଗି ଶନିବାର ରାଜ୍ୟ ପୋଲିସଙ୍କ ପକ୍ଷରୁ ବ୍ୟାପକ ଚଢ଼ାଉ କରାଯାଇ ୭୮ ଜଣଙ୍କୁ ଗିରଫ କରାଯାଇଥିଲା। ଜଳନ୍ଧର ଜିଲାରେ ଖଲିସ୍ତାନୀ ନେତାଙ୍କୁ ଗାଡ଼ି ସମୂହକୁ ପୋଲିସ ପିଛା କରୁଥିବାବେଳେ ସେ କୌଣସି ପ୍ରକାରେ ଖସି ପଳାଇଥିଲେ। ଏବେ ବି ସେ ଫେଣାର ଅଛନ୍ତି।
