ଦିଗପହଣ୍ଡି, ୯।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଅନ୍ତର୍ଗତ କଙ୍କୋରଡ଼ା ପଞ୍ଚାୟତକୁ ବ୍ଲକ ପ୍ରଶାସନ ପକ୍ଷରୁ ଦୀର୍ଘଦିନ ଧରି ଅବହେଳା କରାଯାଉଥିବା ଅଭିଯୋଗ ହୋଇଛି। ଏହାର ପ୍ରତିବାଦରେ ମଙ୍ଗଳବାର ସାନଖେମୁଣ୍ଡି ବ୍ଲକ କାର୍ଯ୍ୟାଳୟ ପରିସରରେ ସରପଞ୍ଚ ମିନତୀ ସେଠୀଙ୍କ ନେତୃତ୍ୱରେ ଶତାଧିକ ଗ୍ରାମବାସୀ ଏକ ଶାନ୍ତିପୂର୍ଣ୍ଣ ଧାରଣା ଦେଇଛନ୍ତି।
ବିଭିନ୍ନ ପ୍ରକାରର ବିକାଶମୂଳକ କାର୍ଯ୍ୟ ସରିଥିଲେ ମଧ୍ୟ ଆକ୍ରୋଶମୂଳକ ଭାବେ ସେଗୁଡ଼ିକର ବିଲ୍ ବନ୍ଦ କରି ରଖାଯାଇଛି। ଅନ୍ତ୍ୟୋଦୟ ଯୋଜନା ଏବଂ ସାମାଜିକ ସୁରକ୍ଷା ଭତ୍ତା ପାଇଁ ହିତାଧିକାରୀ ଚୟନ ପ୍ରକ୍ରିୟାରେ ବ୍ଲକ ପ୍ରଶାସନିକ ଅଧିକାରୀମାନେ ବ୍ୟାପକ ପାତରଅନ୍ତର କରୁଥିବା ସରପଞ୍ଚ ଅଭିଯୋଗ କରିଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣ କାର୍ଯ୍ୟାଦେଶ ଆବଣ୍ଟନ ସମୟରେ ସରପଞ୍ଚଙ୍କ ମତାମତକୁ କୌଣସି ଗୁରୁତ୍ୱ ଦିଆଯାଉନାହିଁ, ଯାହାଫଳରେ ପ୍ରକୃତ ଯୋଗ୍ୟ ହିତାଧିକାରୀମାନେ ଏଥିରୁ ବଞ୍ଚିତ ହେଉଛନ୍ତି ବୋଲି ସରପଞ୍ଚ ପ୍ରତିନିଧି ମିଥୁନ ସେଠୀ କହିଛନ୍ତି।
ଗ୍ରାମବାସୀଙ୍କଅଭିଯୋଗ ମୁତାବକ, ଦୀର୍ଘ ୩ ମାସରୁ ଅଧିକ ସମୟ ହେବ ଗରିବ ଲୋକମାନେ ସେମାନଙ୍କର ମାସିକ ଭତ୍ତା ଟଙ୍କା ପାଇନାହାନ୍ତି। ଫଳରେ ବୃଦ୍ଧବୃଦ୍ଧାମାନେ ସେମାନଙ୍କର ମାସିକ ଔଷଧ ଖର୍ଚ୍ଚ ଭରଣା କରିବାରେ ଚରମ ଅସୁବିଧାର ସମ୍ମୁଖୀନ ହେଉଛନ୍ତି।
ଏହି ଶାନ୍ତିପୂର୍ଣ୍ଣ ଆନ୍ଦୋଳନକୁ ଗଞ୍ଜାମ ଜିଲା ସରପଞ୍ଚ ସଂଘ ସଭାପତି ତଥା ଦିଗପହଣ୍ଡି ବ୍ଲକ କଇଠଖଣ୍ଡି ସରପଞ୍ଚ ମନୋରଞ୍ଜନ ଗୌଡ଼ ଉପସ୍ଥିତ ରହି ସମ୍ପୂର୍ଣ୍ଣ ସମର୍ଥନ ଜଣାଇଛନ୍ତି।
ଅନ୍ୟପକ୍ଷରେ, ଏହି ସମ୍ପର୍କରେ ସାନଖେମୁଣ୍ଡି ବିଡ଼ିଓ ଜିତେନ୍ଦ୍ର କୁମାର ମିଶ୍ରଙ୍କୁ ପଚାରିବାରୁ ସେ ସରପଞ୍ଚଙ୍କ ସମସ୍ତ ଅଭିଯୋଗକୁ ସମ୍ପୂର୍ଣ୍ଣ ଭିତ୍ତିହୀନ ଓ କପୋଳକଳ୍ପିତ ବୋଲି କହିଛନ୍ତି। ବିଡ଼ିଓଙ୍କ ଅନୁଯାୟୀ, ପଞ୍ଚାୟତର ସମସ୍ତ ଉନ୍ନୟନମୂଳକ କାର୍ଯ୍ୟ ଶେଷ ହେବା ପରେ ପ୍ରଥମେ କାମର ଗୁଣବତ୍ତା ତନଖି କରାଯାଉଛି। ତଦନ୍ତ ସଠିକ୍ ବାହାରିବା ପରେ ହିଁ ନିୟମାନୁସାରେ ବିଲ୍ ମଞ୍ଜୁର କରାଯାଉଛି। ଯଦି ସରପଞ୍ଚଙ୍କ ନିକଟରେ କୌଣସି ନିର୍ଦ୍ଦିଷ୍ଟ ଅନିୟମିତତାର ତଥ୍ୟ-ପ୍ରମାଣ ଅଛି, ତେବେ ସେ ଲିଖିତ ଆକାରରେ ଅଭିଯୋଗ କରନ୍ତୁ, ନିଶ୍ଚିତ ଭାବେ ତଦନ୍ତ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
