ଦେବଗଡ଼, ୩୦।୩ (ଶଶାଙ୍କ ଶେଖର ଝାଙ୍କର): ଦେବଗଡ଼ ଜିଲା ରିଆମାଳ ବ୍ଲକ ଅଙ୍ଗନୱାଡ଼ି ସୁପରଭାଇଜରଙ୍କ ବଦଳି ଦାବିରେ ଅଙ୍ଗନୱାଡି କର୍ମୀ ବ୍ଲକ ସମ୍ମୁଖରେ ଦେଉଥିବା ଧାରଣାସ୍ଥଳରେ ସୋମବାର ଜିଲା ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ ରେବେକା ବିଲୁଙ୍ଗ ପହଞ୍ଚି ବୁଝାସୁଝା କରିଛନ୍ତି। ଅଙ୍ଗନୱାଡି କର୍ମୀଙ୍କୁ ବୁଝାସୁଝା ପରେ ଆଗାମୀ ୫ ଦିନ ଭିତରେ ପଦକ୍ଷେପ ଗ୍ରହଣ କରିବାକୁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଛି। ସୂଚନା ଅନୁସାରେ ଅଙ୍ଗନୱାଡ଼ି ସୁପରଭାଇଜର ପ୍ରଣତି ପ୍ରଧାନ ସମସ୍ତ ଅଙ୍ଗନୱାଡ଼ି କର୍ମୀମାନଙ୍କୁ ନିର୍ଯାତନା ଦେଉଥିବା ଅଭିଯୋଗ ଆଣି ତାଙ୍କୁ ଅନ୍ୟତ୍ର ବଦଳି କରିବା ଦାବିରେ ବ୍ଲକ ସମ୍ମୁଖରେ ପଶ୍ଚିମ ଓଡ଼ିଶା ଅଙ୍ଗନୱାଡି କର୍ମୀ ଓ ସହାୟିକା ସଂଘ ସଭାନେତ୍ରୀ ମୀରାବତୀ ଦଳବେହେରାଙ୍କ ନେତୃତ୍ୱରେ ଧାରଣା ଚାଲିଥିଲା। ଏ ସମ୍ପର୍କରେ ସୁପରଭାଇଜର ପ୍ରଣତୀ ପ୍ରଧାନଙ୍କୁ ପଚାରିବାରୁ ଭିତ୍ତିହୀନ ଅଭିଯୋଗ ବୋଲି ପ୍ରକାଶ କରିବା ସହିତ କିଛି ଦିନ ତଳେ ତାଙ୍କ ଅଧୀନସ୍ଥ ଅଙ୍ଗନୱାଡି କର୍ମୀମାନଙ୍କୁ ରିପୋର୍ଟ ମାଗିଥିଲେ। ଏହି ରିପୋର୍ଟ କିଛି ଅଙ୍ଗନୱାଡି କର୍ମୀ ଦେଇଥିବା ବେଳେ କିଛି ଅଙ୍ଗନୱାଡି କର୍ମୀ ଦେଇ ନଥିଲେ। ତେଣୁ ଦେଇ ନ ଥିବା ଅଙ୍ଗନୱାଡି କର୍ମୀଙ୍କୁ ଆଉଥରେ ରିପୋର୍ଟ ମାଗିବା ପରେ ସଭାନେତ୍ରୀ ମୀରାବତୀ ଦଳବେହେରାଙ୍କ ସହିତ ତର୍କ ହୋଇଥିଲା,ତେଣୁ ମୋ ନାମରେ ମିଥ୍ୟା ଅଭିଯୋଗ ଆଣିଛନ୍ତି ବୋଲି ପରିପ୍ରକାଶ କରିଥିଲେ ।
